Laura Mam ច្រៀងនៅ Brown Coffee ផ្សារTK ល្ងាចមិញ មានអ្នកគាំទ្រច្រើន

2014-12-26 17:21:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ការច្រៀងរបស់តារាចម្រៀងកូនខ្មែរសញ្ជាតិអាមេរិក កញ្ញា Laura Mam សហការជាមួយ Brown Coffee & Bakery និង Gong Cha Tea & Coffee ដើម្បីផ្សព្វផ្សាយអាល់ប៊ុមចម្រៀងថ្មីរបស់ខ្លួន ដើម្បីរកថវិកាទៅជួយមន្ទីរពេទ្យគន្ធបុប្ផា បានបញ្ចប់ហើយកាលពីល្ងាចមិញនេះ នៅ Brown Coffee ផ្សារ TK ដោយកម្មវិធីនេះ មានអ្នកគាំទ្រជាច្រើន។

អាល់ប៊ុមស៊ីឌីចម្រៀងរបស់ Laura Mam មានប្រមាណជា ៥០០ បន្ទះ ត្រូវបានទទួលលក់សិទ្ធិផ្ដាច់មុខដោយ Brown និង Gong Cha ក្នុង ១បន្ទះ មានតម្លៃ ៤,៩៩ ដុល្លារ។ អ្នកដែលទិញនឹងទទួលបានភេសជ្ជៈ ១កែវ ជាមួយគ្នានោះ ក៏មានការចុះហត្ថលេខា ក៏ដូចជាការថតរូបអនុស្សាវរីយជាមួយ Laura Mam ផងដែរ។ ចំពោះប្រាក់ដែលបានពីការលក់អាល់ប៊ុមស៊ីឌីចម្រៀងរបស់ Laura Mam នឹងត្រូវបញ្ជូនទៅជួយដល់មន្ទីរពេទ្យគន្ធបុប្ផាទាំងអស់។

លោក ថៃ ឈៀងម៉េង ប្រធានទីផ្សាររបស់ Brown និង Gong Cha បានឲ្យដឹងថា ថវិកាដែលបានមកពីការលក់អាល់ប៊ុមស៊ីឌីចម្រៀងរបស់ Laura Mam គ្រោងនឹងយកទៅជូននៅមន្ទីរពេទ្យគន្ធបុប្ផានៅ ឆាប់ៗខាងមុននេះ។ ចំនួនប្រាក់ដែលបានមកពីការលក់ នៅមិនទាន់ដឹងនៅឡើយទេ ប៉ុន្តែ ប្រធានទីផ្សាររូបនេះ សម្ដែងសុទិដ្ឋិនិយមថា អាល់ប៊ុមស៊ីឌីចម្រៀងរបស់ Laura Mam ទាំង៥០០បន្ទះ នោះច្បាស់ជាលក់អស់ជាក់ជាមិនខាន។

ការលើកឡើងរបស់កញ្ញា Laura Mam ទៅកាន់អ្នកគាំទ្ររបស់នាងនៅកាលពីល្ងាចមិញ មិនខុសកាលដែលនាងជួបអ្នកគាំទ្រ របស់នាងនៅ Gong Cha IFL មុខវិទ្យាស្ថានភាសាបរទេស ពីថ្ងៃ ២៣ ធ្នូ ឆ្នាំ ២០១៤ ឡើយ។ តារាចម្រៀងកូនខ្មែរសញ្ជាតិអាមេរិកទទួលបានភាពល្បីល្បាញក្នុងបណ្ដាញ YouTube បាននិយាយថា នាងពិតសប្បាយចិត្តខ្លាំងណាស់ ដែលស្នាដៃសិល្បៈរបស់នាង បានរួមចំណែកដល់កិច្ចការសង្គមបែបនេះ ព្រោះតាមដែលនាងដឹងមន្ទីរពេទ្យគន្ធបុប្ផា គឺជាមន្ទីរពេទ្យតែ១គត់ក្នុងប្រទេសកម្ពុជា ដែលព្យាបាលកុមារកម្ពុជាដោយមិនយកប្រាក់ ហើយកំពុងតែខ្វះខាតខាងផ្នែកហិរញ្ញវត្ថុ។

អ្នកគាំទ្រសុទ្ធសឹងតែជាយុវវ័យបាននាំគ្នាមកគាំទ្រLaura Mam ជាច្រើន ហើយពួកគេបានសម្ដែងទឹកមុខសប្បាយរីករាយ ខ្លាំងណាស់នៅពេលបានជួយតារាចម្រៀងដួងចិត្តរបស់ពួកគេ។ Laura Mam ក្នុងដៃកាន់ហ្គីតា លេងភ្លេង និង ច្រៀងយ៉ាងសប្បាយរីករាយ ជាមួយគ្នានោះក៏មានក្រុមរាំ Super K Cambodia ជួយរាំផងដែរ។ ច្រៀងផងរាំផង Laura Mam ពិតជាធ្វើឲ្យអ្នកគាំទ្រនាងពេញចិត្ត ហើយនាងស្ទើរតែរើខ្លួនមិនរួចដោយសារតែ Fans បានមកសុំថតរូបជាមួយ ទុកជាអនុស្សាវរីយ។

ការច្រៀងរបស់ Laura Mam ដើម្បីផ្សព្វផ្សាយលក់អាល់ប៊ុមចម្រៀងថ្មីរបស់ខ្លួន ដើម្បីយកថវិកាជួយមន្ទីរពេទ្យគន្ធបុប្ផា បានធ្វើតែពីរទីតាំងប៉ុណ្ណោះ គឺនៅហាង Gong Cha IFL មុខវិទ្យាស្ថានភាសាបរទេស កាលថ្ងៃ ២៣ ធ្នូ ឆ្នាំ ២០១៤ ម៉ោង ៣ រសៀលម្សិលមិញ និង ល្ងាចមិញនេះ នៅ Brown Coffee ផ្សារ TK ទួលគោក។ Sabay Digital Corp ក៏បានចូលរួមឧបត្ថម្ភ ក្នុងការផ្សព្វផ្សាយកម្មវិធីនេះផងដែរ៕