ប្រធានក្រុមហ៊ុនជប៉ុន ជ្រុលបង្ហាញពីថ្ងៃដាក់លក់ iPhone 11

2019-08-07 02:02:27
ចំនួនមតិ 0 | ចំនួនចែករំលែក 0

ចន្លោះមិនឃើញ

អំឡុងការប្រកាសអំពីរបាយការណ៍ហិរញ្ញវត្ថុប្រចាំត្រីមាសទីពីរ លោក Ken Miyauchi ជាប្រធានក្រុមហ៊ុនផ្គត់ផ្គង់សេវាទូរសព្ទ SoftBank Mobile របស់ជប៉ុន បានបង្ហាញថា iPhone ស៊េរីឆ្នាំ ២០១៩ នឹងចេញលក់ ១០ ថ្ងៃមុនដាច់ខែកញ្ញា មានន័យថានៅថ្ងៃទី ២០ ខែកញ្ញាផ្ទាល់។

កាលបរិច្ឆេទនេះ មិនជាខុសគ្នាខ្លាំងពីកាលបរិច្ឆេទចេញលក់នាឆ្នាំកន្លងទៅនោះទេ។ លោក Miyauchi បានជ្រុលបង្ហាញពីថ្ងៃខែចេញលក់នេះ ពេលឆ្លើយតបនឹងសំនួររបស់អ្នកកាសែត ដែលសួរអំពីច្បាប់ទូរគមនាគមន៍ថ្មី ដែលនឹងចូលជាធរមានចាប់ពីថ្ងៃទី ១ ខែតុលា ឆ្នាំ ២០១៩ នេះ។

រូបរាង Render របស់ iPhone ជំនាន់ថ្មី

ច្បាប់ថ្មីនឹងតម្រូវឲ្យក្រុមហ៊ុនទូរគមនាគមន៍ជប៉ុន បែងចែកតម្លៃអ៊ីនធឺណិត ឲ្យដាច់ពីតម្លៃស្មាតហ្វូន ក្នុងកុងត្រាជាមួយអតិថិជន ហើយលោកប្រធានរូបនេះបានឆ្លើយតបថា មិនច្បាស់ថា SoftBank នឹងដោះស្រាយបែបណានោះទេចំពោះការដាក់លក់ iPhone ថ្មី ដោយសារមានពេលត្រឹម ១០ ថ្ងៃប៉ុណ្ណោះ មុនច្បាប់ចូលជាធរមាន។

ក្រោយពីបានដឹងថាខ្លួនសាងកំហុស លោក Miyauchi ព្យាយាមបិទបាំងកំហុសរបស់ខ្លួន ដោយបាននិយាយថា ៖ "គ្មាននរណាដឹងទេថា iPhone នឹងចេញលក់ពេលណានោះ”។ ប៉ុន្តែសម្ដីបាននិយាយរួចទៅហើយ។

ក្រឡេកទៅឆ្នាំមុន iPhone XS/XS Max បានបញ្ចេញលក់នៅថ្ងៃទី ២១ ខែកញ្ញា ក្រោយពីបានប្រកាសចេញនៅថ្ងៃទី ១២ ខែកញ្ញា និងបើកទទួលការកុម្ម៉ង់នៅថ្ងៃទី ១៤ ខែកញ្ញា៕

ចុចអាន៖

ប្រភព៖ GSMarena ប្រែសម្រួល៖ សុខហេង