មង្គល ទីណា និង អេ នីហ្សាម ជួបគ្រោះថ្នាក់ចរាចរណ៍យប់មិញ!

2014-11-21 17:39:20
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្ត Range Rover ពណ៌សបើកបរដោយតារាចម្រៀង មង្គល ទីណា រួមដំណើរជាមួយប្អូនស្រី អេ នីហ្សាម បានជួបគ្រោះថ្នាក់ចរាចរណ៍ កាលពីយប់មិញ នៅក្បែរប្រលានយន្តហោះអន្តរជាតិភ្នំពេញ។ នេះបើតាមព័ត៌មាន ពីប្រភពនៅកន្លែងកើតហេតុ សុំមិនបញ្ចេញឈ្មោះ។

ប្រភពដដែលបញ្ជាក់ថា រថយន្តទំនើបខាងលើបានធ្វើដំណើរតាមផ្លូវសហព័ន្ធរុស្ស៊ី។ លុះមកដល់ទីតាំងខាងមុខ VIP Airport ក៏ស្រាប់តែរេចង្កូតទៅបុកទម្លុះរបាំងដែកចែកទ្រូងផ្លូវ របើកដួលអស់១ផ្ទាំងធំ ប៉ុន្តែមិនមាននរណារងគ្រោះថ្នាក់នោះទេ ខណៈលោកព្យាយាមបើករត់គេច តាមបណ្ដោយផ្លូវដដែលឆ្ពោះទៅកាន់ចោមចៅ។

លោកបានបញ្ជាក់ថា ការធ្វើដំណើរចេញពីកន្លែងកើតហេតុ ទើបបានប្រហែលជា ៣០០ ម៉ែត្រ ប៉ុណ្ណោះ ក៏ស្រាប់តែកង់រថយន្តផ្នែកខាងមុខរបូតចេញ មិនអាចបន្តដំណើរទៅមុខបានទៀតទេ។ ពេលនោះហើយ ទើបគេបានដឹងច្បាស់ថា ជាតារាចម្រៀង មង្គល ទីណា និង ប្អូនស្រី អេនីហ្សាម ។

សមត្ថកិច្ចដដែលរៀបរាប់យ៉ាងដូច្នេះ" ពូកគេបានប្រាប់ខ្ញុំថា ពេលនោះបើកបរបណ្ដើរ និយាយទូរសព្ទបណ្ដើរ ហើយចៃដន្យអីវាជ្រុះពីដៃ ក៏អោនទៅរើសមកវិញ។ ប៉ុន្តែពេលងើបឡើង មិនដឹងទាក់ដៃយ៉ាងម៉េចទេ ក៏រេចង្កូតបុករបាំងផ្លូវតែម្ដងទៅ"។

ទោះបីជាយ៉ាងណា តារាចម្រៀង មង្គល ទីណា ជាបងប្រុសបានប្រាប់ Sabay មុននេះបន្តិចថា រថយន្តRange Rover ពណ៌សរបស់គេពិតជាបានជួបគ្រោះថ្នាក់ចរាចរណ៍ប្រាកដមែន កាលពីយប់មិញ ដែលបណ្ដាលមកពីការធ្វេសប្រហែសបន្តិចបន្តួច។ ហើយលោកជាអ្នកបើកបរ មិនមែនប្អូនស្រីនោះទេ។

មង្គល ទីណា ប្រាប់ថា សមត្ថកិច្ចបានស្ទូចយករថយន្តរបស់លោក ទៅរក្សាទុកនៅស្នងការក្រុងភ្នំពេញតាំងពីយប់មិញ ដើម្បីរង់ចាំការដោះស្រាយនៅរសៀលនេះ។ រូបគេនឹងចេញមុខទទួលខុសត្រូវចំពោះការខូចខាត ដែលបណ្ដាលមកពីគ្រោះថ្នាក់ចរាចរណ៍នេះ៕