កុំថាតែកម្ពុជា ម៉ាឡេស៊ីក៏បែកធ្លាយវិញ្ញាសាប្រលងដែរ

2014-09-30 23:18:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ការរឹតបន្តឹង និងការការពារ មិនឱ្យបែកវិញ្ញាសាពេលប្រលង ត្រូវបានធ្វើឡើងដើម្បីពង្រឹងគុណភាពសិស្ស តែទោះជាយ៉ាងណា ការបែកធ្លាយនៅតែកើតមាន កុំថាឡើយកម្ពុជានាឆ្នាំកន្លងមក សូម្បីម៉ាឡេស៊ីក៏ជួបបញ្ហានេះដែរ។

គេហទំព័រ Bangkokpost បានឱ្យដឹងថា ការបែកធ្លាយវិញ្ញាសាប្រលងថ្នាក់ទី៦ ដែលមានបេក្ខជន ៤៧០ ០០០នាក់ ក្នុងប្រទេសម៉ាឡេស៊ី ក្នុងខែនេះបានកើតឡើង។ ហេតុការណ៍នេះធ្វើឱ្យមាតាបិតាសិស្សជាច្រើនខឹងសម្បារ និងស្រងាកចិត្តយ៉ាងខ្លាំង ព្រោះកូនៗពួកគេនឹងត្រូវចូលប្រលងជាថ្មី។

នៅម៉ាឡេស៊ី ការប្រលងបញ្ចប់បឋមសិក្សា ឬ Primary School Achievement Test ជាការប្រលងដ៏សំខាន់សម្រាប់សិស្សថ្នាក់ទី៦ មកពីសាលារដ្ឋ និងឯកជនទាំងអស់។ ជាធម្មតាការប្រលង ប្រារព្ធធ្វើឡើងនៅសប្ដាហ៍ទី២ ក្នុងខែកញ្ញា។

មន្ត្រីក្រសួងអប់រំម៉ាឡេស៊ី កំពុងតាមដានលើការបែកធ្លាយវិញ្ញាសា និងកំពុងវែកមុខជនខិលខូច។ ឥលូវប៉ូលិស បានឃាត់ខ្លួនមនុស្ស៣០នាក់ ដែលរួមទាំងលោកគ្រូអ្នកគ្រូ នាយកសាលាម្នាក់ និងបុគ្គលិកក្រសួងអប់រំមួយចំនួន អ្នកកាសែតម្នាក់ និងវិស្វករម្នាក់។

លោករដ្ឋមន្ត្រី Ahmad Zahid Hamidi និយាយថា ការបែកធ្លាយនេះ ជាប់ពាក់ព័ន្ធជាមួយបណ្ដាញគ្រូបង្រៀន។ តែយ៉ាងណា ករណីនេះកំពុងស្ថិតនៅក្រោមការស៊ើបអង្កេត៕

ចុចអាន៖ ពេលភ្លៀងម្ដងៗ ទីក្រុងនៃប្រទេសក្បែរខាងយ៉ាងម៉េចដែរ?

ប្រែសម្រួល៖ អ៊ុំ សុភក្តិ

ប្រភព៖ bangkokpost