តារា K-Pop ក្លាយជាអ្នកមាន ទាំង ១០ នៅកូរ៉េខាងត្បូង

2014-12-12 21:53:33
ចំនួនមតិ 0 | ចំនួនចែករំលែក 0

ចន្លោះមិនឃើញ

កុំថាឡើយទាល់តែមានអាជីវកម្មធំៗសម្រាប់រកស៊ី ទើបអាចរុញច្រានឲ្យក្លាយជាអ្នកមានស្ដុកស្ដម្ភបាននោះ។ សូម្បីតែតារាល្បីៗរបស់ K-Pop ទាំង ១០ រូបនេះ ដែលបានប្រឡូកខ្លួនក្នុងវិស័យសិល្បៈមិនយូរប៉ុន្មានផង ក៏ក្លាយជាអ្នកមានលុយចាយមិនអស់ទៅហើយ។

ទោះបីពួកគេឈានជើងចូលក្នុងពិភពចម្រៀង ភាពយន្ត សម្ដែងផ្សព្វផ្សាយពាណិជ្ជកម្ម ត្រឹមមួយរយៈពេលខ្លីក៏ពិតមែន ប៉ុន្តែអាជីពទាំងអស់នេះបានបង្កើតប្រាក់ចំណូលវាល់លាន ហើយអាចផ្លាស់ប្ដូរជីវិតរបស់ពួកគេឲ្យកាន់តែប្រសើរឡើងជាងមុន ដល់ថ្នាក់ថា ចង់ទិញអ្វីក៏បាន ដូចជាផ្ទះវិឡា រថយន្តទំនើប និងបង្កើតអាជីវកម្មផ្ទាល់ខ្លួន។

ខាងក្រោមនេះសុទ្ធតែតារា K-Pop ដែលជាប់ចំណាត់ថ្នាក់ ជាអ្នកមានលុយច្រើនច្រើនជាងគេ ទាំង១០នៅកូរ៉េខាងត្បូង៖

១. Choi Siwon មកពីក្រុមចម្រៀង Super Junior បានក្លាយជាតារាមានប្រាក់ចំណូលច្រើនជាងគេបំផុត តាមរយៈការសម្ដែង ច្រៀង និងថតវីដេអូពាណិជ្ជកម្ម។ អាចនិយាយបានថា Choi Siwon ជាតារាមានតម្លៃខ្លួនខ្ពស់ជាងគេ។

២. BoA Kwon ជាតារាចម្រៀង K-Pop ដែលមានប្រាក់ចំណូលខ្ពស់ជាងគេបំផុត ក្នុងចំណោមតារាស្រីៗផ្សេងទៀត។ នាងមានផ្ទះតម្លៃជាង ២៥ លានដុល្លារ ព្រមទាំងមានរបស់មានតម្លៃជាច្រើនទៀត។ កាលពីឆ្នាំ ២០០៧ នាងបានជាប់ចំណាត់ថ្នាក់លេខ ៥ ក្នុងចំណោមតារាស្រី K-Pop ដែលមានលុយច្រើន។

៣. G-Dragon មកពីក្រុម BigBang មានអាជីពជាកវីនិពន្ធបទចម្រៀង ផលិតករ និងតារាបង្ហាញម៉ូដ។ លុយដែលលោករកបានសរុបស្មើ ៩ លានដុល្លារហើយ តាមរយៈចម្រៀង និងសួយសារទំនិញ។

៤. PSY ក៏ជាតារាចម្រៀងធ្លាប់ជាប់លើកំពូលតារាង ដែលមានប្រាក់ចំណូលរាប់លានដុល្លារប្រចាំឆ្នាំដែរ។

៥. IU ជាតារាចម្រៀងស្រីវ័យក្មេង មានសំឡេងពីរោះ បានក្លាយជាអ្នកមានប្រាក់ចំណូលកប់ពពក តាមរយៈការលក់អាល់ប៊ុមទី ៣។

៦. Yoona សមាជិកក្រុមមកពី Girl's Generation ដែលមានប្រាក់ចំណូលមិនក្រោម ២ ពាន់លានវ៉ុន ឬស្មើនឹង ៩០៤៧៤០ ដុល្លារ។ នាងទទួលបានប្រាក់ច្រើនបែបនេះ តាមរយៈការថតផ្សព្វផ្សាយពាណិជ្ជកម្មប្រចាំឆ្នាំ។

៧. Lee Seung Gi អាចរកលុយបានជាង ៩,៩ លានដុល្លារ បើគិតមកត្រឹមឆ្នាំ ២០១១។

៨. Byung hun Lee មិនដែលមានបំណងចង់ធ្វើជាតារាភាពយន្តនោះទេ ប៉ុន្តែទីបំផុតលោកក៏បានក្លាយជាតារាសម្ដែងក្នុងភាពយន្តហូលីវូដ "G.I. Joe” របស់អាមេរិក ហើយអាចរកលុយបានរាប់លានដុល្លារទៀតផង។

៩. Jaejoong, Yoochun, និង Junsu មកពីក្រុមចម្រៀង JYJ ម្នាក់ៗមានផ្ទះមិនក្រោមខ្ទង់លានដុល្លារ ជាពិសេសមានទីតាំងនៅក្បែរគ្នាទៀត។

១០. Rain មានឈ្មោះពេញហៅថា Jung Ji Hoon ដែលមិនសូវជាលេចមុខខ្លាំងប៉ុន្មានទេ មួយរយៈពេលចុងក្រោយនេះ ក៏ដោយសារតែជាប់រវល់សម្ដែងរឿងនៅ California សហរដ្ឋអាមេរិក។ ទោះជាយ៉ាងណា Rain នូវតែអាចរកប្រាក់បានច្រើនមិនស្ទើរទេ៕