សរុបព្រឹត្តិការណ៍សំខាន់ៗដែលកើតមានក្នុងពិភព K-Pop នៅឆ្នាំ ២០១៩
- 2019-12-25 05:48:51
- ចំនួនមតិ 0 | ចំនួនចែករំលែក 0
សរុបព្រឹត្តិការណ៍សំខាន់ៗដែលកើតមានក្នុងពិភព K-Pop នៅឆ្នាំ ២០១៩
ចន្លោះមិនឃើញ
ឆ្នាំ ២០១៩ ជាឆ្នាំដែលអាចនិយាយបានថាធ្វើឲ្យវិស័យ K-Pop ឡើងខ្ពស់ ខ្ពស់កប់ពពក និងធ្លាក់ចុះ ធ្លាក់ស្ទើរដល់បាត។ ដោយសារតែមានរឿងរ៉ាវជាច្រើនស្មានមិនដល់ក្នុងរង្វង់សិល្បៈ ចេញពីតារាៗ រហូតបង្កជាភាពភ្ញាក់ផ្អើលស្ទើរនិយាយលែងចេញពីសំណាក់អ្នកគាំទ្រ។ ដូចនេះទៅមើលទាំងអស់គ្នា នូវព្រឹត្តិការណ៍សំខាន់ៗ មានពេលជោគជ័យ និងខ្មៅងងឹតទាំងអស់គ្នា៖
១. ភាពរីកចម្រើនខ្លាំងបំផុតសម្រាប់ K-Pop
និយាយដល់ចំណុចដំបូងនេះ ច្បាស់ណាស់ភាគច្រើននៃអ្នកគាំទ្រ នឹងនឹកដល់ BTS មុនគេ។ ជាការពិត គ្មានអ្វីអាចលាក់បាំងបានទេ ដែលថាក្រុមចម្រៀងបុរសមួយនេះសម្រេចជោគជ័យធំៗផ្ទួនៗច្រើនឆ្នាំជាប់គ្នា ពិសេសនៅឆ្នាំ ២០១៩នេះ BTS កាន់តែងើបមុខបានយ៉ាងអង់អាចលើឆាកសាកល ដោយសារសមិទ្ធផល ដែលពួកគេខិតខំកន្លងមក។ ជាក់ស្ដែង ពេលពួកគេចេញអាល់ប៊ុម "Map Of The Soul: Persona” BTS ក៏ស្រាប់តែមានមុខភ្លាមក្នុងកម្មវិធីដ៏ល្បីប្រចាំអាមេរិក គឺ Saturday Night Live។ វីដេអូបទ "Boy With Luv” ក៏អាចបំបែកកំណត់ត្រាលើ YouTube ប្រចាំពិភពលោក ដោយមានអ្នកចូលមើលដល់ទៅ ៧៨លានដង រយៈពេលត្រឹម ២៤ម៉ោងប៉ុណ្ណោះ។ ក្រៅពីនេះក៏នៅមានការប្រគំតន្ត្រីទេសចរណ៍ធំៗជាច្រើនប្រទេសជុំវិញពិភពលោក ជាហេតុធ្វើឲ្យអ្នកគាំទ្រកាន់តែស្គាល់ពីឥទ្ធិពល BTS កាន់តែច្រើន។
ចំណែក BLACKPINK ឯណេះវិញក៏មិនអន់ ព្រោះថាពួកគេបានក្លាយជាក្រុម K-Pop ដំបូងដែលមានមុខសម្ដែងលើឆាកប្រគំតន្ត្រី Coachella ក៏ដូចជាបំបែកកំណត់ត្រាថ្មីផ្សេងៗ ក្រោយចេញបទ "Kill This Love” ទៀតផង។
ចូលដល់ក្រុម TWICE វិញ បានក្លាយជាក្រុមនារី K-Pop ទី១ដែលមានឱកាសបានសម្ដែងក្នុងពហុកីឡាដ្ឋានដ៏ធំប្រចាំប្រទេសជប៉ុន ដែលពីមុនមកមិនដែលមានក្រុមនារីណាអាចធ្វើបានឡើយ។
ដោយឡែក កាលពីពេលថ្មីៗនេះ Super M ក្រុមដែលមានសមាជិកមកពីក្រុមផ្សេងៗគ្នា ក៏ប្រែមុខមាត់អស្ចារ្យ មានសមត្ថភាពខ្ពស់ឈ្នះតំណែង អាល់ប៊ុមជាប់លេខ១ នៅអាមេរិក តាមរយៈបទចម្រៀងដែលមានចំណងជើងថា "Jopping” ក្រោយបង្ហាញមុខភ្លាម។
២. រឿងអាស្រូវដ៏ខ្មៅងងឹត
ទោះបីជាមានរឿងល្អ ប៉ុន្តែ K-Pop ក៏ត្រូវបាត់ហ្វេនច្រើនដែរ ដោយសាររឿងរ៉ាវល្អក់កករ កើតចេញពីទង្វើរបស់តារា ពិសេសទាក់ទងនឹងរឿងអាស្រូវផ្លូវភេទ ឬគ្រឿងញៀនជាដើម។ ជាក់ស្ដែងដូចក្លឹបកម្សាន្តដែលមានឈ្មោះថា Burning Sun បានក្លាយជាប្រធានបទក្ដៅគគុកពេញពិភព K-Pop ក៏ដូចជាសង្គមកូរ៉េទាំងមូល។ ទាក់ទងនឹងរឿងរ៉ាវផ្លូវភេទ អំពើពេស្យាចារ ការលួចបង្កប់កាមេរ៉ាខុសច្បាប់ ការប្រើប្រាស់គ្រឿងញៀន ករណីគេចពន្ធជាដើម ពិតជាបានធ្វើឲ្យមជ្ឈដ្ឋានទូទៅឈឺក្បាលខ្លាំងបំផុត ម្យ៉ាងរឿងនេះក៏ត្រូវជាប់ពាក់ព័ន្ធនឹងតារាចម្រៀងSeungri រហូតធ្វើឲ្យលោកបង្ខំចិត្តលាឈប់ពីសិល្បៈ, Jung Joon Young ត្រូវតុលាការកាត់ទោសឲ្យជាប់ពន្ធនាគារ ៦ឆ្នាំ និង Choi Jong Hoon ជាប់ទោស ៥ឆ្នាំ។ មួយវិញទៀត ងាកមកស្ថាបនិកផលិតកម្ម YG លោក Yang Hyun Suk វិញត្រូវលាលែងពីតំណែងក្នុងនាមជា CEO ព្រោះតែមានរឿងអាស្រូវជុំវិញខ្លួន។
មិនយូរប៉ុន្មាន B.I (អតីតសមាជិកក្រុម iKON) ក៏ត្រូវគេចោទប្រកាន់ថាប៉ុនប៉ងជួញដូរគ្រឿងញៀនទៀត។ រីឯសមាជិកយិនស៊ិនរបស់ Super Junior គឺ KangIn ក៏បានប្រកាសដែរថា ខ្លួននឹងលាចេញពីក្រុម ដោយសារតែមានបញ្ហាច្រើនករណីងាស្រូវផ្លូវភេទ និងស្រវឹងបើកបរគ្មានទំនួលខុសត្រូវ។
ក្រៅពីនេះក៏នៅមានតារាជាច្រើនទៀត សម្រេចបញ្ចប់វាសនាក្នុងក្រុមដូចជា Hwall ចេញពីក្រុម Boyz, Woojin ចេញពីក្រុម Stray Kids, Wonho ចេញពីក្រុម Monsta X យោងតាមហេតុផលរៀងខ្លួន។
៣. ការបាត់បង់ដ៏ធំរបស់ K-Pop
ហេតុការណ៍ ២ដែលធ្វើឲ្យអ្នកគាំទ្រ K-Pop តក់ស្លុត និងរំជួលចិត្តខ្លាំងជាងគេ គឺមរណភាពរបស់ Sulli និង Goo Hara។ ការបាត់បង់អ្នកទាំង ២បាន ធ្វើឲ្យគ្រប់គ្នាស្ដាយរកពាក្យនិយាយលែងចេញ ព្រោះថាការចាកចេញនេះគ្មានថ្ងៃត្រឡប់ឡើយ។ តាមមតិភាគច្រើនបាននិយាយថា ការសម្រេចចិត្តគិតខ្លីរបស់ Sulli និង Hara ក៏ដោយសារតែពួកគេរងនូវវិបត្តិផ្លូវចិត្តធ្ងន់ធ្ងរ ពិសេសរងនូវការវាយប្រហារចេញពីខមមិនមិនល្អបែបរិះគន់របស់អ្នកដែលមិនចូលចិត្តពួកគេកន្លងមក។
ដោយសារតែហេតុការណ៍ទាំងនេះហើយ ទើបបណ្ដាលឲ្យមានការលើកឡើងច្រើនពីជំងឹបាក់ទឹកចិត្តជុំវិញពិភពលោក។ វាមិនមែនជាជំងឺធម្មតា ហើយទាមទារឲ្យមានការផ្ដល់កម្លាំងចិត្ត ប្រើពាក្យល្អ និងគោរពគ្នាទៅវិញទៅមកឲ្យបានច្រើន៕