រឿងរ៉ូមែនទិក៦យ៉ាង ដែលស្វាមីគួរធ្វើចំពោះឧត្ដមភរិយា

2014-12-22 21:16:35
ចំនួនមតិ 0 | ចំនួនចែករំលែក 0

ចន្លោះមិនឃើញ

គេតែងនិយាយថា "សម្លឆ្ងាញ់ដោយសារគ្រឿង គ្រួសាររុងរឿងដោយសារភរិយា" ប៉ុន្តែបុរសក៏អាចធ្វើរឿងងាយៗឲ្យគ្រួសារមានសុភមង្គលបានដូចគ្នាដែរ។ ខាងក្រោមនេះ ជាវិធីសាស្ត្ររ៉ូមែនទិកទាំង៦ ដែលស្វាមីគួរធ្វើចំពោះភរិយា ដើម្បីបង្កើនចំណងស្នេហ៍ឲ្យកាន់តែស្អិតរមួតទ្វេដង៖

១. ផ្ញើសាររ៉ូមែនទិកទៅនាង

ប្រសិនបើអ្នករវល់ពេញមួយថ្ងៃនៅការិយាល័យ ឆ្លៀតឱកាសអំឡុងពេលបាយថ្ងៃត្រង់គួរតែផ្ញើសារទៅប្រពន្ធដែលមានអត្ថន័យរ៉ូមែនទិក។ នាងប្រាកដជារីករាយជាមួយនឹងកាយវិការមនោសញ្ចេតនានេះ។ នេះជារឿងមួយដែលប្ដីគ្រប់រូបត្រូវធ្វើចំពោះភរិយា។

២. ជួយធ្វើការងារផ្ទះបាយជំនួសនាង

យ៉ាងហោចណាស់ក៏មានម្ដងម្កាលដែរ ដែលប្ដីត្រូវតែយកចិត្តទុកដាក់ពីការងាររបស់គ្រួសារ សម្រាប់ហេតុផលពីរយ៉ាង។ ទីមួយ វាជាការផ្ដល់ជំនួយសង្គ្រោះដ៏ល្អសម្រាប់ភរិយា និងទីពីរវានឹងក្លាយជាកាយវិការរ៉ូមែនទិកដ៏អស្ចារ្យមួយ។ អ្នកគ្រាន់តែដើរចូលទៅផ្ទះបាយ សំដៅទៅរកប្រពន្ធរបស់អ្នក ខណៈពេលដែលនាងជាប់រវល់លាងចាន និងស្នើរសុំឲ្យនាងទៅសម្រាក ហើយអ្នកជាអ្នកលាងចានទាំងអស់នោះជំនួសវិញ។ អ្នកអាចកត់សម្គាល់ឃើញសុភមង្គលយ៉ាងងាយស្រួលនៅក្នុងភ្នែកនាង។

៣. សរសេរពាក្យថា "បងស្រឡាញ់អូន" លើកញ្ចក់បន្ទប់ទឹក

វិធីមួយទៀតធ្វើឲ្យប្រពន្ធភ្ញាក់ផ្អើល និងរ៉ូមែនទិកគឺសរសេរពាក្យថា "បងស្រឡាញ់អូន" នៅលើកញ្ចក់បន្ទប់ទឹក ពេលអ្នកចូលបន្ទប់ទឹកមុននាង។ ពេលទៅងូតទឹក នាងនឹងរំភើបរីករាយនឹងពាក្យទាំងនោះ។ កាយវិការបែបនេះ មានសារៈសំខាន់ណាស់ក្នុងការរក្សាអណ្ដាតភ្លើងស្នេហ៍ ឲ្យនៅឆេះមិនរលត់។ នេះជារឿងដ៏ងាយស្រួលមួយដែលប្ដីគួរតែធ្វើ។

៤. ភ្ញាក់ពីព្រលឹម ធ្វើអាហារពេលព្រឹកឲ្យនាង

ពេលខ្លះបុរសត្រូវរកអ្វីមកបន្ថែមទៀតដើម្បីផ្គាប់ចិត្តមនុស្សស្រីជាទីស្រលាញ់។ វិធីដ៏ល្អបំផុតដើម្បីជាថ្ងៃពិសេសសម្រាប់ប្រពន្ធនោះ គឺធ្វើម្ហូបសំណព្វចិត្តនាង ដោយចម្អិនដោយអ្នកផ្ទាល់។ ដំបូងក្រោកពីព្រលឹមរៀបចំកិច្ចការទាំងអស់ និងចម្អិនអាហារមុនពេលនាងភ្ញាក់។ នាងនឹងចូលចិត្តការផ្លាស់ប្ដូរទាំងនេះ ដែលជាទង្វើបង្ហាញថាអ្នកពិតជាស្រឡាញ់ភរិយាខ្លាំងណាស់។

៥. ជួយម៉ាស្សាឲ្យនាង

រឿងរ៉ូមែនទិកមួយទៀត គឺការម៉ាស្សារាងកាយរបស់ប្រពន្ធជាទីស្រលាញ់ដោយកាយវិការថ្នមៗ។ ជាជាវិធីដ៏ល្អបំផុត ដើម្បីផ្ដល់ឲ្យនាងនូវសេចក្ដីរំភើបពេញដោយមនោសញ្ចេតនាពេលនាងមើលទៅអស់កម្លាំង ឬធុញទ្រាន់។ នាងពិតជារីករាយជាក់ជាមិនខាន។

៦. រៀបគម្រោងណាត់ជួបដ៏ភ្ញាក់ផ្អើលមួយនៅបរទេស

ប្រពន្ធអ្នកប្រាកដជារីករាយជាមួយនឹងការចំណាយពេលក្នុងថ្ងៃឈប់សម្រាកមួយនៅប្រទេសឆ្ងាយ។ បំណងប្រាថ្នារបស់នាងកើតឡើងដោយភាពភ្ញាក់ផ្អើល។ នេះជារឿងស្នេហាដ៏ល្អបំផុតមួយដែលប្ដីអាចធ្វើឲ្យប្រពន្ធជាទីស្រឡាញ់រឹតតែស្រលាញ់អ្នកទ្វេដង។

ចុចអាន៖ ហេតុផល ៧យ៉ាង អ្នកគួរសម្រេចចិត្តរៀបការ

ប្រែសម្រួល៖ទ្រី រ៉ាវី ប្រភព៖boldsky