ក្រុមហ៊ុនរថយន្តធំជាងគេរបស់ចិន គ្រោងបើករោងចក្រផលិតនៅវៀតណាម

2019-07-31 02:36:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនរថយន្តធំជាងគេរបស់ចិន SAIC និងក្រុមហ៊ុនរថយន្ត Tan Chong Group របស់ម៉ាឡេស៊ីបានចុះកិច្ចព្រមព្រៀងអនុសារណៈយោគយល់ដើម្បីពង្រីកជំនួញរបស់ខ្លួនក្នុងប្រទេសវៀតណាម។ ជាក់ស្ដែងទៅ ភាគីទាំងពីរចង់សហការគ្នាចែកចាយ, ជួញដូរ និងនាំចូលរថយន្ត រួមទាំងមានបំណងសង់រោងចក្រផលិតរថយន្តនៅវៀតណាម នាពេលខាងមុខទៀតផង។

អ្នកតំណាងក្រុមហ៊ុន Tan Chong បាននិយាយថា ៖ "ផែនការបានចាប់ផ្ដើមក្លាយជាការពិតហើយ។ Tan Chong មានឱកាសពង្រីកមុខជំនួញរបស់ខ្លួន នៅក្នុងសហគ្រាសយានយន្តវៀតណាម”។

ពេលនេះមិនទាន់មានដំណឹងថារថយន្តរបស់ក្រុមហ៊ុន SAIC ម៉ូដែលណាមួយ ទំនងជាត្រូវលក់ និងចែកចាយដោយ Tan Chong នោះទេ។ គួរដឹងថា SAIC កាន់កាប់នូវម៉ាករថយន្តជាច្រើនដូចជា Maxus, MG និង Roewe ជាដើម។

រថយន្ត Maxus D90 ៧ កៅអី

SAIC អាចរករថយន្តបានចំនួន ៧,០៥ លានគ្រឿងនៅឆ្នាំ ២០១៨ ដែលអាចគ្រងតំណែងជាក្រុមហ៊ុនផលិតរថយន្តក្នុងស្រុកធំជាងគេនៅចិន។ រថយន្តដែលលក់បាននៅចិនក្នុងឆ្នាំ ២០១៨ មានប្រមាណ ២៨ លានគ្រឿង។

ក្រៅពីមានរោងចក្រចំនួន ៦ នៅចិនដីគោក SAIC ក៏មានរោងចក្រផលិតនៅចក្រភពអង់គ្លេស ថៃ និងឥណ្ឌា។ ក្រុមហ៊ុននេះក៏មានសហការគ្នាជាមួយ General Motors (អាមេរិក) និង Volkswagen AG (អាល្លឺម៉ង់) ផលិតរថយន្តលក់នៅចិនផងដែរ។

ចំណែក Tan Chong វិញគឺជាក្រុមហ៊ុនដែលមានទីស្នាក់ការកណ្ដាលនៅម៉ាឡេស៊ី ធ្វើប្រតិបត្តិការផ្នែកផលិតយានយន្ត, ចែកចាយរថយន្ត និងជួញដូររថយន្ត។ ក្រុមហ៊ុននេះមានរោងចក្រផលិតនៅវៀតណាម ថៃ និងមីយ៉ាន់ម៉ា រួមទាំងទទួលបានសិទ្ធចែកចាយរថយន្តនៅប្រទេសឡាវ និងកម្ពុជាផងដែរ៕

ចុចអាន៖

ប្រភព៖ vnexpress ប្រែសម្រួល៖ សុខហេង