រំជើបរំជួល! តូចនិងក្មេងជាងគេ តើយុវតីខ្មែរអាចឈ្នះពានពិភពលោកបានអត់?

2014-11-28 18:11:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាដំណាក់កាលរំជើបរំជួល កំពុងចាំអ៊ុតថាតើយុវតីខ្មែរ ប៉ែន សុខអាន ដែលតំណាងតំបន់អាស៊ីប៉ាស៊ីហ្វិកទាំងមូល នឹងឈ្នះពានពិភពលោកនៃការប្រកួត វោហារសព្ទ លើបេក្ខជនដៃគូផ្ដាច់ព្រ័ត្រមកពី អាមេរិក អឺរ៉ុប និងអាហ្វ្រិក ដែរឬយ៉ាងណា នៅពេលដែលលទ្ធផលនឹងទម្លាយនៅថ្ងៃសុក្រទី ២៨វិច្ឆិកានេះ ក្នុងសន្និបាតប្រចាំឆ្នាំរបស់បណ្ដាញសភាយុវពាណិជ្ជករអន្តរជាតិ (JCI) ទូទាំងពិភពលោក ដែលមានឈ្មោះថា 2014 JCI World Congress នៅក្រុង Leipzig ប្រទេស អាឡឺម៉ង់។

មុនពេលទៅដល់ឆាកពិភពលោកមិនធ្លាប់មានសម្រាប់យុវជនខ្មែរ ប៉ែន សុខអាន កាលខែមេសាជាជើងឯកថ្នាក់ជាតិនៃការប្រកួតវោហារសព្ទជាសាធារណៈ ដែលរៀបចំដោយ JCI កម្ពុជាសាខាចតុមុខ។ រួច សុខអាន វ័យ១៨ឆ្នាំក៏បន្តទៅកាន់ការប្រកួតថ្នាក់តំបន់នៅ JCI Asia Pacific Conference នៅប្រទេសជប៉ុន រហូតក្លាយជាម្ចាស់ពានប្រចាំតំបន់អាស៊ីប៉ាស៊ីហ្វិក ដោយការផ្ដួលយុវជនពីប្រទេសផ្សេងៗដូចជា ម្ចាស់ផ្ទះជប៉ុន ម៉ុងហ្គោលី ម៉ាឡេស៊ី ហ្វីលីពីន និង ឥណ្ឌា ជាដើម។

វិលមកវេទិកាប្រជែងថ្វីមាត់ជាភាសាអង់គ្លេស ដណ្ដើមពានរង្វាន់ពិភពលោក (World Public Speaking Championship) ដែលស្ថិតក្នុងការវាយតម្លៃ និងហៀបនឹងប្រកាសជយលាភីនេះវិញ ធ្វើឡើងក្រោមប្រធានបទ « The greatest global movements have Been ignited by one Visionary Individual» ឬ «ចលនាសកលដ៏អស្ចារ្យ កើតឡើងពីសកម្មភាពនៃចក្ខុវិស័យរបស់បុគ្គលម្នាក់ៗ»។

អ្នកស្រី ជា សុខលាង ប្រធានសភាយុវពាណិជ្ជករអន្តរជាតិកម្ពុជា JCI សាខាចតុម្មុខ ដែលជាស្ថាប័នរៀបចំចម្រាញ់រកយុវជនឆ្នើម នៃការប្រកួត តស៊ូមតិនិងវោហារសព្ទ តាំងពីថ្នាក់ជាតិ រហូតដឹកនាំទៅប្រជែងថ្នាក់តំបន់ និងពិភពលោកទៀតនោះ មិនបានវាយតម្លៃក្ដីសង្ឃឹមគ្រងពាន ពិភពលោក របស់យុវតីខ្មែរ មានច្រើនប៉ុណ្ណាទេ តែថាវាជាឆាកថ្វីមាត់ដ៏តានតឹង។

ប៉ែន សុខអាន របស់កម្ពុជាដែលតំណាង អាស៊ីប៉ាស៊ីហ្វិក មានអាយុតិច បើធៀបនឹងបេក្ខជន៣រូបទៀតដែលជាជើងឯកមកពី អឺរ៉ុប អាមេរិក និងអាហ្វ្រិក ដែលសុទ្ធតែមានវ័យច្រើននិងបទពិសោធន៍ការងារចាស់ទុំ ខុសពី ប៉ែន សុខអាន កម្ពុជាដែលកំពុងរៀនថ្នាក់មធ្យមសិក្សានៅឡើយ។

ប៉ែន សុខអាន និងគូប្រជែងពានពិភពលោក

ប៉ុន្តែអ្នកស្រី ជា សុខលាង ក៏លើកឡើងថានេះជាវេទិកាបើកមុខមាត់និងកិត្តិយសកម្ពុជា ដែលមានយុវជនឆ្នើមឡើងទៅកាន់ការប្រកួតសមត្ថភាពដ៏កំពូលនេះ។ អ្នកស្រីបន្តថា៖ "វាបានបង្ហាញពិភពលោកជាចំហថាយុវជនខ្មែរតូចក្មេង តែសមត្ថភាពមិនក្មេងឡើយ ហើយវាជាប្រវត្តិសាស្ត្រដំបូងដែលយើងបញ្ជូនយុវជនយើងទៅកាន់ ឆាកពិភពលោក។ ពីមុនយើងធ្លាប់តែប្រកួតត្រឹមថ្នាក់តំបន់"។

រង់ចាំអ៊ុតទាំងអស់គ្នាមើល តើយុវតីខ្មែរ នឹងឈ្នះពាន ថ្វីមាត់ ពិភពលោកជាប្រវត្តិសាស្ត្រឬយ៉ាងណា?

អត្ថបទ៖ ប៉ែន សុផាន់ណា រូបភាព៖ JCI Cambodia 