ថតរឿងប្ដីប្រពន្ធយូរៗទៅ Ha Ji Won ចង់លេងមែនទែន

2014-12-18 21:35:42
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង Ha Ji Won បានចាប់អារម្មណ៍នឹងរឿងរៀបការយ៉ាងខ្លាំង ក្រោយថតខ្សែភាពយន្ត ដែលរៀបរាប់ពីជីវិតគ្រួសារកក់ក្ដៅ “Chronicle of a Blood Merchant" រួចមក។

ក្នុងសន្និសីទកាសែតរឿង “Chronicle of a Blood Merchant" នៅ CVG ក្នុងសង្កាត់ Apgujeong ទីក្រុងសេអ៊ូលកាលពីម្សិលមិញនេះ Ji Won បានឱ្យដឹងថា នាងមានកូនប្រុសបីនាក់ នៅវគ្គបញ្ចប់ក្នុងរឿងកំប្លែង “Secret Garden “។ ចំណែករឿងថ្មីនេះ នាងក៏សម្ដែងជាម្ដាយដែលមានកូនប្រុសបីនាក់សាជាថ្មី។

តារាសម្ដែងវ័យ៣៦ឆ្នាំបញ្ជាក់ថា៖ "ទោះបីខ្ញុំមិនដែលគិតរឿងរៀបការ តែខ្ញុំបានដើរតួជាប្រពន្ធរបស់ Heo Sam Kwan សម្ដែងដោយ Ha Jung-woo និងម្ដាយរបស់ Il Lak, Yi Lak និង Sam Lak ក្នុងរឿង “Chronicle of a Blood Merchant នេះ”។

តារាស្រីពូកែសម្ដែងឈុតស្នេហា បានបង្ហាញចំណាប់អារម្មណ៍រឿងរៀបការថា៖" ខ្ញុំមានអារម្មណ៍កក់ក្ដៅ ពេលសម្ដែងតួម្ដាយ។ លើសពីនេះ ខ្ញុំអាចនឹងពិចារណារឿងអាពាហ៍ពិពាហ៍។ ថ្ងៃមុខពេលរៀបការ ខ្ញុំចង់បានកូនប្រុសបីនាក់ ។ ក្មេងៗពិតជាគួរឱ្យស្រលាញ់ណាស់"។

Ha Ji-won កើតនៅថ្ងៃទី ២៨ មិថុនា ឆ្នាំ ១៩៧៨ ក្នុងទីក្រុងសេអ៊ូល។ នាងចូលប្រឡូកក្នុងវិស័យសិល្បៈ នៅឆ្នាំ១៩៩៦ រហូតដល់បច្ចុប្បន្ន។ នាងបានល្បីល្បាញតាមរយៈការសម្ដែងរឿងបុរាណ "Hwang Jini " របស់ទូរទស្សន៍ KBS , រឿងកំប្លែង "Secret Garden" របស់ទូរទស្សន៍ SBS និងរឿង "Empress Ki" របស់ទូរទស្សន៍ MBC។

"Chronicle of a Blood Merchant" ជាខ្សែភាពយន្តយកលំនាំតាម ប្រលោមលោករបស់ជនជាតិចិន ឈ្មោះ Yu Hua។ ខ្សែភាពយន្តដឹកនាំដោយ Ha Jung-woo នេះ រៀបរាប់ពីស្នេហារបស់គ្រួសារ កម្មកររោងចក្រមួយ ក្នុងសម័យកាលឆ្នាំ១៩៥០។ រឿងនេះនឹងត្រូវចាក់បញ្ចាំង នៅថ្ងៃទី១៥ ខែមករា ឆ្នាំ២០១៥ខាងមុខ៕