ថន លក្ខិណា ដើរលុកលុយស្ថានីយទូរទស្សន៍ជាច្រើននៅថៃ

2014-12-02 17:17:57
ចំនួនមតិ 0 | ចំនួនចែករំលែក 0

ចន្លោះមិនឃើញ

អស់ពេលជិត១សប្ដាហ៍កញ្ញា ថន លក្ខិណា តារាសម្ដែង ដើរម៉ូដ និងជាពិធីការិនីទូរទស្សន៍ CTN បានដើរចូលស្ថានីយទូរទស្សន៍ថៃជាច្រើន ក្នុងបេសកកម្មផ្សព្វផ្សាយភាពយន្តខ្នាតធំរបស់នាង "The Return” ដែលនាងសម្ដែងគូជាមួយតួឯកប្រុសរបស់ប្រទេសនេះ។

បេសកកម្មនេះ លក្ខិណា ប្រាប់ថា ក្នុងមួយថ្ងៃ យ៉ាងហោចណាស់២-៣ស្ថានីយទូរទស្សន៍របស់ថៃ ដែលនាង និងក្រុមការងារក្នុងរឿង "The Return” បានទៅដល់។ "មួយថ្ងៃ ហោចណាស់ក៏ពីរបីស្ថានីយដែរបង...បើសរុបទៅ ម៉ារួចរាល់ប្រមាណជាជិត១០ស្ថានីយដែរ តែខ្ញុំអត់ចាំថាស្ថានីយអីខ្លះទេ ព្រោះស្ថានីយទូរទស្សន៍ស្រុកគេច្រើនណាស់បង ចាំជាងគេតែប៉ុស្តិ៍លេខ៧ ដែលខ្មែរយើងភាគច្រើនស្គាល់។ម្យ៉ាងទៀត ប៉ុស្តិ៍បានផ្សាយផ្ទាល់ពីពួកនាងខ្ញុំផង"។

កញ្ញា ថន លក្ខិណា បានចាកចេញពីប្រទេសកម្ពុជាកាលពីថ្ងៃទី ២៣ វិច្ឆិកា ឆ្ពោះទៅប្រទេសថៃ។ នេះជាដំណើរលើកទី២របស់នាងទៅប្រទេសនេះ ដើម្បីផ្សព្វផ្សាយភាពយន្តខ្នាតធំដែលចូលរួមស្ដែងដោយតារា៤ប្រទេស(ខ្មែរ ថៃ ឡាវ និង មីយ៉ាន់ម៉ា)។ "The Return” ត្រូវបានសារព័ត៌មានជាច្រើនក្នុងប្រទេសថៃ ចុះផ្សាយថា ជាភាពយន្តបើកទំព័រសមាហរណកម្មអាស៊ាន ២០១៥។

តារាស្រីមានកំណើតនៅខេត្តកោះកុងរូបនេះ ថ្លែងថា នាងសប្បាយរីករាយ និងមោទនភាពមែនទែន។ “នេះជាបទពិសោធន៍ថ្មីសម្រាប់នាងខ្ញុំ...និយាយទៅ លើកនេះសប្បាយណាស់ ទី១បានចូលស្គាល់ស្ថានីយទូរទស្សន៍ និងជួបជាមួយតារាល្បីគេជាច្រើន។ ទី២ទៀត រឹតតែមានមោទនភាព ពេលពិធីករគេតែងនិយាយថា ថន លក្ខិណា តារាតំណាងកម្ពុជាៗ...ស្ដាប់ទៅគួរឲ្យមោទនភាពណាស់!”។

ពិធីការិនីកម្មវិធីសំណើចតាមភូមិរូបនេះ ប្រាប់បន្តថា រៀងរាល់ពេលចូលកម្មវិធីរបស់ទូរទស្សន៍ថៃ គ្រប់ពេលគឺនាងស្លៀកពាក់ជារបៀបប្រពៃណីខ្មែរ ហើយការពិភាក្សាតែងផ្ដើម និងបញ្ចប់ដោយភាសាខ្មែរ។ "ពេលជម្រាបសួរ និងជម្រាបលាខ្ញុំសំពះ និងនិយាយភាសាយើង តែក្នុងកិច្ចសន្ទនា ខ្ញុំនិយាយថៃ ព្រោះពេលខ្លី មិនអាចនិយាយផងបកប្រែផងទាន់ទេ"។

កញ្ញា ថន លក្ខិណា បានមកដល់ប្រទេសកម្ពុជាវិញកាលពីថ្ងៃទី ២៩ វិច្ឆិកា។ ប៉ុន្តែនាងប្រាប់ថា នឹងត្រឡប់ទៅវិញម្ដងទៀតនៅរង្វង់ពីរសប្ដាហ៍ក្រោយ ដើម្បីទំនាក់ទំនងការងារជាមួយមន្ទីរពេទ្យមួយរបស់ថៃ។

ភាពយន្ត "The Return” ជាភាពយន្តរឿងខ្មោចដែលមានទំនាក់ទំនងគ្នាជាមួយប្រទេសទាំង៤ ខ្មែរ ថៃ ឡាវ និងមីយ៉ាន់ម៉ា។ កញ្ញា ថន លក្ខិណា គឺជាតារាខ្មែរតែម្នាក់គត់របស់កម្ពុជាដែលមានវត្តមានក្នុងខ្សែភាពយន្តខ្នាតធំ ដែលសារព័ត៌មានថៃ អះអាងថាជាភាពយន្តបើកទំព័រសមាហរណកម្មអាស៊ាន ២០១៥។ ភាពយន្តនេះបាន និងកំពុងចាក់បញ្ចាំងនៅប្រទេសថៃ ប៉ុន្តែតាម លក្ខិណា "The Return” នឹងមកដល់ប្រទេសកម្ពុជាយើងឆាប់ៗ ព្រោះបានបញ្ជូនមកស្ថាប័នពាក់ព័ន្ធត្រួតពិនិត្យហើយ៕

អត្ថបទ៖ ថន លក្ខិណា ត្រៀមទៅជួប មីយ៉ាន់ម៉ា ឡាវ នៅថៃ