អ៊ឹម ជីវ៉ា រួមជាមួយវិទ្យុ ABC រកប្រាក់បាន១៣០០ ដុល្លារ ជួយបូជាសពតារាបង្ហាញម៉ូដ អ៊ុល សម្ភស្ស

2014-12-26 23:00:10
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមសង្គម facebok តារាសម្ដែង អ៊ឹម ចីវ៉ា នៅរសៀលនេះ បានប្រាប់ឲ្យដឹងថា លោក រួមទាំងក្រុមការងារវិទ្យុABC ព្រមទាំងសប្បុរសជនផ្សេងទៀតបានអំពាវនាវ ស្វែងរកប្រាក់បានចំនួន១៣០០ដុល្លារ ដើម្បីយកមក ឲ្យថ្លៃ មឈូស និង ថ្ងៃ បូជាសព តារាសម្ដែង និងបង្ហាញម៉ូដ កញ្ញា អ៊ុល សម្ភស្ស ដែលបានចងករសម្លាប់ខ្លួនកាលពីថ្ងៃទី២៤ ធ្នូ ២០១៤ កន្លងទៅ។

លោក អ៊ឹម ជីវ៉ា បានសរសេរថា សពរបស់តារាសម្ដែងនិងបង្ហាញម៉ូដកញ្ញា អ៊ុល សម្ភស្ស ហៅស្រីស្រស់បានបូជារួចរាល់ហើយនៅថ្ងៃ២៥ ធ្នូ ម្សិលមិញ ក៏ប៉ុន្តែទម្រាំបានបូជាគឺត្រូវជួបទុក្ខលំបាកជាច្រើន។

លោកបានលើកឡើងថា សពតារាស្រីម្នាក់នេះគ្មានញត្តិសន្តាននៅភ្នំពេញឡើយ ហើយប៉ូលិសមិនឲ្យយកទៅបូជាទេ ព្រោះគ្មានអ្នកធានា អ្វីពិសេសនោះគឺគ្មានប្រាក់ទិញក្ដារមឈូស គ្មានលុយសម្រាប់បូជាសព និង គ្មានលុយធ្វើបុណ្យ។ លោក អ៊ឹម ជីវ៉ា បានបន្តថា ក្រុមរបស់លោកបានផ្ដិតមេដៃ ធានា ដើម្បីយកសពទៅបូជា ជាមួយគ្នានេះក៏បានប្រកាសតាមវិទ្យុABC ស្វែងរកសប្បុរសជននានា នៅម៉ោងប្រហែល៣រសៀល ម្សិលមិញនេះទទួលបានទឹកប្រាក់ចំនួន ១៣០០ ដុល្លារ។

លោកបានឲ្យដឹងបន្ថែមថា នៅប្រហែលម៉ោងមួយម្សិលមិញ យាយនិងម្ដាយមីង សពតារាស្រីម្នាក់នេះ ដែលមានស្រុកកំណើតមកពីខេត្ត កំពង់ស្ពឺ បានមកដល់ ហើយក៏សម្រេចដឹក សពចេញពីវត្តស្ទឹងមានជ័យ យកទៅបូជា នៅវត្ត អង្គតាមិញ នៅម៉ោងប្រហែល៥ល្ងាច។

លោកបានប្រាប់ទៀតថា ប្រាក់១៣០០ដុល្លារ ដែលប្រមូលបានពីសប្បុរសជននានានោះ បានប្រគល់ឲ្យក្រុមគ្រួសារ ដោះស្រាយចំណាយទៅលើការបូជា និង ចាត់ចែងលើការចំណាយផ្សេងៗ។

តាមការបញ្ជាក់ពីលោក អ៊ឹម ជីវ៉ា បុណ្យ៧ថ្ងៃ របស់សព កញ្ញា អ៊ុល សម្ភស្ស នឹងត្រូវធ្វើនៅថ្ងៃទី៣០ ធ្នូ ឆ្នាំ ២០១៤ នៅវត្តអង្គតាមិញតែម្ដង៕