អាយុ៨ឆ្នាំសោះ រកលុយបានជាង ១លានដុល្លារក្នុងមួយឆ្នាំ

2014-09-25 23:39:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្មេងតូចរាងសង្ហាម្នាក់ឈ្មោះ Evan ដែលមានអាយុទើប ៨ឆ្នាំ អាចរកប្រាក់បានដល់ទៅ ១,៣លានដុល្លារក្នុងមួយឆ្នាំ។

ការងារដែលក្មេងតូចនេះធ្វើគឺគ្រាន់តែថតសកម្មភាពដែលខ្លួនលេងកម្សាន្ត ហើយបង្ហោះចូលក្នុងប៉ុស្តិ៍ YouTube មួយឈ្មោះថា EvanTubeHD ដែលមានអ្នកទស្សនាជាមធ្យម ១លាននាក់។ ដើមចមដំបូងដែលធ្វើឲ្យ Evan មានភាពជោគជ័យរហូតដល់រកប្រាក់វាល់លានទាំងនៅក្មេងខ្ចីនេះ គឺកើតចេញពីគម្រោងកម្សាន្តពីរនាក់ឪពុកកូនប៉ុណ្ណោះ។

Evan និងឪពុក បានបង្កើតវីដេអូបង្ហាញពីរូប Angry Birds ធ្វើពីដីឥដ្ឋ និងធ្វើឲ្យវាមានចលនា រួចបង្ហោះចូល YouTube។ ក្រោយមកវីដេអូនោះ បានទទួលការពេញនិយមយ៉ាងខ្លាំង និងមានអ្នកទស្សនារហូតដល់ ១ លានដង។ បន្ទាប់ពីមានអ្នកគាំទ្រច្រើន ការកម្សាន្តរបស់ Evan បានក្លាយទៅជាជំនួញដ៏ធំមួយ តាមរយៈការសម្ដែង និងបង្ហោះចូលក្នុងប៉ុស្តិ៍ YouTube មានឈ្មោះថា EvanTubeHD។ ការទាក់ទាញអ្នកទស្សនាយ៉ាងច្រើនជាប្រចាំ បានធ្វើឲ្យ Evan ទទួលចំណូលពីការផ្សាយពាណិជ្ជកម្មក្នុងវីដេអូកម្សាន្តរបស់ខ្លួន។

ទោះជាល្បីដល់អាចរកលុយច្រើនបែបនេះក្ដី ក៏ Evan នៅតែមានជីវិតរស់នៅសាមញ្ញដូចក្មេងដទៃទៀតដែរ ហើយប្រហែលជាមិនដឹងថាខ្លួនកំពុងល្បីបែបនេះផង។ Evan នៅតែទៅរៀននៅសាលា ធ្វើកិច្ចការផ្ទះ ហាត់ការ៉ាតេដូ និងដើរលេងជាមួយមិត្តភ័ក្ដិជាធម្មតា។

ឪពុករបស់ Evan ដែលជាប្រធានក្រុមហ៊ុនថតរូប និងផលិតវីដេអូបាននិយាយថា លោក និងភរិយា ចង់រក្សាជីវិត Evan ក្នុងលក្ខណៈសាមញ្ញតាមដែលអាចធ្វើទៅបាន ដូច្នេះហើយទើបពួកគេមិនបង្ហាញព័ត៌មានផ្ទាល់ខ្លួនច្រើននៅក្នុងវីដេអូ។

ក្រៅពី EvanTubeHD គ្រួសាររបស់ Evan នៅមានប៉ុស្តិ៍ YouTube ២ ផ្សេងទៀតគឺ EvanTubeRaw ដែលបង្ហាញពីឈុតក្រៅឆាក និង EvanTubeGaming ដែលបង្ហាញពីឪពុកកូនអធិប្បាយហ្គេម និងលេងហ្គេមកម្សាន្ត។ សូមទស្សនាវីដេអូដែលក្មេងតូចសម្ដែងរកប្រាក់បានខ្ទង់លានដុល្លារ៖

http://youtu.be/YiVvxKyjvGA

ប្រែសម្រួល៖ គង់ វិសាល ប្រភព៖ odditycentral