តារាចម្រៀង Jay Chou នឹងចូលរោងការលឿនជាងអ្នកគិតទៀត!

2014-12-23 23:24:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេលថ្មីៗនេះ កំពូលតារាចម្រៀង និងតារាសម្ដែងតៃវ៉ាន់ Jay Chou បានអះអាងថា លោកនឹងរៀបការជាមួយតារាបង្ហាញម៉ូដ Hannah Quinlivan មិនយូរប៉ុន្មានទៀតទេ។

Jay Chou និង Hannah Quinlivan

អាពាហ៍ពិពាហ៍របស់គូស្នេហ៍ទាំងពីរ នឹងធ្វើឡើងនៅថ្ងៃទី១៨ មករា ឆ្នាំ២០១៥ ខាងមុខនេះហើយ។ នេះបើយោងតាមការចុះផ្សាយរបស់សារព័ត៌មានក្នុងទីក្រុងតៃប៉ិ។ គិតមកត្រឹមថ្ងៃរៀបការ Jay Chou មានវ័យ៣៦ឆ្នាំ ដោយនេះជាការបកស្រាយផ្ទាល់របស់តារាសម្ដែងរូបនេះ។ ងាកមកនិយាយពីអនាគតភរិយារបស់ Jay Chou គឺនាង Hannah Quinlivan ដែលមានអាយុ ២១ ឆ្នាំនោះ ត្រូវបានគេសង្កេតឃើញថាមានពាក់ចិញ្ចៀននៅម្រាមដៃឆ្វេង សម្រាប់តំណាងអ្នកមានគូដណ្ដឹង។ ចំណែកឯ Jay Chou ក៏មានប្រតិកម្មតបតភ្លាមៗចំពោះរឿងចិញ្ចៀននេះដែរ។

មុនពេល Jay Chou សម្រេចចិត្តរៀបការជាមួយតារាបង្ហាញម៉ូដ Hannah Quinlivan លោកក៏ធ្លាប់បែកធ្លាយរូបភាពជាច្រើនសន្លឹកលើបណ្ដាញអ៊ីនធឺណិត ដែលបានបង្ហាញពីសកម្មភាពទំនាក់ទំនងជិតស្និទ្ធរបស់លោកជាមួយស្រីស្អាតតៃវ៉ាន់សញ្ជាតិអូស្ត្រាលី នៅឧទ្យាន Hyde Park ក្នុងទីក្រុងឡុងដុង។ ប៉ុន្តែ Jay Chou បានចេញមុខមកបដិសេធមិនទទួលស្គាល់ចំពោះពាក្យចចាមអារ៉ាមទាំងអស់នេះឡើយនាពេលនោះ។

លោកបានបញ្ជាក់ថា សកម្មភាពដែលគេឃើញទាំងនេះ អាចជារឿងភាន់ច្រឡំបន្តិចបន្តួចប៉ុណ្ណោះ ព្រោះពេលនោះជាការសម្ដែងសម្រាប់ថតដាក់ជាវីដេអូចម្រៀង។ Jay Chou ក៏បានបន្ថែមទៀតថា បើលោកមានបំណងណាត់ជួបស្រីៗពិតមែន លោកប្រាកដជារកកន្លែងស្ងាត់គ្មានអ្នកណាដឹងទេ។

Jay Chou កើតនៅទីក្រុងតៃប៉ិ នៃកោះតៃវ៉ាន់ ហើយមានអាជីពជាតារាចម្រៀង សម្ដែង អ្នកនិពន្ធបទចម្រៀង តន្ត្រីករ ព្រមទាំងជាអ្នកដឹកនាំទៀតផង។ លោកបានចេញលក់អាល់ប៊ុមចម្រៀងរបស់ខ្លួនជាង ៣០ លានហើយ បើគិតចាប់តាំងពីឆ្នាំ ២០០០ មក៕