មុនឆ្នាំ២០១៥ មកដល់ មាស ចាន់ណា ឡើងធ្វើគ្រូធំនៅណាហ្គាខប

2014-12-25 22:27:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លិបបាល់ទាត់ណាហ្គាខប បានសម្រេចដំឡើងលោក មាស ចាន់ណា ពីជំនួយការគ្រូបង្វឹកធ្វើជាគ្រូបង្គោលរបស់ក្រុម ក្រោយការចាកចេញរបស់លោក ប្រាក់ សុវណ្ណារ៉ា បន្ទាប់ពីចប់រដូវកាលឆ្នាំ ២០១៤ កន្លងទៅ។

លោក មាស ចាន់ណា ធ្លាប់ជាចំណែកឱ្យក្រុមលើកពាន Hun Sen Cup 2013 (កាន់ពាន)

លោក មាស ចាន់ណា បានប្រាប់ Sabay ថាលោកបានចុះកិច្ចសន្យាផ្លូវការក្នុងរយៈពេលមួយឆ្នាំជាមួយលោក ឡាំ ទីនី អ្នកចាត់ការក្រុម នៅព្រឹកថ្ងៃទី ២៥ ធ្នូ ឆ្នាំ ២០១៤ នេះ។ ក្នុងនាមជាគ្រូបង្វឹកបង្គោលលោកបានស្នើសុំជ្រើសរើសជំនួយការសំខាន់ចំនួន ៦ នាក់ ដោយក្នុងនោះមានពេទ្យផងដែរ។

លោករីករាយចំពោះក្រុមហ៊ុនដែលបំពេញតាមការស្នើសុំរបស់កីឡាករនាពេលកន្លងមក មានទាំងដំឡើងប្រាក់ខែផងដែរ ហើយលោករំពឹងថាកីឡាករទាំងអស់នឹងខិតខំប្រឹងប្រែងទាំងអស់គ្នា ដើម្បីតបស្នងនឹងអ្វីដែលក្រុមហ៊ុនបានជួយ។

បុរសវ័យ ៣៤ ឆ្នាំរូបនេះធ្លាប់ជាប់ក្នុងក្រុមជម្រើសជាតិតាំងពីឈុត U-13 មកម៉្លេះ ហើយរហូតពីឆ្នាំ ១៩៩៩ ដល់ ២០០៩ លោកបានចូលក្នុងជម្រើសជាតិឈុតធំ។ លោកបានក្លាយជាសមាជិកក្នុងក្លិបណាហ្គាខបពីឆ្នាំ ២០០១ ដល់ ២០១០។ ចាប់ពីឆ្នាំ ២០១១ រហូតដល់រដូវកាល ២០១៤ លោកបានធ្វើជាគ្រូជំនួយនៅក្លិបក្នុងលីកកំពូលកម្ពុជា នេះ។ ក្រៅពីធ្វើជាគ្រូជំនួយប្រចាំក្លិប លោកក៏ធ្លាប់ជាគ្រូជំនួយក្នុងក្រុមជម្រើសជាតិដែរ ទាំងឈុតយុវជន និងជម្រើសជាតិឈុតធំផងដែរ៕

ចំពោះជីវប្រវត្តិរបស់លោក មាស ចាន់ណា Sabay នឹងជម្រាបជូននៅពេលក្រោយ។

អត្ថបទ៖ ម៉ឺន រស្មី