Apple មិនដំឡើងថ្លៃ iPhone ហើយបណ្ដាក់ទុនការផលិត iPhone នៅវៀតណាមជំនួស

2019-08-06 02:33:57
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកវិភាគល្បីឈ្មោះ Ming-Chi Kuo បានបញ្ចេញកំណត់ត្រាសំខាន់ថ្មី ដែលនិយាយអំពីសង្វាក់ផលិតកម្ម Apple និងការជះឥទ្ធិពលជុំវិញការដំឡើងពន្ធចុងក្រោយរបស់រដ្ឋាភិបាលលោក ដូណាល់ ត្រាំ។

កាលពីសប្ដាហ៍មុន លោក ត្រាំ បានប្រកាសថាសហរដ្ឋអាមេរិកនឹងយកពន្ធ ១០% លើមុខទំនិញតម្លៃ ៣០០ ពាន់លានដុល្លារ ដែលនាំចូលពីប្រទេសចិន ចាប់ផ្ដើមពីថ្ងៃទី ១ ខែកញ្ញា។ ត្បិតថាពេលនេះ គេមិនច្បាស់ថានឹងមានរួមបញ្ចូលផលិតផល Apple ឬអត់ ប៉ុន្តែអ្នកវិភាគបានសម្ដែងការព្រួយបារម្ភ ហើយតម្លៃហ៊ុន Apple បានធ្លាក់ចុះ ក្រោយចេញដំណឹងនេះ។

មកត្រឡប់មកលោក Ming-Chi Kuo វិញ លោកបានសរសេរថា Apple ទំនងជាបានធ្វើការត្រៀមខ្លួនរួចហើយសម្រាប់ការកំណត់ពន្ធនេះ ហើយលោកព្យាករណ៍ថា Apple នឹងរ៉ាប់រងនូវផលប៉ះពាល់ពីការដាក់ពន្ធនេះ ក្នុងរយៈពេលខ្លីមួយ។ មានន័យថាតម្លៃនៃផលិតផល Apple សម្រាប់លក់លើទីផ្សារអាមេរិក នឹងមិនមានការឡើងថ្លៃនោះទេ ទោះបីមានការយកពន្ធក្ដី។

សម្រាប់រយៈពេលយូរអង្វែងវិញ អ្នកវិភាគជើងចាស់រូបនេះ គិតថាសង្វាក់ផលិតកម្មផលិតផល Apple នៅរោងចក្រក្រៅប្រទេសចិន អាចនឹងបំពេញតម្រូវការដល់ទីផ្សារអាមេរិកបាន ក្នុងរយៈពេល ២ ឆ្នាំបន្ទាប់។ ការគិតនេះ ផ្អែកលើការគួបផ្សំនៃ "កម្រិតនៃការផលិត" និងទីផ្សារ Apple នៅអាមេរិក។ "ប្រសិនបើទំហំទីផ្សារ Apple នៅអាមេរិកមានការថយចុះ ហើយចំនួនផលិតកើនឡើង ការពង្រីកសង្វាក់ផលិតកម្មនៅរោងចក្រក្រៅប្រទេសចិន អាចបំពេញតម្រូវការទីផ្សារអាមេរិកបានយ៉ាងងាយស្រួល”។

ចំពោះសង្វាក់ផលិតកម្មនៅរោងចក្រក្រៅប្រទេសចិននេះ លោក Ming-Chi Kuo បានសំដៅដល់សង្វាក់ផលិតកម្មនៅរោងចក្រ Foxconn ដែលមានទីតាំងនៅប្រទេសវៀតណាម និងប្រទេសឥណ្ឌា រួមជាមួយរោងចក្រ Wistron ដែលមានទីតាំងនៅឥណ្ឌា ដែលជារោងចក្រផលិត iPhone។ AirPods ក៏បានចាប់ផ្ដើមផលិតនៅរោងចក្រក្រៅប្រទេសចិនដែរ ពោលគឺរោងចក្រ Luxshare ICT និង Goertek ដែលមានទីតាំងនៅវៀតណាម៕

ចុចអាន៖

ប្រភព៖ 9to5Mac ប្រែសម្រួល៖ សុខហេង