សកម្មភាព Laura Mam សម្ដែងម្សិលមិញដើម្បីបានថវិកាជួយមន្ទីរពេទ្យគន្ធបុប្ផា

2014-12-24 17:37:28
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងកូនខ្មែរសញ្ជាតិអាមេរិក កញ្ញា Laura Mam ដែលធ្លាប់ទទួលបានភាពល្បីល្បាញ ដោយមានអ្នកចូលមើលចម្រៀងរបស់នាងដ៏ច្រើននៅក្នុងបណ្ដាញ YouTube កាលពីឆ្នាំកន្លងទៅ ឥឡូវនាងបានសហការជាមួយ Brown Coffee & Bakery និង Gong Cha Tea & Coffee ល្ងាចម្សិលមិញ ដើម្បីផ្សព្វផ្សាយអាល់ប៊ុមចម្រៀងថ្មីរបស់ខ្លួន ហើយថវិកាដែលទទួលបានពីការលក់អាល់ប៊ុមចម្រៀងនឹងយកទៅជួយមន្ទីរពេទ្យគន្ធបុប្ផា។

ការច្រៀងរបស់ Laura Mam បានធ្វើតែពីរទីតាំងប៉ុណ្ណោះ គឺនៅហាង Gong Cha IFL មុខវិទ្យាស្ថានភាសាបរទេស ថ្ងៃ ២៣ ធ្នូ ឆ្នាំ ២០១៤ ម៉ោង ៣ រសៀលម្សិលមិញ និង ទី ២៥ ខែ ធ្នូ ឆ្នាំ ២០១៥ នៅ Brown Coffee ផ្សារ TK ម៉ោង ៤ រសៀល។

អាល់ប៊ុមស៊ីឌីចម្រៀងរបស់ Laura Mam គឺ ១ បន្ទះ មានតម្លៃ ៤,៩៩ ដុល្លារ ហើយអ្នកដែលទិញនឹងទទួលបានភេសជ្ជៈពី Gong Cha។ ជាមួយគ្នានោះ ក៏មានការចុះហត្ថលេខា ក៏ដូចជាការថតរូបអនុស្សាវរីយជាមួយ Laura Mam ផងដែរ។ ចំពោះប្រាក់ដែលបានពីការលក់អាល់ប៊ុមស៊ីឌីចម្រៀងរបស់ Laura Mam នឹងត្រូវបញ្ជូនទៅជួយដល់មន្ទីរពេទ្យគន្ធបុប្ផាទាំងអស់។

លោក ថៃ ឈៀងម៉េង ប្រធានទីផ្សាររបស់ Brown និង Gong Cha បានឲ្យដឹងថា អាល់ប៊ុមស៊ីឌីចម្រៀងរបស់ Laura Mam គ្រោងដាក់លក់នេះ មានប្រមាណជា ៥០០ បន្ទះ ហើយត្រូវបានទទួលលក់សិទ្ធិផ្ដាច់មុខដោយ Brown និង Gong Cha ប៉ុណ្ណោះ។ ប្រធានទីផ្សាររូបនេះបានលើកឡើងថា មូលហេតុដែលនាំឲ្យក្រុមហ៊ុនរបស់លោកសម្រេចចិត្តចាប់ដៃគូសហការជា Laura Mam ដើម្បីជួយដល់មន្ទីរពេទ្យគន្ធបុប្ផា ក៏ព្រោះតែក្រុមហ៊ុនចង់រួមចំណែកជួយគាំទ្រផលិតផលជាស្នាដៃកូនខ្មែរ និង ចង់រួមចំណែកជួយដល់កិច្ចការសង្គម។

កញ្ញា Laura Mam បានលើកឡើងថា នាងសប្បាយចិត្តខ្លាំងណាស់ ដែលស្នាដៃសិល្បៈរបស់នាង បានរួមចំណែកដល់កិច្ចការសង្គមបែបនេះ ព្រោះតាមដែលនាងដឹងមន្ទីរពេទ្យគន្ធបុប្ផា គឺជាមន្ទីរពេទ្យតែ១គត់ក្នុងប្រទេសកម្ពុជា ដែលព្យាបាលកុមារកម្ពុជាដោយមិនយកប្រាក់ ហើយកំពុងតែខ្វះខាតខាងផ្នែកហិរញ្ញវត្ថុ។

ល្ងាចម្សិលមិញនេះ Fans បាននាំគ្នាមកទិញអាល់ប៊ុមស៊ីឌីចម្រៀងរបស់ Laura Mam ជាច្រើននាក់ ហើយពួកគេបានសម្ដែងទឹកមុខសប្បាយរីករាយខ្លាំងណាស់នៅពេលបានជួបតារាចម្រៀងដួងចិត្តរបស់ពួកគេ។ Laura Mam ស្ទើរតែរើខ្លួនមិនរួច ដោយសារតែ Fans បានមកសុំថតរូបជាមួយ។

តាមការប៉ាន់ប្រមាណរបស់ប្រធានទីផ្សារខាងលើ អាល់ប៊ុមស៊ីឌីចម្រៀងរបស់ Laura Mam ទាំង ៥០០ បន្ទះ ក្នុងរយៈពេល២ថ្ងៃនេះ អាចនឹងលក់អស់ទាំងអស់តែម្ដង ឬ អាចមិនគ្រប់ឡើយ ព្រោះគ្រាន់តែចាប់ផ្ដើមដាក់លក់ភ្លាម មាន Fans ច្រើនណាស់បានមកសម្រុកទិញ។ ថវិកាដែលបានមកពីការលក់ អាល់ប៊ុមស៊ីឌីចម្រៀង គ្រោងនឹងយកទៅប្រគល់ឲ្យមន្ទីរពេទ្យគន្ធបុប្ផា ឆាប់ៗខាងមុខនេះ។