បារ៉ែនធ្លាប់ស៊ីឥណ្ឌូណេស៊ី ១០-០ នៅក្នុងព្រឹត្តិការណ៍ជម្រុះ World Cup ២០១៤

2019-09-08 08:09:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្ពុជានឹងបើកទ្វារទទួលស្វាគមន៍បារ៉ែន នៅថ្ងៃទី១០ខែកញ្ញា។ គេនៅមិនទាន់ភ្លេចនៅឡើយទេ នៅពេលដែលប្រទេសមកពីឧបទ្វីបអារ៉ាប់មួយនេះធ្លាប់បំបាក់ឥណ្ឌូណេស៊ីដែលជាក្រុមខ្លាំងមួយនៅអាស៊ីអាគ្នេយ៍រហូតដល់ទៅ១០ទល់នឹង០ កាលពីខែកុម្ភៈ ឆ្នាំ២០១២ ក្នុងព្រឹត្តិការណ៍ជម្រុះ World Cup សម្រាប់ឆ្នាំ ២០១៤។

មុនការប្រកួត ម្ចាស់ផ្ទះបារ៉ែនដាច់ខាតត្រូវតែស៊ុតឲ្យបានចាប់ពី៩គ្រាប់ ទើបអាចប្រជែងជាមួយកាតា ក្នុងការឡើងលេងជម្រុះជុំបន្ទាប់ ហើយលក្ខខ័ណ្ឌមួយទៀតលុះត្រាណាតែ កាតាត្រូវចាញ់អ៊ីរ៉ង់ទើបបារ៉ែនអាចធានាកៅអីទៅជុំបន្ទាប់។

យ៉ាងណាក្តី នៅនាទីទី៨៣ទៅហើយ កាតាមានលទ្ធភាពវាយបកតាមស្មើអ៊ីរ៉ង់ ចប់ការប្រកួតដោយលទ្ធផល ២-២ បញ្ចប់ក្តីសង្ឃឹមបារ៉ែនដែលប្រឹងស៊ុតបាន១០គ្រាប់ទៅហើយទៅលើឥណ្ឌូណេស៊ី។

ប៉ុន្តែក្រោយមកបន្ទាប់ពីការប្រកួត FIFA បានស៊ើបអង្កេតទៅលើលទ្ធផលខុសប្រក្រតីមួយនេះ ពីព្រោះឆ្លងកាត់ការប្រកួតមុនៗបារ៉ែនមិនដែលមានប្រវត្តិស៊ីឥណ្ឌូណេស៊ីលើសពី២គ្រាប់ទេ។ យ៉ាងណាមិញ គេមិនឃើញមានការរាយការណ៍ណាថា FIFA បានរកឃើញកំហុសពីការស៊ើបអង្កេតនេះឬយ៉ាងណាទេ៕