៦យ៉ាង ស្រីៗប្រាថ្នាចង់បានពីមនុស្សប្រុសដែលខ្លួនស្រលាញ់

2014-10-23 16:33:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ការស្រលាញ់ និងការបង្កើតស្នេហារវាងមនុស្សពីរនាក់មិនមែនជារឿងពិបាកពេកទេ ប៉ុន្តែអាចថែរក្សាស្នេហានោះឲ្យឋិតថេរបានដល់ពេលណាទើបជារឿងពិបាកខ្លាំង។ ដើម្បីថែរក្សាចំណងស្នេហ៍មួយឲ្យនៅយូរអង្វែង លុះត្រាតែមនុស្សពីរនាក់ចេះយល់ពីគ្នាទៅវិញទៅមកឲ្យបានច្រើន។ ខាងក្រោមនេះ គឺជាចំណុច ៦យ៉ាង ដែលស្រីៗតែងប្រាថ្នាចង់បានពីមនុស្សប្រុសដែលខ្លួនស្រលាញ់៖

១. ភាពស្មោះត្រង់

មនុស្សស្រីគ្រប់រូបចង់បានពាក្យពិតពីបុរសដែលខ្លួនស្រលាញ់ បើទោះជារឿងនោះល្អ ឬ អាក្រក់យ៉ាងណាក៏ដោយ។ នាងចង់ឲ្យគូអនាគតជឿជាក់លើនាង និងចែករំលែករឿងគ្រប់យ៉ាងជាមួយគ្នា ប្រៀបដូចមនុស្សពីរនាក់មានចិត្តតែមួយ។ ទោះយ៉ាងណា មិនមែនត្រង់ទៅត្រង់មក សុទ្ធតែល្អទាំងអស់ទេ។ នាងមិនស្អាតក៏ដោយ ក៏មិនត្រូវនិយាយបង្អាប់តាមត្រង់ដែរ។ រឿងខ្លះគួរលាក់ទុកក្នុងចិត្ត និងពោលពាក្យសរសើរវិញទើបជាការល្អ ព្រោះនារីទាំងឡាយមិនចូលចិត្តគេរិះគន់រឿងសម្រស់ទេ។

២. ការយោគយល់

មនុស្សស្រីឆាប់អន់ចិត្តណាស់ ដូចនេះហើយទើបនាងត្រូវការមនុស្សប្រុសយល់ចិត្តឲ្យបានច្រើន។ នារីគ្រប់រូបចង់ឲ្យមនុស្សដែលខ្លួនស្រលាញ់ មើលឃើញនាងជាខ្លួននាង មិនមែនប្រៀបធៀបទៅអ្នកដទៃនោះទេ។ បើស្រលាញ់នាងហើយ កុំព្យាយាមផ្លាស់ប្ដូរនាងច្រើនពេក ចំណុចណាអាចទទួលបានគួរយោគយល់ទើបស្នេហាបានយូរអង្វែង។

៣. ការយកចិត្តទុកដាក់

នារីទាំងឡាយត្រូវការភាពកក់ក្ដៅច្រើនជាងបុរស។ ពេលនាងមានរឿងអ្វីមួយ នាងចង់ឲ្យបុរសដែលនាងផ្ញើបេះដូងនៅក្បែរ យកចិត្តទុកដាក់ លួងលោម និងចែករំលែកការលំបាកទាំងនោះ។ បើគិតទៅ វាដូចជាទើសចិត្តបន្តិចក្នុងការគិតគូរពីនារីដែលខ្លួនស្រលាញ់គ្រប់ពេល ប៉ុន្តែពេលអ្នកជួបស្ថានភាពនេះ អ្នកក៏ត្រូវការនាងដែរ ហើយនាងនឹងនៅក្បែរអ្នក លួងលោមអ្នកដូចគ្នា។

៤. ភាពរឹងមាំ

គ្មាននារីណាម្នាក់ចង់ឃើញបុរសដែលមានភាពទន់ខ្សោយនោះទេ ព្រោះវាប្រឆាំងនឹងធម្មជាតិរបស់នាង។ ជាទូទៅ នារីខ្លាំងចិត្ត តែខ្សោយកម្លាំង ដូចនេះហើយទើបនាងត្រូវការដៃគូដែលជាបង្គោលរឹងមាំសម្រាប់នាង។ នាងចង់បានមនុស្សប្រុសរឹងប៉ឹង ទាំងផ្លូវកាយ និងផ្លូវចិត្ត ដែលអាចធ្វើឲ្យនាងមានអារម្មណ៍ថាសុវត្ថិភាព ហើយអ្នកអាចមានសមត្ថភាពការពារនាងបានគ្រប់ពេល។

៥. ទំនួលខុសត្រូវ

មនុស្សស្រីមិនមែនចង់បានត្រឹមការស្រលាញ់សម្រាប់នាងប៉ុណ្ណោះទេ នាងចង់បានការទទួលខុសត្រូវលើជីវិតនាង។ នាងចង់បានមនុស្សប្រុសល្អម្នាក់ ដែលអ្នកដទៃតែងកោតសរសើរ និងអាចឲ្យនាងមានទំនុកចិត្តថាពេលអនាគតនឹងមានអ្នកនៅក្បែររហូត។ មនុស្សស្រីមិនងាយលង់ស្រលាញ់ងាយៗដូចមនុស្សប្រុសទេ ប៉ុន្តែបើជ្រុលស្រលាញ់ហើយភាគច្រើនគិតពីរឿងអនាគតជាធំ។ បើស្រលាញ់នាងហើយ ត្រូវផ្ដល់ភាពកក់ក្ដៅ និងជំនឿចិត្តដល់នាងថាអ្នកនឹងអាចនៅមើលថែនាងរហូត។

៦. កម្មសិទ្ធិផ្ដាច់មុខ

នារីម្នាក់ដែលស្រលាញ់គូស្នេហ៍ខ្លាំង តែងចង់ឲ្យគេមើលឃើញតែនាងម្នាក់គត់ក្នុងកែវភ្នែក និងស្រលាញ់នាងជាងគេបំផុត។ នាងចង់ឲ្យបុរសម្នាក់នោះមើលឃើញថា ក្នុងពិភពលោកនេះ នាងគឺជានារីស្រស់ស្អាតជាងគេ។ បើទោះនាងនិយាយថា មិនប្រចណ្ឌពេលបុរសដែលខ្លួនស្រលាញ់នៅក្បែរអ្នកផ្សេង ប៉ុន្តែធាតុពិតនាងខំលាក់ចិត្តខ្លួនឯងទេ។ គ្មាននារីណាម្នាក់ អាចទប់ចិត្តបាន ពេលឃើញសង្សារខ្លួនទៅនិយាយសាសងនឹងអ្នកផ្សេងនោះទេ។ និយាយរួមគឺនាងចង់បានសង្សារមួយម្នាក់ឯង ចង់បានជាកម្មសិទ្ធិផ្ដាច់មុខ។

ចុចអាន៖ ៨យ៉ាងស្រីៗចំណាំធ្វើដោយមិនដឹងខ្លួន ពេលគេស្រលាញ់យើង

ចុចអាន៖ ចំណុច៨លើដងខ្លួននារី ដែលបុរសសម្លឹងមើលពេលជួបដំបូង

ប្រែសម្រួល៖ គង់ វិសាល

ប្រភព៖ elitedaily