បញ្ហារំជើបរំជួលនៅបាត់ដំបង កំពុងជះឥទ្ធិពលមិនល្អដល់ការផ្តល់វ៉ាក់សាំងកុមារតូចៗ

2014-12-19 23:46:47
ចំនួនមតិ 0 | ចំនួនចែករំលែក 0

ចន្លោះមិនឃើញ

បញ្ហារំជើបរំជួលពីការឆ្លងរីករាយដាល នៃជំងឺអេដស៍នៅភូមិរកា ឃុំរកា ស្រុកសង្កែ ខេត្តបាត់ដំបង កាលពីចុងសបា្តហ៍មុន បាននាំឲ្យចំនួនកុមារតូចៗ មកទទួលវ៉ាក់សាំង ដើម្បីការពារ ពីជំងឺជាច្រើនប្រភេទ មានការថយចុះក្នុងសបា្តហ៍នេះ។

លោក វឿង ប៊ុនរ៉េត ប្រធានមន្ទីរសុខាភិបាលខេត្តបាត់ដំបងប្រាប់ Sabay ថា មន្ត្រីសុខាភិបាលតាមស្រុកបានរាយការណ៍មកថា ឪពុកម្តាយ មួយចំនួនមិនហ៊ាននាំកូនតូចៗ របស់ខ្លួនមកទទួលវ៉ាក់សាំងការពារជំងឺ នៅមន្ទីរពេទ្យរដ្ឋនោះទេ។ នេះគឺជាការយល់ខុស។ ដូច្នេះលោកសូមអំពាវនាវដល់ឪពុកម្តាយ ត្រូវនាំកូនតូចរបស់ខ្លួនមកទទួលវ៉ាក់សាំងឲ្យបានទៀងទាត់។ "ជារឿងគួរឲ្យអាសូរ ដែលរឿងមួយកើតឡើង ហើយអាចប៉ះពាល់ដល់រឿងមួយទៀត។ យើងខ្ញុំកំពុងខិតខំជាខ្លាំង ដើម្បីរកមូលហេតុពិតប្រាកដ នៃការឆ្លងរីករាលដាលនេះ។ ឪពុកម្តាយ ទាំងអស់នៅខេត្តបាត់ដំបង សូមកុំខ្លាច ហើយត្រូវនាំកូនមកទទួលវាក់សាំងឲ្យបានទៀងទាត់”។

គិតត្រឹមថ្ងៃទី១៧ ខែធ្នូ ឆ្នាំ២០១៤ មានមនុស្ស ១០៦ នាក់ ក្នុងភូមិរកា ឃុំរកា ស្រុកសង្កែ ខេត្តបាត់ដំបង បានតេស្ដឈាមរកឃើញមានផ្ទុកជំងឺអេដស៍។ ព័ត៌មាននេះនាំឲ្យមានការភ្ញាក់ផ្អើល និងសោកស្តាយជាខ្លាំង។ មជ្ឈមណ្ឌលជាតិប្រយុទ្ធជំងឺអេដស៍ សើស្បែក និងកាមរោគ នៃក្រសួងសុខាភិបាល រួមទាំងអង្គការជាតិ និងអន្តរជាតិជាច្រើន កំពុងធ្វើការស្រាវជ្រាវ ចំពោះបញ្ហាខាងលើនេះ៕