ផ្ទុះសង្គ្រាមពាក្យសំដី រវាង វ៉ន វីវ៉ា និង សេន ប៊ុនថេន ល្បីពេញ Facebook
- 2014-11-23 16:21:13
- ចំនួនមតិ 0 | ចំនួនចែករំលែក 0
ផ្ទុះសង្គ្រាមពាក្យសំដី រវាង វ៉ន វីវ៉ា និង សេន ប៊ុនថេន ល្បីពេញ Facebook
ចន្លោះមិនឃើញ
ម្ចាស់ខ្សែក្រវាត់ ISKA ពិភពលោក វ៉ន វីវ៉ា ដែលទើបរៀបអាពាហ៍ពិពាហ៍បាន២ថ្ងៃ និងកីឡាករ សេន ប៊ុនថេន បានកំពុងបង្កសង្គ្រាមពាក្យសំដីឌឺដងដាក់គ្នាតាមរយៈបណ្តាញសង្គម Facebook យ៉ាងក្តៅគគុកកាលពីយប់មិញពោលគឺបន្ទាប់ពី សេន ប៊ុនថេន បានបរាជ័យនៅ Thai Fight។
បន្ទាប់ពី សេន ប៊ុនថេន បរាជ័យនៅ Thai Fight ដោយស្នាដៃកីឡាករបារាំង Antone Pinto ជាលើកទីពីរកាលពីយប់មិញ អ្នកប្រដាល់ វ៉ន វីវ៉ា ដែលទើបរៀបមង្គលការរួចកាលពីថ្ងៃទី២២កន្លងទៅ និងជាកីឡាករម្នាក់ដែលមានភាពស្ងប់ស្ងាត់នោះបែរជាសរសេរលើទំព័រ Facebook ឈ្មោះ Viva Vorn បានសរសេរថា ៖«ចាស់ថាកុំអួតពេក ចាញ់គឺវាអញ្ចឹង ហាហា ខ្លាំងទៀតទៅអាប្អូន! ស្តាយណាស់ បើដឹងថាឯងអញ្ចឹងនោះ បងមិនទុកឲ្យបាន៥ទឹកទេ។ ៤ទឹកមិនទាន់ទេគឺអាប្អូនសុំបង (កុំវ៉ៃពេក ជួយគ្នាឲ្យបានចប់ទឹកផង នេះជាពាក្យរបស់ សេន ប៊ុនថេន) សុំទោសបងប្អូន ខ្ញុំមិនគួរនិយាយពាក្យទាំងនេះទេ តែគាត់ធ្លាប់ថាឲ្យរូបខ្ញុំខ្លាំងៗពេក (ឥឡូវខ្ញ្ញុំចង់ឲ្យ សេន ប៊ុនថេន បានលឺថា ខ្ញុំនេះនិយាយពិតឬទេ? ចេញពីមាត់របស់គាត់) អ្នកចង់ដាក់ ៨០០០$ មក សម្រាប់អ្នកឈ្នះតែ៨០$ សម្រាប់អ្នកចាញ់ ហ៊ានទេ (សម្រាប់អ្នកពូកែនិយាយថាឲ្យគេនោះ»។
សេន ប៊ុនថេន បានឆ្លើយតបវិញថា ៖«ម្ចាស់ខ្សែក្រវាត់ ISKA ដូចជាចេះដឹងគួរសមដែរ ឯឈ្មោះក៏ល្បី ចុះហេតុអីបានជាសំដីចេញមកដូចជាមនុស្សមិនដែលចូលសាលា.... ខ្ញុំដូចជាមិនព្រឺក្នុងរឿងនេះដែរ។ បើខ្លួនឯងគ្រាន់បើមែននោះ ហ៊ានដាក់ខ្សែក្រវាត់ ISKA ដែលមួយជីវិតបានតែមួយនេះទេ? បើហ៊ានដាក់ថ្ងៃកំណត់នៅឆ្នាំ២០១៥ ខ្ញុំស្វាគមន៍ម្ចាស់ខ្សែក្រវាត់ ISKA ជានិច្ច។ ខ្ញុំឲ្យដាក់ពេលកំណត់នេះ ពីព្រោះខ្ញុំមានកម្មវិធីប្រកួតនៅក្រៅប្រទេសច្រើនដែលគេមករកខ្ញុំ ព្រោះថា ខ្ញុំបាទ សេន ប៊ុនថេន មិនមែនជាកង្កែបក្នុងអណ្តូងដូចម្ចាស់ខ្សែក្រវាត់ ISKA ទេ»។
សង្គ្រាមពាក្យសំដីឌឺដងដាក់គ្នានេះទំនងជាកើតយូរហើយសម្រាប់អ្នកទាំងពីរ ប៉ុន្តែមិនដែលផ្ទុះឡើងឡើយដោយសារ វ៉ន វីវ៉ាជាមនុស្សស្ងប់ស្ងាត់ និងរងចាំឱកាសដើម្បីវាយបកតែម្តង។ ជាក់ស្តែង បន្ទាប់ពី សេន ប៊ុនថេន ចាញ់ភ្លាមកាលពីយប់មិញ វ៉ន វីវ៉ា បានសរសេរឌឺភ្លាម។
ពាក្យព័ន្ធនឹងការប៉ះទង្គិចពាក្យសំដីខាងលើនេះ Sabay មិនអាចទាក់ទងសុំការបញ្ជាក់បានទេពីសាមីខ្លួនទាំងសង្ខាងដោយម្នាក់កំពុងចំពេលវេលាក្រេបច័ន្ទទឹកឃ្មុំ និងម្នាក់ទៀតកំពុងនៅប្រទេសថៃនៅឡើយ។
ការឌឺដងដាក់គ្នានេះពិតជាធ្វើឲ្យពិភពប្រដាល់ក្បាច់គុនបុរាណខ្មែរ ជាពិសេសអ្នកគំាទ្ររវាងកីឡាករទាំងពីរចាប់អារម្មណ៍មិនស្ទើរទេតាមបណ្តាញទំនាក់ទំនងសង្គម Facebook។ អ្នកគាំទ្រនឹងទន្ទឹងរង់ចាំមើលថា តើអ្នកទាំងពីរអាចនឹងជួបគ្នាលើសង្វៀនដើម្បីជម្រះបញ្ជីទេ?
នេះជាសំដីឆ្លើយឆ្លងគ្នារវាង សេន ប៊ុនថេន និង វ៉ន វីវ៉ា
អត្ថបទ៖ ជាន ចាន់រ៉ា