Apple កំពុងកែកំហុសឆ្គងពុម្ពអក្សរខ្មែរនៅលើ iOS 8 បន្ទាប់ពី 4KhmeriPhone ស្នើសុំ

2014-12-18 16:24:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តដែលប្រើប្រព័ន្ធប្រតិបត្តិការ iOS 8 មួយចំនួននៅឡើយមិនទាន់ដឹងថាមានកំហុសឆ្គងលើពាក្យប្រកបខ្មែរមួយចំនួនទេ។ ដោយសារមានកំហុសឆ្គងពុម្ពអក្សរខ្មែរលើ iOS ទើបក្រុម 4KhmeriPhone បានស្នើសុំធ្វើការកែសម្រួលរាល់កំហុសឆ្គងអក្សរខ្មែរទាំងនោះ។

ប្រធានក្រុម 4khmeriPhone បានឲ្យដឹងថា ក្រុមលោកបានធ្វើការតេស្តនិង រាយការណ៍(Report) ទៅឲ្យ Apple វិញនៅកំហុសឆ្គងទាំងឡាយដែលកើតមានលើ iOS 8 នោះផងដែរ។

លោកបន្តថា លោកទើបតែបានទាក់ទងម្ដងទៀតនៅលើបណ្ដាញសង្គម Skype អំពីការវិវត្តក្នុងការកែតម្រូវពុម្ពអក្សរខ្មែររវាង ក្រុមរបស់លោកនិងម្ចាស់ពុម្ពអក្សរផ្ទាល់របស់ក្រុមហ៊ុន Apple ។ ហើយម្ចាស់ពុម្ពក៏បានឲ្យដឹងផងដែរថា ពុម្ពអក្សរខ្មែរនៅលើ iOS កំពុងដំណើរការកែសម្រួល។

ជាងនេះទៅទៀត ឥឡូវខាងក្រុមធ្វើពុម្ពអក្សរនៅ Apple គ្រោងនឹងឲ្យ 4khmeriPhone តេស្តសារជាថ្មីនៅចុងសប្ដាហ៍នេះ។ បើសិនជាក្រុមលោកធ្វើការតេស្តដោយគ្មានបញ្ហាទៀតទេនោះ Apple នឹងដាក់ឲ្យដំណើរការកំណែពុម្ពអក្សរខ្មែរថ្មីនៅលើ iOS ជំនាន់ថ្មីតែម្ដង។

លោកបានបន្ថែមថា ទោះជាហត់នឿយយ៉ាងណាឲ្យតែបានឃើញអក្សរខ្មែរ អក្សរជាតិ មានការប្រើប្រាស់បានត្រឹមត្រូវគឺលោកអស់ចិត្តហើយ។

*នេះជាការទាក់ទងរវាង 4KhmeriPhone និង ម្ចាស់ពុម្ពអក្សររបស់ក្រុមហ៊ុន Apple