ជាធម្មតាអំពូលបំភ្លឺរថយន្តមានអាយុកាលជាមធ្យមពី ៥០០ ទៅ ១ ០០០ ម៉ោងប្រើប្រាស់ ដោយនិយាយជារួម។ ប៉ុន្តែ អាយុកាលប្រើប្រាស់នេះ មិនជាស្ថិតស្ថេរតាមការសង្កេតនោះទេ ដោយវាមានកត្តាជំរុញផ្សេងៗគ្នា ដោយកត្តាខ្លះជួយឲ្យអំពូលរថយន្តប្រើប្រាស់បានយូរជាងអាយុកាលប្រើប្រាស់មធ្យម ឯកត្តាខ្លះទៀតធ្វើឲ្យអំពូលឆាប់ខូចលឿនខុសធម្មតាទៅវិញ។

អស់រយៈពេលយូរណាស់មកហើយ ដែលរថយន្តភាគច្រើននៅលើពិភពលោកប្រើប្រាស់អំពូលប្រភេទ Halogen ដែលជាអំពូលប្រើសសៃលោហៈតង់ស្ដែន ដើម្បីបញ្ចេញពន្លឺមកនោះ ហើយវានៅតែបន្តភាពពេញនិយមមកដល់ពេលសព្វថ្ងៃនេះទៀត ព្រោះថាអំពូល Halogen មានតម្លៃថោក និងអាយុកាលប្រើប្រាស់បានល្អគួរសមធៀបទៅនឹងតម្លៃរបស់វា។ ចំណែកឯប្រភេទអំពូលផ្សេងៗទៀតដូចជា Xenon, HID និង LED សុទ្ធតែជាប្រភេទអំពូលស៊េរីថ្មី ដែលមានអាយុកាលប្រើប្រាស់ច្រើនជាងរាប់ដង បើប្រៀបទៅនឹងអំពូល Halogen ប៉ុន្តែបញ្ហាចោទនោះគឺតម្លៃរបស់វា។ អ្នកអាចស្វែងយល់បន្ថែមពី ប្រភេទចង្កៀងបំភ្លឺផ្លូវរបស់រថយន្ត នៅទីនេះបាន។

ខាងក្រោមនេះគឺជាអាយុកាលជាមធ្យមរបស់ប្រភេទ ចង្កៀងបំភ្លឺផ្លូវដែលមានបំពាក់លើរថយន្តសព្វថ្ងៃ៖

• Tungsten-Halogen ៖ មានអាយុកាលប្រើប្រាស់ជាមធ្យមពី ៥០០ ទៅ ១ ០០០ ម៉ោង
• Xenon ៖ មានអាយុកាលប្រើប្រាស់ជាមធ្យម ១០ ០០០ ម៉ោង
• HID ៖ មានអាយុកាលប្រើប្រាស់ជាមធ្យម ២ ០០០ ម៉ោង
• LED ៖ មានអាយុកាលប្រើប្រាស់ជាមធ្យម ៣០ ០០០ ម៉ោង

មូលហេតុនានាដែលអាចនាំឲ្យ អំពូលបំភ្លឺផ្លូវរថយន្តរបស់អ្នកមានអាយុកាលខ្លីជាងធម្មតា មានដូចជា៖

• អំពូល Halogen ដែលភ្លឺខ្លាំងជាងធម្មតា (កាន់តែភ្លឺ កាន់តែឆាប់ខូច)
• ជាតិប្រេងចេញពីស្បែករបស់មនុស្សពេលចាប់កាន់កែវអំពូល ដែលធ្វើឲ្យវាឡើងកម្ដៅខ្លាំងជាងធម្មតា (ពេលចាប់អំពូលដាក់ចូលដំឡើង)
• ទឹក ធូលី និងកម្ទេចកម្ទីនានា ដែលជ្រៀតចូលក្នុងផ្នែកចង្កៀងដែល​បែក​ស្រាំ
• បញ្ហាមកតាំងពីរោងចក្រ (មានធូលី សំណើមនៅក្នុងចង្កៀងស្រាប់)

ចុចអាន៖

• ប៊ូតុងសម្ងាត់​ទាំង ១២ នៅលើរថយន្ត អ្នកបើកបរភាគច្រើនធ្លាប់ឃើញ តែមិនប្រាកដ​បានប្រើប្រាស់
• យានអវកាស​រុស្ស៊ី​ឡើង​ដល់​កណ្ដាល​អាកាស​ ស្រាប់​តែ​​ធ្លាក់​មក​ដី​វិញ

ប្រភព៖ lifewire   ប្រែសម្រួល ៖ ផាត សុវត្ថិ