Empire Cyber Cafe បើកប្រកួត AK ជាមួយប្រាក់រង្វាន់ ៤០០ ដុល្លារ

2014-12-22 23:35:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ឱកាសបញ្ចេញសមត្ថភាពប្រយុទ្ធអនឡាញជាក្រុមរបស់ប្រិយមិត្តអ្នកកម្សាន្ត AK Online បានដល់ទៀតហើយ! ដើម្បីអបអរសាទរនូវការបើកហាងអ៊ីនធឺណិតថ្មី លោក ឡូត អៀងឃុន ម្ចាស់ណិត Empire Cyber Cafe បានបើកការប្រកួតស្វែងរកជើងខ្លាំង AK Online ប្រចាំណិត ដែលមានប្រាក់រង្វាន់សរុបរហូតដល់ ៤០០ ដុល្លារឯណោះ។

សម្រាប់ការប្រកួត AK Online នៅ Empire Cyber Cafe នេះ ប្រិយមិត្តគ្រប់រូប ទាំងអ្នកមានបទពិសោធន៍ មិនមានបទពិសោធន៍ ឬជាជើងខ្លាំងតំណាងប្រទេសក៏ដោយ អាចចុះឈ្មោះប្រកួតបានទាំងអស់ ដោយគ្រាន់តែបង្កើតគណនីសម្រាប់ប្រើប្រាស់កុំព្យូទ័រនៅ Empire Cyber Cafe ជាមុនសិន។

ការប្រកួតនឹងចាប់ផ្ដើមនៅថ្ងៃទី ២៧ ខែធ្នូ ឆ្នាំ ២០១៤ ហើយចាប់ពីថ្ងៃនេះរហូតដល់ថ្ងៃទី ២៥ គឺជារយៈពេលនៃការចុះឈ្មោះប្រកួតរបស់ក្រុមនីមួយៗ ខណៈថ្ងៃទី ២៦ គឺជាថ្ងៃចាប់ឆ្នោតស្វែងរកពូលប្រកួត ដែលសកម្មភាពទាំងអស់នេះនឹងធ្វើឡើងដោយផ្ទាល់នៅណិត Empire Cyber Cafe ដែលមានអាសយដ្ឋានផ្ទះលេខ 804A ផ្លូវកម្ពុជាក្រោម ជាប់ស្ថានីយប្រេងឥន្ធនៈ Total សន្ធរមុខ។

អាន៖ ទិដ្ឋភាពបើកឡានដេញបាញ់គ្នាដ៏គួរឲ្យរន្ធត់ជក់ចិត្តលើសមរភូមិ Death Race

ងាកមកមើលរង្វាន់វិញ ម្ចាស់ជយលាភីលេខ ១ នឹងទទួលបានប្រាក់រង្វាន់ចំនួន ២៥០ ដុល្លារអាមេរិក ខណៈម្ចាស់ជយលាភីលេខ ២ ទទួលបាន ១៥០ ដុល្លារអាមេរិក និងជយលាភីលេខ ៣ ទទួលបាន ១០០ ដុល្លារអាមេរិក។

បន្ថែមពីនេះ ដើម្បីលើកទឹកចិត្តដល់ម្ចាស់ហាងអ៊ីនធឺណិតដែលបានគាំទ្រ ហើយតែងតែជ្រើសយកសេវាកម្សាន្ត AK មកប្រកួត ក្រុមការងារសេវាកម្សាន្ត AK បានសម្រេចចិត្តរៀបចំរង្វាន់ជាសម្ភារៈប្រយុទ្ធមួយឈុត ដែលមានអនុភាពខ្លាំង និងសុពលភាពប្រើប្រាស់ចំនួន ១ ខែពេញ ជូនដល់ម្ចាស់ជយលាភីលេខ ១ ក្នុងការប្រកួតនោះផងដែរ។

អាន៖ ម្ចាស់ណិតជនជាតិចិនទទួល Sabay Coin ពីការរៀបចំប្រកួត Ak

ការចូលរួមឧបត្ថម្ភដល់ការប្រកួតនៅតាមបណ្ដាណិតនេះ គឺកើតមានឡើងចំពោះតែហាងអ៊ីនធឺណិតណាដែលបើកការប្រកួតស្វែងរកជើងខ្លាំងសេវាកម្សាន្តណាមួយរបស់ក្រុមគ្រួសារ Sabay Leng ហើយបានផ្ដល់ដំណឹងជូនក្រុមការងារ Sabay តែប៉ុណ្ណោះ។

Sabay Leng គាំទ្រការប្រកួតស្វែងរកជើងខ្លាំងប្រចាំណិតជានិច្ច៕

អត្ថបទ៖ ភីឆាយ