ការស្រាវជ្រាវបង្ហាញថា ការឈ្ងោកចុចទូរសព្ទយូរនាំឲ្យខូចឆ្អឹងកញ្ចឹងក

2014-11-22 00:09:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាគច្រើនពេលដែលចុចទូរសព្ទម្ដងៗ អ្នកតែងតែឱនក្បាលចុះដោយមិនខ្វល់ពីអ្វីទាំងអស់។ អ្នកខ្លះចូលចិត្តអង្គុយចុចទូរសព្ទ ហើយអ្នកខ្លះទៀតឈរចុច និងឱនក្បាលចុះជាទម្រង់ពី ១៥ទៅ ៦០ដឺក្រេ។ តើអ្នកមានធ្លាប់គិតដែរទេថា ពេលដែលអ្នកឈ្ងោកក្បាលចុចទូរសព្ទនោះ តើនឹងមានផលប៉ះពាល់អ្វីខ្លះដល់ឆ្អឹងកញ្ចឹងករបស់អ្នក?

តាមការសិក្សារបស់វេជ្ជបណ្ឌិតជំនាញផ្នែកឆ្អឹងខ្នង Kenneth Hansraj បានឲ្យដឹងថាការឱនក្បាលចុចទូរសព្ទជាទម្រង់ ៦០ដឺក្រេរយៈពេលយូរ វាហាក់បីដូចជាអ្នកកំពុងតែដាក់វត្ថុទម្ងន់ធ្ងន់ស្មើនឹង ២៧គីឡូក្រាមទៅលើកញ្ចឹងករបស់អ្នកអញ្ចឹង ហើយវានឹងធ្វើឲ្យកញ្ចឹងករបស់អ្នកចុករោយ និងកាន់តែទ្រុឌទ្រោមឡើងៗ។

Hansraj បានបង្កើតរូបភាពគំរូអំពីការឈ្ងោកចុចទូរសព្ទជាច្រើនទម្រង់ដូចជា ១៥ដឺក្រេ ៣០ដឺក្រេ ៤៥ដឺក្រេ និង ៦០ដឺក្រេ ដែលទម្រង់ទាំងអស់នេះហើយបានដាក់សម្ពាធយ៉ាងខ្លាំងទៅលើកញ្ចឹងករបស់អ្នក។ វាអាចនឹងមានរឿងមិនល្អកើតឡើងចំពោះកញ្ចឹងករបស់អ្នក (ដូចជាការផ្លាស់ប្ដូរទ្រង់ទ្រាយឆ្អឹងកញ្ចឹងក កើតស្រ្តេសញឹកញាប់ និងឈឺក្បាលរ៉ាំរ៉ៃ) ពេលដែលអ្នកតែងតែឈ្ងោកក្បាលចុះចុចទូរសព្ទរាល់ថ្ងៃ។ នេះបើតាមការបញ្ជាក់បន្ថែមពីលោកវេជ្ជបណ្ឌិតHansraj។

រូបភាពគំរូពីការឈ្ងោកចុចទូរសព្ទទៅតាមទម្រង់ខុសៗគ្នា

វេជ្ជបណ្ឌិតដដែលក៏បានផ្ដល់ដំបូន្មានដល់អ្នកប្រើប្រាស់ទូរសព្ទនិងអ្នកដែលតែងតែអង្គុយសម្លឹងមើលអេក្រង់កុំព្យូទ័រពេញមួយថ្ងៃទាំងអស់ថា ពេលដែលអ្នកចុចទូរសព្ទឬអង្គុយនៅនឹងមុខអេក្រង់កុំព្យូទ័រ ត្រូវប្រាកដថាក្បាល កញ្ចឹងក និងខ្នងរបស់អ្នកត្រង់។ មួយវិញទៀតត្រូវសម្រាកឬងាកមុខចេញពីអេក្រង់ទូរសព្ទឬកុំព្យូទ័រឲ្យបានញឹកញាប់ នោះទើបកញ្ចឹងក និងឆ្អឹងខ្នងរបស់អ្នកមិនមានផលប៉ះពាល់ និងឆាប់ទ្រុឌទ្រោម៕