ហេតុផល ៧យ៉ាង អ្នកគួរសម្រេចចិត្តរៀបការ
- 2014-12-12 21:02:27
- ចំនួនមតិ 0 | ចំនួនចែករំលែក 0
ហេតុផល ៧យ៉ាង អ្នកគួរសម្រេចចិត្តរៀបការ
ចន្លោះមិនឃើញ
មនុស្សមួយចំនួនហាក់ស្ទាក់ស្ទើរក្នុងការទទួលយកអាពាហ៍ពិពាហ៍កសាងគ្រួសារ ព្រោះគេមិនដឹងច្បាស់ថាជម្រើសមួយនេះល្អចំពោះខ្លួន ឬអត់។ ទោះយ៉ាងណា ការចូលរោងការគឺជារឿងធម្មជាតិ ដែលមនុស្សគ្រប់រូបតែងជួបប្រទះក្នុងមួយឆាកជីវិត។ បើអ្នកមិនប្រាកដក្នុងចិត្តថា គួររៀបការដើម្បីអ្វី សូមពិចារណាលើចំណុចមួយចំនួនដូចខាងក្រោម៖
ខាងក្រោមនេះគឺជាហេតុផល ៧យ៉ាង ដែលអ្នកគួរសម្រេចចិត្តរៀបការ៖
១. រំដោះខ្លួនចេញពីភាពឯកា
មនុស្សដែលនៅលីវមិនទាន់មានគ្រួសារ តែងមានអារម្មណ៍ថាឯកាពេលនៅដាច់ពីគេ។ បើទោះជាមានសង្សារហើយ ក៏មិនប្រាកដថាអាចឲ្យអ្នកមានអារម្មណ៍ស្រស់ស្រាយគ្រប់ពេលដែរ។ គ្មាននរណាម្នាក់អាចកំដរអ្នកបានពេញមួយជីវិត ដូចប្ដីប្រពន្ធដែលយល់ចិត្តគ្នានោះទេ។ ដូចនេះ ដើម្បីកុំឲ្យជីវិតអ្នកតែលតោលកណ្ដោចកណ្ដែងម្នាក់ឯងទៀត គួរគិតពីរឿងអាពាហ៍ពិពាហ៍កសាងអនាគត។
២. ទំនាក់ទំនងកាន់តែរឹងមាំ
ជាធម្មតា ពេលមានសង្សារ អ្នកអាចប្រច័ណ្ឌច្រើន ភ័យខ្លាចបាត់បង់ និងបារម្ភពីគេ ព្រោះមិនបាននៅជិតគ្នាគ្រប់ពេល។ អារម្មណ៍ទាំងអស់នេះ អាចនឹងធ្វើឲ្យទំនាក់ទំនងស្នេហារវាងមនុស្សពីរនាក់មានភាពរង្គោះរង្គើ និងឈានទៅរកការប្រេះស្រាំ ប្រសិនបើកើតមានឡើងញឹកញាប់ពេក។ ជម្រើសល្អបំផុតសម្រាប់ពង្រឹងទំនាក់ទំនងស្នេហាឲ្យកាន់តែស្អិតល្មួត គឺជ្រើសរើសយកអាពាហ៍ពិពាហ៍។
៣. មានអ្នកមើលថែគ្នាទៅវិញទៅមក
ជាការពិតណាស់ គ្មាននរណាយល់ចិត្ត និងសុខទុក្ខគ្នាដូចប្ដី-ប្រពន្ធទេ ជាពិសេសគឺពេលឈឺថ្កាត់តែម្ដង។ រៀបការរួច ប្រៀបដូចជាអ្នកមានគ្រូពេទ្យម្នាក់ប្រចាំកាយ បើទោះជាមិនចេះព្យាបាលគ្រប់ជំងឺដូចពេទ្យទូទៅ តែយ៉ាងហោចណាស់ក៏អាចមើលថែអ្នកឲ្យមានភាពកក់ក្ដៅបានដែរ។
៤. ចេះសន្សំប្រាក់គិតពីអនាគត
ពេលនៅម្នាក់ឯង មិនទាន់មានគូអនាគតច្បាស់លាស់ អ្នកច្រើនតែដៃទូលាយចាយវាយមិនសូវចេះគិតទេ ព្រោះអាងថាខ្លួនមួយ។ ទម្លាប់គិតថាខ្លួនឯករាជ្យ រកលុយខ្លួនឯង ចាយសម្រាប់ម្នាក់ឯងនេះហើយ ដែលធ្វើឲ្យអ្នកមិនសូវសល់អ្វីជាដុំកំភួនច្រើន សម្រាប់ត្រៀមពេលខ្លួនចាស់។ ទោះយ៉ាងណា ការទទួលយកអាពាហ៍ពិពាហ៍ គឺជាជម្រើសល្អបំផុតដើម្បីឲ្យអ្នកចេះគិតពីអនាគត និងសន្សំប្រាក់សម្រាប់រួមដំណើរជាមួយគ្នាទៅថ្ងៃមុខ។
៥. ជម្រុះទម្លាប់អាក្រក់
អ្នកប្រហែលជាអាចមានទម្លាប់អាក្រក់ច្រើន ពេលមិនទាន់រៀបការ ព្រោះគិតថាគ្មាននរណាឃើញ ឬគ្មាននរណាមកទើសចិត្តនឹងទង្វើរបស់ខ្លួន។ ជួនកាល អ្នកអាចដើរលេងច្រើន ខ្ជិលច្រអូសមិនរកការងារធ្វើដើម្បីចិញ្ចឹមខ្លួនឯង រហូតក្លាយជាទម្លាប់ចាក់ឫស។ យ៉ាងណាមិញ ក្រោយពេលអ្នករៀបការរួច ទម្លាប់អាក្រក់ទាំងនោះ អាចនឹងត្រូវជម្រុះចោលម្ដងបន្តិចៗ ហើយងាកមករកវិធីធ្វើយ៉ាងណាឲ្យជីវិតមានសុភមង្គលជាមួយគូអនាគតវិញ។
៦. បំពេញតម្រូវការជីវិត
អាពាហ៍ពិពាហ៍ គឺជារឿងធម្មជាតិរបស់មនុស្ស និងជាតម្រូវការសម្រាប់ជីវិត ដែលពោរពេញទៅដោយភាពរីករាយ និងទុក្ខសោក។ ភាពរីករាយអាចមានច្រើនប្រភេទ ប៉ុន្តែភាពរីករាយពិតៗដែលកើតចេញពីសុភមង្គលនៃគ្រួសារមួយ មិនងាយនឹងសាបសូន្យឡើយ។ នរណាក៏ប្រាថ្នាចង់បានគ្រួសារមួយ បង្កើតកូនគួរឲ្យស្រលាញ់ និងធ្វើដំណើរផ្សងព្រេងជាមួយគ្នាដែរ គ្រាន់តែពេលខ្លះអ្នកមិនហ៊ានទទួលយកប៉ុណ្ណោះ។
៧. មានដៃគូសិចជាប់លាប់មួយ មិនព្រួយឆ្លងមេរោគ
ល្បែងលើគ្រែ គឺជារឿងធម្មតាទៅហើយសម្រាប់មនុស្សលោក ប៉ុន្តែពេលខ្លះវាអាចផ្ដល់គ្រោះថ្នាក់ ប្រសិនបើមានដៃគូច្រើន និងមិនចេះការពារឲ្យបានត្រឹមត្រូវទេនោះ។ ទោះយ៉ាងណា ក្រោយពេលរៀបការរួច អ្នកនឹងអស់ក្ដីកង្វល់ចំពោះរឿងទាំងអស់នេះ ព្រោះមានដៃគូច្បាស់លាស់ម្នាក់ មិនភ័យខ្លាចឆ្លងជំងឺផ្សេងៗឡើយ៕
ចុចអាន៖ ៦យ៉ាង ស្រីៗប្រាថ្នាចង់បានពីមនុស្សប្រុសដែលខ្លួនស្រលាញ់
ប្រែសម្រួល៖ គង់ វិសាល ប្រភព៖ wmnlife
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
