ចេញហើយ! គ្រូបង្វឹកថ្មីរបស់បឹងកេតជាជនជាតិអូស្ដ្រាលី និង ជាអតីតគ្រូជំនួយភ្នំពេញក្រោន

2014-09-29 16:37:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីបំផុតក្រុមបាល់ទាត់ចម្ការកៅស៊ូបឹងកេត បានបង្ហាញវត្តមានគ្រូបង្គោលថ្មីជំនួសលោកគ្រូបង្វឹកចាស់ ប្រាក់ វុទ្ធី ហើយនោះគឺលោក John Mcglynn ជាជនជាតិអូស្ដា្រលី និងជាគ្រូជំនួយមកពីក្លិបភ្នំពេញក្រោន ដើម្បីដឹកនាំក្រុមសម្រាប់យុទ្ធនាការ ពានរង្វាន់លីកកំពូលកម្ពុជារដូវកាលថ្មី (MCL 2015) និងពានរង្វាន់ផ្សេងៗនាពេលខាងមុខនេះ។

លោក John Mcglynn បង្ហាត់ក្រុមកាលពីព្រឹកមិញ

Page Facebook ផ្លូវការរបស់ក្លិបបានបង្ហាញអត្តសញ្ញាណគ្រូបង្វឹកថ្មីនៅព្រឹកថ្ងៃ ២៩ កញ្ញា នេះដើម្បីបញ្ចប់ពាក្យចចាមអារ៉ាម និងជម្រះមន្ទិលដល់អ្នកគាំទ្រខ្លួន។ ចំណែកលោក ប្រាក់ វុទ្ធី ដែលជាគ្រូបង្វឹកចាស់ បានលាឈប់ពីតំណែងដោយសារបញ្ហាសុខភាព ហើយលោកបានស្ម័គ្រចិត្តទៅបណ្ដុះឈុតយុវជនសម្រាប់ក្លិបវិញ។

បន្ទាប់ពីត្រូវបានក្លិបផ្ដល់សេចក្ដីទុកចិត្តលោកគ្រូបង្វឹកថ្មីបានសម្ដែងអារម្មណ៍ផ្ទាល់ខ្លួននៅបណ្ដាញសង្គមយក្សរបស់ក្លិបថា៖ «ខ្ញុំមានអារម្មណ៍សប្បាយរីករាយយ៉ាងខ្លាំង និងសូមអរគុណចំពោះក្លិបដែលបានផ្ដល់ឱកាសឲ្យខ្ញុំដើម្បីដឹកនាំ ហើយខ្ញុំសង្ឃឹមថានឹងទទួលបានភាពជោគជ័យនៅបឹងកេត ឲ្យដូចអ្វីដែលខ្ញុំបានធ្វើជាមួយក្លិបចាស់របស់ខ្ញុំ។ ខ្ញុំទន្ទឹងរង់ចាំចង់ជួប និងចាប់ផ្ដើមជាមួយក្រុមថ្មីរបស់ខ្ញុំ ហើយនាំយកនូវភាពជោគជ័យមកឲ្យក្លិបវិញ»។

លោក Jonh បានមកធ្វើជាជំនួយការលោក Sam Schweingruber នៅភ្នំពេញក្រោន កាលពីរដូវកាលមុន ហើយថែមទាំងងាយយល់ពីវប្បធម៌មួយចំនួនរបស់បាល់ទាត់ខ្មែរថែមទៀត។ ក្រៅពីនោះលោកក៏ទទួលបានការអាណិតស្រលាញ់ និង គោរពពីកីឡាករក្នុងក្លិបចាស់ផងដែរ។

មិនមែនមានតែក្រុមបឹងកេត មួយប៉ុណ្ណោះទេ ដែលបានធ្វើការផ្លាស់ប្ដូរសមាសភាពថ្នាក់ដឹកនាំសម្រាប់រដូវកាលក្រោយ ប៉ុន្តែក្រុមផ្សេងៗទៀតដូចជា ក្រុមគីរីវង់សុខសែនជ័យ ក្រុមវេស្ទើនយូនីអេហ្វស៊ី បានផ្លាស់ប្ដូរអ្នកដឹកនាំថ្មី។ ក្រៅពីនេះដំណឹងក្រៅផ្លូវការមួយថាក្លិបមួយចំនួនផ្សេងទៀតក៏មានគម្រោងផ្លាស់ប្ដូរក្បាលម៉ាស៊ីនដែរ៕