សូម្បីអ្នកនិពន្ធបទ "ស្មោះបងអូនស្លាប់អី" ក៏មោទនភាពចំពោះ ប៊ុត សីហា ដែរ!

2014-12-04 22:21:20
ចំនួនមតិ 0 | ចំនួនចែករំលែក 0

ចន្លោះមិនឃើញ

បើនិយាយពីម្ចាស់ជយលាភី The Voice Cambodia ប៊ុត សីហា ប្រហែលជាទស្សនិកជននៅចងចាំបទចម្រៀង "ស្មោះបងអូនស្លាប់អី" ដែលបេក្ខជនរូបនេះ បានយកមកច្រៀងប្រកួតប្រជែងជាមួយបេក្ខជនផ្សេងទៀត ដើម្បីដណ្ដើមការគាំទ្រពី Coach និងទស្សនិកជន។

កញ្ញា ស៊ិន ធារី ប្រាប់ Sabay ព្រឹកនេះថា បទ "ស្មោះបងអូនស្លាប់អី" ហាក់កាន់តែមានភាពល្បីល្បាញទៅវិញ និង មានការគាំទ្របន្ថែមមួយកម្រិតទៀត បន្ទាប់ពីកម្មវិធីលំដាប់ពិភពលោកមួយនេះបញ្ចប់ទៅ ដោយភាគច្រើនឮគេច្រៀង ឬចាក់ផ្សាយបទចម្រៀងនេះជាហូរហែ នៅតាមទីកន្លែងនានា។ នេះជាការផ្ទុះឡើងជាថ្មី នូវស្នាដៃអ្នកនិពន្ធវ័យក្មេងរូបនេះ។

កញ្ញានិយាយថា៖ "ក្នុងនាមជាអ្នកនិពន្ធបទនេះ ខ្ញុំមានមោទនភាព នៅពេលដែលម្ចាស់ជយលាភី ប៊ុត សីហា យកស្នាដៃរបស់ខ្ញុំទៅច្រៀងក្នុងកម្មវិធី The Voice Cambodia ដែលទទួលបានលទ្ធផលល្អ”។ នាងថា ម្ចាស់ដើម ឆាយ វីរៈយុទ្ធ និង ជយលាភី ប៊ុត សីហា សុទ្ធតែមានសមត្ថភាពច្រៀងបទនេះបានល្អ។

ប៉ុន្តែ ធារី បានរំលឹករឿងហួសចិត្តមួយថា បទ "ស្មោះបងអូនស្លាប់អី" នាងបានចំណាយពេល១ម៉ោងប៉ុណ្ណោះ ដើម្បីសរសេរជាទំនុកឲ្យចេញជារូបរាងឡើង ចុងឆ្នាំ ២០១៣ កន្លងទៅ។ នោះជាពេលវេលាខ្លីបំផុតសម្រាប់អ្នកនិពន្ធជើងថ្មីដូចជារូបនាង។ ប៉ុន្តែនោះជាកាតព្វកិច្ច ខណៈផលិតកម្ម Sunday ចង់ឲ្យតារាចម្រៀង ឆាយ វីរៈយុទ្ធ ថត និង ចេញលក់ទាន់ពេលវេលា។

នាងបន្តថា៖" សំណាងហើយពេលនោះ មានអារម្មណ៍ស្ងប់ស្ងៀម ខ្ញុំអាចសរសេរបានបទមួយចំនួនក្នុងមួយយប់នោះ កុំអីពិបាកហើយ"។ អ្នកនិពន្ធវ័យ២៣ឆ្នាំខាងលើអះអាងថា អារម្មណ៍នឹងន ជាចំណុចសំខាន់សម្រាប់អ្នកនិពន្ធគ្រប់រូប ដើម្បីនិពន្ធបទមួយ ដែលមានព្រលឹងវិញ្ញាណ។

ដំបូងឡើយ នាងគ្មានសង្ឃឹមបានទទួលការគាំទ្រនោះទេ ព្រោះគ្មានពេលវេលាពិនិត្យបានល្អិតល្អន់ ឬកែពាក្យពេចន៍មួយចំនួនឲ្យបានសមរម្យឡើយ ព្រោះមានបទចម្រៀងមួយចំនួនទៀត ត្រូវសរសេរក្នុងពេល ១ យប់នោះ។ ប៉ុន្តែនៅពេលចេញលក់ជាផ្លូវការ ស្រាប់តែមានការគាំទ្រច្រើនមិនគួរឲ្យជឿទៅវិញ។ នោះជាកម្លាំងចិត្តសម្រាប់នាង ទោះបីជាមានការរារាំងពីគ្រួសារ៕

-បទ "ស្មោះបងអូនស្លាប់អី?" ប៊ុត សីហា ច្រៀងក្នុងវគ្គLive Show

http://youtu.be/v2IcXuXpeF8

- បង"ស្មោះបងអូនស្លាប់អី?" របស់ ឆាយ វីរៈយុទ្ធ

http://youtu.be/u5wlUGY6Qno

អានអត្ថបទ៖ លទ្ធផល...ពីររឿងគាប់ជួនរបស់ ឆន សុវណ្ណរា- ប៊ុត សីហា

អានអត្ថបទ៖ តារាខ្មែរអាមេរិក នឹងចេញបទថ្មីស្ទីលប្លែក

អត្ថបទ៖ សំ ជំនាញ