អ៊ុន សិទ្ធា ថា មានអ្នកចិញ្ចឹមមែន តែមិនមែនវ័យ ៤០ ឆ្នាំទេ គឺ ៦០ ឆ្នាំ ឯណោះ!

2014-12-22 22:54:03
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក អ៊ុន សិទ្ធា និយាយថា បច្ចុប្បន្នលោកពិតជាមានអ្នកចិញ្ចឹមពិតមែន ប៉ុន្តែ លោកបានបដិសេធន៍វ័យមិនមែន ៤០ឆ្នាំទេ គឺមានវ័យ ៦០ឆ្នាំឯណោះ។

ការនិយាយដូច្នេះតបទៅនឹងការចុះផ្សាយបណ្ដាញសារព័ត៌មានក្នុងស្រុកមួយថា លោកកំពុងមានស្ត្រីវ័យជាង ៤០ឆ្នាំចាំជួយឧបត្ថម្ភ។

តារាសម្ដែងលោក អ៊ុន សិទ្ធា ប្រាប់ថា៖ "ចង់ប្រាប់បងឯងថា មានពិតមែនអ្នកចិញ្ចឹមរាល់ថ្ងៃហ្នឹង តែមិនមែនអាយុ ៤០ឆ្នាំទេ អាយុរបស់គាត់ ៥០ទៅ ៦០ឆ្នាំហើយ គឺម្ដាយរបស់ខ្ញុំផ្ទាល់"។

អ៊ុន សិទ្ធា ក្នុងពិធីសម្ពោធរឿង វិញ្ញាណលោកម្ចាស់ក្រញូងកាលពីពេលកន្លងទៅ

លោកក៏បានបដិសេធន៍ចំពោះព័ត៌មានថា មានស្ត្រីវ័យជាង ៤០ឆ្នាំ ចាំជួយឧបត្ថម្ភគ្រប់យ៉ាង។ លោកលើកឡើងថា លោក មិនត្រូវការអ្នកចិញ្ចឹមឡើយ ព្រោះលោក ក៏ដូចជាក្រុមគ្រួសារអាចរកប្រាក់ចិញ្ចឹមខ្លួនឯងបាន ដោយមិនពឹងពាក់អ្នកដទៃ។

តារាធ្លាប់ឈ្នះពានអាណាចក្រតារាកាលពីឆ្នាំ២០១៣កន្លងទៅ លោក អ៊ុន សិទ្ធា ក៏សម្ដែងការហួសចិត្តនឹងការចុះផ្សាយព័ត៌មានរបស់ខ្លួនផងដែរ។

“ខ្ញុំគ្រាន់តែចង់ប្រាប់បងចុងក្រោយថា មិនមែនតារាខ្មែរទាំងអស់សុទ្ធតែចង់បានអ្នកចិញ្ចឹមទេ កេរ្តិ៍ឈ្មោះ និងកិត្តិយសជាអ្វីដែលខ្ញុំ ព្រមទាំងគ្រួសារចង់បានបំផុត"។ អ៊ុន សិទ្ធា បន្ថែម។

នាថ្ងៃទី ២៤ ខែធ្នូខាងមុខលោក អ៊ុន សិទ្ធា ត្រៀមនឹងឡើងទទួលពានមួយទៀតពីកម្មវិធី Apsara Award នៅសាលសន្និសីទចតុមុខ។ ឆ្នាំ២០១៤នេះលោកទទួលបានប្រជាប្រិយភាពជាខ្លាំងក្នុងចំណោមមហាជន បន្ទាប់ពីសម្ដែងខ្សែភាពយន្តជាច្រើនទទួលការចាប់អារម្មណ៍ពីទស្សនិកជន ជាពិសេសរឿង "ស្បែកគង់"៕