ចំណុចអាក្រក់ៗរបស់តារាល្បី ដែលយុវវ័យមិនគួរយកជាគំរូ

2014-11-21 18:10:32
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាល្បីៗ ជាពិសេសតារាចម្រៀងសម័យថ្មី ត្រូវបានចាត់ទុកថាជាបុគ្គលដ៏មានឥទ្ធិពលសម្រាប់ក្មេងៗ និងយុវវ័យ។ ក្រៅពីការចូលចិត្តស្ដាប់បទចម្រៀង និងទស្សនាការសម្ដែងរបស់តារាដែលខ្លួនចូលចិត្ត អ្នកគាំទ្រតែងតែចូលចិត្តតាមដានរាល់សកម្មភាពរបស់ពួកគេ និងធ្វើខ្លួនដូចពួកគេក៏មាន។ ប៉ុន្តែតារាៗមួយចំនួនគឺមិនសក្ដិសមឲ្យយុវវ័យយកធ្វើជាគំរូឡើយ។

យោងតាមគេហទំព័រ Therichest ខាងក្រោមនេះគឺជាតារាចម្រៀង ៧ដួង ដែលយុវវ័យមិនអាចយកធ្វើជា Role Model បាន៖

៧. Paris Hilton ៖មិនគោរពច្បាប់ចរាចរណ៍

តារាចម្រៀង និងសម្ដែងអាមេរិក Paris Hilton បានចាប់ផ្ដើមមានកេរ្តិ៍ឈ្មោះល្បីល្បាញតាមរយៈការបែកធ្លាយវីដេអូសិចកាលពីឆ្នាំ២០០៣ ដែលធ្វើឲ្យនាងចាប់ផ្ដើមលេចមុខក្នុងកម្មវិធីទូរទស្សន៍ និងកម្មវិធីជប់លៀងធំៗជាច្រើនទៀត។ នៅឆ្នាំ២០០៦ នាងត្រូវបានចាប់ខ្លួនដោយសារការបើកបរក្នុងស្ថានភាពស្រវឹង ហើយមួយខែក្រោយមក នាងក៏ត្រូវប៉ូលិសចាប់ខ្លួនម្ដងទៀតដោយសារការបើកបរដោយគ្មានការប្រុងប្រយ័ត្ន។ នៅឆ្នាំ២០០៧ នាងក៏ត្រូវជាប់ពន្ធនាគាររយៈពេល ៤៥ថ្ងៃដោយសារបំពានការព្យួរទោស។ នៅឆ្នាំ២០១០ នាងត្រូវប៉ូលិសចាប់ខ្លួនម្ដងទៀត ដោយសង្ស័យថាមានគ្រឿងញៀនជាប់នឹងខ្លួន។

៦. Rihanna៖ ស្លៀកពាក់សិចស៊ីហួសហេតុ

តារាចម្រៀង Rihanna មិនអាចជាគំរូសម្រាប់នារីទូទៅឡើយបើនិយាយពីរឿងស្លៀកពាក់សិចស៊ី។ ជាការពិត Rihanna ទទួលបានជោគជ័យយ៉ាងធំធេងក្នុងអាជីពរបស់នាង ប៉ុន្តែនាងក៏ទទួលបានការរិះគន់ជាច្រើនដែរ តាមរយៈការលេងស្ទីលចំហល្វែងលើដោយមិនបិទបាំងសូម្បីតែចុងសុដន់។ ទង្វើមួយទៀតដែលនាងធ្វើឲ្យអ្នកគាំទ្រអន់ចិត្ត គឺនៅពេលដែលនាងត្រលប់ទៅស្រឡាញ់ សង្សារចាស់ Chris Brown វិញបន្ទាប់ពីតារាចម្រៀងរូបនេះបានប្រើប្រាស់អំពើហិង្សាមកលើនាងយ៉ាងដំណំ។ Rihanna បាននិយាយអំពីសង្សាររបស់នាងថា "គាត់មិនមែនជាមនុស្សអាក្រក់ដូចអ្នកគ្រប់គ្នាឡើយ"។ ទោះយ៉ាងណា ឥលូវនេះ ទំនាក់ទំនងរបស់ពួកគេបានបញ្ចប់ហើយ។

៥. Miley Cyrus៖ ស្លៀកពាក់សិចស៊ី និងអាកប្បកិរិយាមិនសមរម្យ

ពីក្មេងស្រីធម្មតាម្នាក់ក្លាយជាតារាចម្រៀងកំពូលសិចស៊ី Miley Cyrus បានធ្វើឲ្យពិភពលោកភ្ញាក់ផ្អើលយ៉ាងតាមរយៈអាកប្បកិរិយាប្លែកៗរបស់នាងរយៈពេលជាង ១ឆ្នាំចុងក្រោយនេះ។ Miley បានចាប់ផ្ដើមថតស្រាតដាក់ទស្សនាវដ្ដី និងវីដេអូចម្រៀង "Wrecking Ball” ហើយក្រោយមកព័ត៌មានអាស្រូវ និងមតិរិះគន់បានកើតមានចំពោះរូបនាងជាបន្តបន្ទាប់ ជាពិសេសសម្រាប់កាយវិការ និងសំលៀកបំពាក់សិចស៊ីហួសហេតុ។

៤. Kanye West៖ ចូលចិត្តបង្ករឿង

កាលពីឆ្នាំ២០០៨ តារាចម្រៀង Kanye West ត្រូវបានចាប់ខ្លួនដោយសារមានជម្លោះជាមួយអ្នកថតរូប។ ប៉ុន្មានខែក្រោយមក គេក៏ត្រូវបានចាប់ខ្លួនម្ដងទៀតដោយសារជម្លោះជាមួយអ្នកប្រមាញ់រូបថតដូចគ្នា។ ក្រៅពីការវាយតប់ជាមួយអ្នកថតរូប Kanye West ក៏ធ្លាប់មានរឿងជាច្រើនដែរ នៅក្នុងកម្មវិធីទទួលពានរង្វាន់ផ្សេងៗ ដូចជាការបំបាក់មុខតារាចម្រៀង Taylor Swift លើឆាក VMAs កាលពីឆ្នាំ២០០៩ជាដើម។

៣. Lil Wayne៖ ប្រើគ្រឿងញៀន មានគ្រួសារច្រើន

តារាចម្រៀងរ៉េបរូបនេះ ត្រូវប៉ូលិសចាប់ខ្លួនជាច្រើនដង ភាគច្រើនដោយសារមានថ្នាំញៀនជាប់នឹងខ្លួន។ នៅឆ្នាំ២០០៧ ប៉ូលិសទីក្រុងញីវយ៉កបានឃើញ Lil Wayne ជក់ថ្នាំក្បែរឡាន និងមានកាំភ្លើងជាប់នឹងខ្លួនទៀត។ នៅឆ្នាំ២០១០ គេក៏ត្រូវកាត់ទោសឲ្យជាប់គុក ៨ខែនៅលើកោះ Rikers។ Wayne មានកូន ៤នាក់ ជាមួយស្រ្តីបួននាក់ខុសៗគ្នា។ ក្នុងរយៈពេលតែមួយឆ្នាំ តារាចម្រៀងរូបនេះក្លាយជាឪពុករបស់កូនដល់ទៅ៣នាក់ ដោយមានម្ដាយខុសៗគ្នាទាំង៣។

២. Justin Bieber៖ ចូលចិត្តបង្កចលាចលក្នុងសង្គម

នៅពេលចូលសិល្បៈដំបូង Justin Bieber ត្រូវបានគេស្គាល់ថាជាក្មេងប្រុសល្អម្នាក់ ប៉ុន្តែពេលធំឡើងតារាចម្រៀងម្ចាស់បទ "Baby” រូបនេះក៏ក្លាយជាបុគ្គលម្នាក់ដែលចូលចិត្តបង្ករឿងក្នុងសង្គមទៅវិញ។ កាលពីខែមករា ឆ្នាំ២០១៤ Bieber ត្រូវបានប៉ូលិសចាប់ខ្លួនពីបទបំផ្លាញទ្រព្យសម្បត្តិសាធារណៈ។ មិនបានប៉ុន្មាន គេក៏បានគប់ពងទាទៅលើផ្ទះអ្នកជិតខាង នាំឲ្យខូចខាតទ្រព្យសម្បត្តិរបស់គេគិតជាទឹកប្រាក់ខ្ទង់រាប់ម៉ឺនដុល្លារ។ នៅខែកញ្ញា Bieber ក៏ត្រូវចាប់ខ្លួនម្ដងទៀតដោយសារការវាយតប់ និងការបើកបរហួសល្បឿនកំណត់។

១. Chris Brown៖ ប្រើអំពើហិង្សា

តារាចម្រៀង និងសម្ដែងរូបនេះបានលេចលើទំព័រមុខនៃសារព័ត៌មានជាច្រើនកាលពីឆ្នាំ២០០៩ នៅពេលដែលគេបានប្រើអំពើហិង្សាលើសង្សារគឺតារាចម្រៀង Rihanna។ Chris Brown ត្រូវជាប់ការព្យួរទោសសាកល្បង (Probation) ចំនួន៥ឆ្នាំ និងត្រូវធ្វើការងារសហគមន៍មួយចំនួន។ ក្រៅពីការប្រើអំពើហិង្សាលើមិត្តស្រី Chris Brown ក៏ធ្លាប់មានជម្លោះ វាយតប់ជាមួយមិត្តរួមអាជីពមួយចំនួនដែរ ដូចជាតារាចម្រៀង Drake និង Frank Ocean និងធ្លាប់ចូលមណ្ឌលអប់រំកែប្រែផងដែរ ៕

អានអត្ថបទ៖ តារាស្រីល្បីៗ ៩ដួង មានគូស្នេហ៍ជាប្រុសក្មេង អាយុខុសគ្នាឆ្ងាយ

ប្រែសម្រួល៖ វ៉ាន់ថន ប្រភព៖ therichest