ការលក់ស្មាតហ្វូនថយចុះ Samsung ងាកមកលក់គ្រឿងបន្លាស់ឲ្យក្រុមហ៊ុនចិនវិញ
- 2019-08-29 03:54:11
- ចំនួនមតិ 0 | ចំនួនចែករំលែក 0
ការលក់ស្មាតហ្វូនថយចុះ Samsung ងាកមកលក់គ្រឿងបន្លាស់ឲ្យក្រុមហ៊ុនចិនវិញ
ចន្លោះមិនឃើញ
តំណែងកំពូលរបស់ Samsung នៅក្នុងសហគ្រាសស្មាតហ្វូននាពេលនេះ កំពុងរងការប្រកួតប្រជែងពីក្រុមហ៊ុនផលិតទូរសព្ទរបស់ចិនជាច្រើន។ ក្រុមហ៊ុនចិនបានដណ្ដើមយកចំណែកទីផ្សាររបស់ Samsung ជាបន្តបន្ទាប់ ហើយចំពោះ Huawei ធ្លាប់បានបង្ហាញមហិច្ឆតាយកតំណែងកំពូលពី Samsung ទៀតផង។
ក្រោមការប្រកួតប្រជែងទាំងនេះ Samsung ទំនងជាប្រើយុទ្ធសាស្ត្រ ធ្វើជាដៃគូផង និងគូប្រកួតប្រជែងផង។ ផ្អែកតាមការចុះផ្សាយរបស់សារព័ត៌មានក្នុងស្រុក The Korea Times បានឲ្យដឹងថា Samsung កំពុងពង្រីកយុទ្ធសាស្ត្រលក់គ្រឿងបន្លាស់ស្មាតហ្វូន ទៅឲ្យក្រុមហ៊ុនចិនជាពិសេស Huawei Xiaomi OPPO និង Vivo។
នេះមានន័យថា Samsung ដែលកំពុងតែយ៉ាប់យឺនក្នុងការផ្ដួលគូប្រជែងលើទីផ្សារបើកទូលាយ ត្រូវពឹងផ្អែកលើការលក់គ្រឿងបន្លាស់ស្មាតហ្វូនទៅឲ្យគូប្រជែងជំនួសវិញ ដើម្បីបន្តរក្សាការរីកលូតលាស់របស់ខ្លួន។
ឧទាហរណ៍ជាក់ស្ដែង កាលពីថ្មីៗនេះ Samsung ប្រកាសថានឹងលក់ Sensor រូបភាព ISOCELL Bright GW1 ទៅឲ្យ Xiaomi សម្រាប់ប្រើលើស្មាតហ្វូនត្រកូល Redmi របស់ខ្លួន។ Samsung ក៏នឹងលក់ Sensor កម្រិត ១០៨ MP របស់ខ្លួនទៅឲ្យ Xiaomi ហើយ OPPO ក៏គ្រោងនឹងចាប់ផ្ដើមប្រើ Sensor Samsung ផងដែរ។
Huawei ក៏បានបញ្ជាក់ថានឹងបង្កើនចំនួនទិញអេក្រង់ OLED របស់ Samsung ផងដែរ។ ចចាមអារ៉ាមបានឲ្យដឹងថា Huawei Mate 30 និង Mate 30 Pro នឹងប្រើបន្ទះអេក្រង់ Samsung ជាលើកដំបូងសម្រាប់ត្រកូល Mate។ បុគ្គលិកជាន់ខ្ពស់របស់ Samsung មិនព្រមបញ្ជាក់ ឬប្រកែកនឹងចចាមអារ៉ាមនេះទេ ប៉ុន្តែនិយាយថាក្រុមហ៊ុនខ្លួនបានផ្គត់ផ្គង់គ្រឿងបន្លាស់ឲ្យក្រុមហ៊ុនចិន រាប់ឆ្នាំមកហើយ។
ការប្រកាសអំពីរបាយការណ៍ហិរញ្ញវត្ថុកាលពីថ្មីៗនេះ Samsung បានលើកឡើងអំពីចំនួនលក់ខ្សោយរបស់ត្រកូល Galaxy S10 និងការថយចុះនូវតម្រូវការផលិតផលតម្លៃថ្លៃ។ ជាមួយចំណុចនេះ វាសមហេតុផលដែលក្រុមហ៊ុនប្ដូរពីពឹងផ្អែកលើការលក់ស្មាតហ្វូនរបស់ខ្លួន ងាកមកជួយគូប្រជែងវិញដើម្បីរកប្រាក់ចំណេញ៕
ចុចអាន ៖ បង្ហាញមុខហើយ ស្មាតហ្វូកាមេរ៉ាទំហំ 64MP ដំបូងគេក្នុងលោក