រកឃើញ បវរកញ្ញាពិភពលោកដែលបាត់ខ្លួន ត្រូវគេសម្លាប់ទាំងពីរនាក់បងប្អូន

2014-11-20 16:12:11
ចំនួនមតិ 0 | ចំនួនចែករំលែក 0

ចន្លោះមិនឃើញ

បវរកញ្ញាប្រទេសហុងឌុយរ៉ាស់ María José Alvarado អាយុ ១៩ឆ្នាំ និងបងស្រី Sofia អាយុ២៣ឆ្នាំ ដែលបានបាត់ខ្លួនកាលពីសប្ដាហ៍មុន ត្រូវគេរកឃើញថាត្រូវគេសម្លាប់ និងកប់ចោលនៅភាគខាងលិចនៃប្រទេសហុងឌុយរ៉ាស់ កាលពីថ្ងៃពុធ។

តំណាងឲ្យប្រទេសហុងឌុយរ៉ាស់ María José ត្រូវចូលរួមក្នុងកម្មវិធីប្រឡងបវរកញ្ញាពិភពលោកនៅទីក្រុងឡុងដុង សប្ដាហ៍នេះ។ បងប្អូនស្រីទាំងពីរនាក់បានបាត់ខ្លួនប្រហែលមួយសប្ដាហ៍មកហើយ និងត្រូវបានគេឃើញជាលើកចុងក្រោយនៅពេលពួកគេចាកចេញពីពិធីជប់លៀង និងឡើងជិះឡានមួយ នៅទីក្រុង Santa Barbara ប្រទេសហុងឌុយរ៉ាស់ ដែលជាតំបន់ដែលសម្បូរទៅដោយសកម្មភាពក្មេងទំនើង និងអ្នកជក់ថ្នាំ។ នេះបើយោងតាមរបាយការណ៍របស់សារព័ត៌មាន Reuters។

រដ្ឋមន្ត្រីក្រសួងមហាផ្ទៃប្រទេសហុងឌុយរ៉ាស់ លោក Corrales បាននិយាយថាយុវជន Plutarco Ruiz ជាសង្សាររបស់ Sofia គឺជាជនជាប់សង្ស័យក្នុងករណីនេះ ត្រូវបានប៉ូលិសចាប់ខ្លួនកាលពីថ្ងៃអង្គារ។

អ្នករៀបចំកម្មវិធីប្រឡងបវរកញ្ញាពិភពលោក អ្នកស្រី Julia Morley បាននិយាយក្នុងសេចក្ដីថ្លែងការណ៍មួយថា "ពួកយើងពិតជាសោកស្ដាយបំផុតចំពោះការស្លាប់របស់យុវតីទាំងពីររូប។ ពួកយើងសូមចូលរួមរំលែកទុក្ខយ៉ាងក្រៀមក្រំនេះជាមួយក្រុមគ្រួសារ និងមិត្តភ័ក្ដិរបស់ María José Alvarado និង Sofía Trinidad”។

Alvarado គឺជានិស្សិតអាយុ ១៩ឆ្នាំពីសាកលវិទ្យាល័យ Santa Bárbara ប្រទេសហុងឌុយរ៉ាស់។ នាងបានយកឈ្នះបេក្ខនារីចំនួន ១៨នាក់ ក្នុងការប្រកួតបវរកញ្ញាពិភពលោកតំណាងប្រទេសហុងឌុយរ៉ាស់ កាលពីខែមេសា ៕