ផលិតករមកពី ៦ផលិតកម្មជជែកពិភាក្សាពីបញ្ហាប្រឈមនឹងការផលិតកុន
- 2014-12-02 01:16:43
- ចំនួនមតិ 0 | ចំនួនចែករំលែក 0
ផលិតករមកពី ៦ផលិតកម្មជជែកពិភាក្សាពីបញ្ហាប្រឈមនឹងការផលិតកុន
ចន្លោះមិនឃើញ
ផលិតករមកពី ៦ផលិតកម្មផ្សេងគ្នា បានចូលរួមជជែកពិភាក្សាគ្នាពីបញ្ហាប្រឈមនានា ក្នុងការផលិតខ្សែភាពយន្តខ្មែរនាពេលបច្ចុប្បន្ន នៅស្នាក់ការផលិតកម្ម LD Picture រសៀលនេះ។ ផលិតកម្មទាំង ៦នោះមានដូចជា LD Picture មហាហង្ស Angkor Picture ភូមិពេជ្រភាពយន្ត Rock និង 391 Film ។
ការជជែកពិភាក្សាគ្នារយៈពេលជាង ២ម៉ោង ជាលទ្ធផលតំណាងផលិតទាំង៦ខាងលើបានសម្រេចចំណុចជារួម៣ដើម្បីដាក់ស្នើទៅក្រសួងវប្បធម៌ និងវិចិត្រសិល្បៈ ក៏ដូចជាផលិតករដទៃទៀត។
ចំណុចរួមទាំងបីនោះមានដូចជា ទី១ ការកំណត់ពន្ធ ១០ភាគរយ ទី២ ការបែងចែករវាងផលិតករ និងរោងកុន ៥០ និង៤០ ទី៣ ការកែលម្អសមាគមភាពយន្ត។ ផលិតករ និងជាចាងហ្វាងផលិតកម្ម Angkor Picture លោក ប៉ុល វិបូ ហៅនីត លើកឡើងថាការផលិតភាពយន្តនាពេលបច្ចុប្បន្នផលិតករជួបឧបសគ្គជាច្រើន ជាពិសេសចំណុចទាំងបីខាងលើ។ លោក ប៉ុល វិបូ បញ្ជាក់ថា៖"យើងដឹងស្រាប់ហើយផលិតករយើងសព្វថ្ងៃនៅបែកខ្ញែកគ្នាខ្លាំង ហើយឧបសគ្គជាច្រើនកើតឡើងដូចៗ តែមិនរួមគ្នាជាធ្លុងមួយដើម្បីដោះស្រាយ។ ដូច្នេះថ្ងៃនេះពួកយើងចង់រួមគ្នាជាគំនិតមួយដើម្បីស្នើឱ្យរដ្ឋាភិបាលជួយដោះស្រាយ"។
ដោយឡែកលោក លៀក លីដា ជាចាងហ្វាងផលិតកម្ម LD Picture ជាអ្នកផ្ដួចផ្ដើមគំនិតនេះឡើយ បាននិយាយថា ការជួបជុំគ្នាថ្ងៃនេះ ដោយមាន៣ចំណុចគ្រោងនឹងយកទៅពិភាក្សាជាមួយក្រសួង ក៏ដូចជាផលិតករដទៃ មិនទាន់ដឹងលទ្ធផលយ៉ាងណានៅឡើងទេ។ ប៉ុន្តែតាមការសម្រេចពីអង្គប្រជុំផលិតករគ្រប់រូបសង្ឃឹមថា នឹងអាចមានច្រកមួយចេញរួចក្នុងការធ្វើឱ្យផលិតករនានាមានកម្លាំងចិត្តក្នុងការផលិតខ្សែភាពយន្តតទៅទៀត។ ផលិតករវ័យក្មេងរូបនេះបញ្ជាក់ថា៖"បើយើងម្នាក់ៗអង្គុយនៅស្ងៀមបែបនេះមិនកើតទេ យើងត្រូវគ្នាគិតដើម្បីរកវិធីណាមួយល្អប្រសើរជាងនេះ ទើបជីវិតជាអ្នកផលិតកុនដូចពួកយើងមានសង្ឃឹមទៅថ្ងៃខាងមុខ"។
រីឯលោក ដើង ពុទ្ធពណ៌ ចាងហ្វាងផលិត ភូមិពេជ្រភាពយន្ត បានគាំទ្រចំណុចទាំងបីខាងលើក្នុងការយកទៅជជែកពិភាក្សាជាមួយក្រសួងវប្បធម៌ រួមនឹងផលិតករផ្សេងទៀត។ ក្នុងចំណោមចំណុចទាំងបីខាងលើអ្វីដែលលោកចាំអារម្មណ៍បំផុតគឺការយកពន្ធ ១០ភាគពីរាជរដ្ឋាភិបាល ធ្វើឱ្យផលិតករនានារារែកក្នុងការផលិតកុនមួយឱ្យមានកម្រិតស្តង់ដារ។ លោកបានបញ្ជាក់ដូច្នេះថា៖"យើងដឹងហើយផលិតករម្នាក់ពួកគាត់ពុះពារណាស់ក្នុងការផលិតកុន ព្រោះឧបសគ្គជាច្រើនបានរារាំង តែរដ្ឋាភិបាលមិនព្រមកាត់ពន្ធពីរោងកុនតែ បែរជាមកកាត់ពីផលិតករ។ នេះជាអ្វីខ្ញុំចង់និយាយបំផុតពេលប្រជុំថ្ងៃមុខ"។
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
