សុខ ដែន តារាក្បាច់គុនខ្មែរ ត្រៀមបង្ហាញឃ្លីបវីដេអូពិសេសដើមឆ្នាំ ២០១៥!

2014-12-05 17:09:07
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងក្បាច់គុនខ្មែរ សុខ ដែន ត្រៀមនឹងបង្ហាញឃ្លីបវីដេអូពិសេស ជាសាច់រឿងខ្លី និង ជាចម្រៀងមិនធ្លាប់មានអ្នកធ្វើពីមុនមកនៅដើមឆ្នាំ ២០១៥ ខាងមុខនេះ។

ឃ្លីបវីដេអូពិសេសនេះ លោកត្រៀមនឹងអញ្ជើញតារាក្បាច់កុនល្បីៗ មកចូលរួមក្នុងការធ្វើឱ្យទស្សនិកជនជក់ចិត្ត និង ចាប់អារម្មណ៍។ តារាសម្ដែងក្បាច់គុន លោក សុខ ដែន និយាយថា៖" ខ្ញុំគិតថាមិនដែលមានអ្នកធ្វើឡើយឃ្លីបបែបនេះ។ វាជាឃ្លីបវីដេអូខ្លីបង្ហាញពីធនធានក្បាច់កុនខ្មែរដ៏សម្បូរបែប"។

សុខ ដែន អាវខៀវ ខោខ្លីពណ៌ក្រហមក្នុងឈុតសម្ដែងកាលពីពេលកន្លងទៅ

លោកបានបន្តថា ទាំងការដឹកនាំ ទាំងការតាក់តែងជាសាច់រឿងឡើង ក៏ដូចជាការរៀបចំសកម្មភាពដទៃទៀត គឺលោកជាអ្នកធ្វើដោយខ្លួនឯងទាំងអស់។

តារាសម្ដែងរូបនេះរំពឹងខ្ពស់ថា ឃ្លីបវីដេអូជាសាច់រឿង និង ចម្រៀងដែលជាការតាក់តែងលើកដំបូងរបស់ខ្លួននឹងទទួលបានការចាប់អារម្មណ៍ច្រើនពីទស្សនិកជននៅពេលចេញលើបណ្ដាញសង្គម Facebook និង YouTube។

ទន្ទឹងនឹងការរំពឹងខ្ពស់ តារាវ័យ ៣១ ឆ្នាំ ខាងលើ ក៏ស្នើឱ្យទស្សនិកជនជួយគាំទ្រឃ្លីបវីដេអូដំបូងរបស់ខ្លួនផងដែរ ដើម្បីជួយលើកកម្ពស់តារាសម្ដែងក្បាច់កុននៅក្នុងប្រទេស កម្ពុជា។

មូលហេតុនាំឲ្យមានការបង្កើតឃ្លីបវីដេអូពិសេស ប្លែកពីគេនេះ សុខ ដែន តារាសម្ដែងមានប្រភពមកពីខេត្ត ស្វាយរៀងនិយាយថា លោកចង់ឱ្យទស្សនិកជនដឹងតារាក្បាច់កុនខ្មែរ គឺមានសមត្ថភាពពិតៗក្នុងការសម្ដែងក្បាច់កុនបុរាណខ្មែរ។

ម្យ៉ាងទៀតលោកក៏ចង់ប្រាប់ទៅប្រទេសជិតខាងដែរថា ខ្មែរក៏មានសមត្ថភាពខ្ពស់មិនចាញ់ពួកគេឡើយ គ្រាន់តែអ្នកដឹកនាំសម្ដែងខ្មែរមិនរើសអ្នកចេះពិតប្រាកដមកសម្ដែង ដោយប្រកាន់តែបក្សពួក។

លោក សុខ ដែន មានប្រភពមកពីខេត្ត ស្វាយរៀង។ លោកបានចាប់ផ្ដើមហាត់ក្បាច់កុនខ្មែរ លាយនឹងក្បាច់គុនបរទេស ពោលគឺចម្រុះក្បាច់កុន តាំងពីឆ្នាំ១៩៩៣ មកម្ល៉េះ។ តារាសម្ដែងក្បាច់កុនរូបនេះចាប់ផ្ដើមប្រឡូកចូលសិល្បៈនៅឆ្នាំ ២០០៨ ហើយមានឈ្មោះល្បីមួយសន្ទុះនៅឆ្នាំ ២០១០ ព្រោះតែការសម្ដែងក្បាច់កុនក្នុងខ្សែភាពយន្តទទួលការចាប់អារម្មណ៍ច្រើនពីទស្សនិកជន៕

អានអត្ថបទបន្ត៖ Gangman Style បំបែកកំណត់ត្រាលើ Youtube

អានអត្ថបទបន្ត៖ ១៧ឆ្នាំក្រោយបញ្ចាំង ចាំតួសម្ដែងក្នុងរឿង Titanic បានប៉ុន្មាន?

អានអត្ថបទបន្ត៖ DJ កណ្ដុរ ទុក្ខធំព្រោះបងស្រីស្លាប់ពេលសម្រាលកូន

អត្ថបទ៖ អ៊ីង សុឡា