ទើបរកឃើញ...ភាពយន្តក្នុងអតីតកាលមួយរឿងបានបំបែកឯតទគ្គកម្មមុន"ស្បែកគង់"ទៅទៀត!

2014-11-21 16:50:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តខ្មែរខ្នាតធំមួយរឿងផលិតក្នុងឆ្នាំ២០១៤នេះគឺរឿង "ស្បែកគង់" ត្រូវបានអះអាងដោយផលិតករលោក ប៉ុល វិបូ ហៅ នីត ថាភាពយន្តខ្មែរទី១ដែលអាចឈានទៅកាន់ទីផ្សារបរទេស ក្នុងរយៈពេល៤១ឆ្នាំចុងក្រោយនេះ។ ប៉ុន្តែសំឡឹងទៅជាង១០ឆ្នាំមុន មានភាពយន្តខ្មែរមួយរឿងបានឈានទៅទីផ្សារអន្តរជាតិ មានថៃ ឥណ្ឌា ឥណ្ឌូណេស៊ី ជប៉ុន និងម៉ាឡេស៊ី មុនទៅទៀត។

ឈុតមួយក្នុងរឿង "ចៅពស់កេងកង"

ភាពយន្តនោះ មានចំណងជើងថា "កូនពស់កេងកង" របស់ផលិតកម្មកម្ពុជាភាពយន្ត ដែលបានដាក់បញ្ចាំងនៅឆ្នាំ ២០០០។ លោក ហ្វៃ សំអាង ជាអ្នកនិពន្ធ និងដឹកនាំរឿងនេះ មិនបានអធិប្បាយដោយផ្ទាល់ទេ។ ប៉ុន្តែនៅលើគេហទំព័ររបស់លោក បានសរសេរដូច្នេះ។

តាមគេហទំព័ររបស់លោក ហ្វៃ សំអាង នៅបានឲ្យដឹងទៀតថា "កូនពស់កេងកង" ជាខ្សែភាពយន្តទំហំ ៣៥មីលីម៉ែត្រ ចំណាយថវិកា ១៨ម៉ឺនដុល្លារសហរដ្ឋអាមេរិក និងចំណាយពេលផលិតចំនួន ៩ខែ គឺចាប់ពីពាក់កណ្ដាលឆ្នាំ១៩៩៨ រហូតដល់ដើមឆ្នាំ ១៩៩៩ ទើបចប់។ រឿងនេះ សម្ដែងដោយ វីណៃ ក្រៃបុត្រ តារាសម្ដែងថៃ អ្នកនាង ពេជ្រ ច័ន្ទបូរមី អ្នកនាង អម្ពរ ទេវី លោក ទេព រិនដារ៉ូ អ្នកនាង ដាញ់ ម៉ូនីកា ទឹម អង្គារ៉ា នាយ កុយ អ្នកនាងគ្រត និងតារាល្បីៗជាច្រើនទៀត។

ព័ត៌មានលើគេហទំព័រលោក ហ្វៃ សំអាង

“ចៅពស់កេងកង" ជាខ្សែរឿងត្រូវបានផលិតឡើងក្នុងទសវត្សរ៍ជាមួយគ្នានឹងរឿង "មន្តមាយា" ដែលជាស្នាដៃនិពន្ធ និងដឹកនាំរឿងដោយលោក ហ្វៃ សំអាង ដូចគ្នា។ រឿង "មន្តមាយា" ដែលល្បីល្បាញនៅឆ្នាំ ២០០៦ ត្រូវបានយកបញ្ចាំងសារជាថ្មីអបអរព្រះរាជពិធីបុណ្យអុំទូក អកអំបុក បណ្ដែតប្រទីប និងសំពះព្រះខែ ដែលទើបកន្លងផុតទៅថ្មីៗនេះ។

ដោយឡែករឿង "ចៅពស់កេងកង" មិនទាន់ដឹងថា ផលិតករជាម្ចាស់ផលិតនៃរឿងនេះ គ្រោងយកមកចាក់បញ្ចាំងឡើងវិញឬយ៉ាងណាទេ ខណៈ លោក ហ្វៃ សំអាង មិនអាចភ្ជាប់ទំនាក់ទំនងបាននាព្រឹកនេះ៕

អាន៖ ភាពយន្តដ៏ល្បីកាល ២០០៦ ត្រូវបានយកមកបញ្ចាំងឡើងវិញអបអរព្រះរាជពិធីបុណ្យអុំទូក

ចុះប្រិយមិត្តចង់ទស្សនាភាពយន្តមួយនេះឡើងវិញដែរទេ?

http://youtu.be/vpiYgknV6Co

អត្ថបទ៖ ទារិកា