ថន លក្ខិណា៖ "ចំណេះដឹងសំខាន់ជាពន្លឺនៃជីវិត"

2014-10-01 17:32:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្បិតតែអាជីពសិល្បៈជាឆ្នាំងបាយប្រចាំថ្ងៃ ប៉ុន្តែ បំណិនជីវិតសំខាន់បំផុតគឺការសិក្សា ឬការក្រេបចំណេះដឹង។ "ចំណេះដឹងសំខាន់ ជាពន្លឺនៃជីវិត"។ ទាំងនេះគឺជាការលើកឡើងរបស់ កញ្ញា ថន លក្ខិណា ពិធីការិនី និង តារាសម្ដែង បាននិយាយប្រាប់ Sabay នាពេលថ្មីៗនេះ។

សូមចុចអាន៖ “ព្រាយខ្លា” ពីប្រទេសកម្ពុជាបង្កចលាចលផ្អើលអ្នកស្រុកថៃ

កញ្ញា ថន លក្ខិណា ដែលកំពុងរវល់ការងារសិល្បៈផង និង ការសិក្សាផ្នែកធនាគារ ឆ្នាំ ទី ៣ នៃសាកលវិទ្យាល័យជាតិគ្រប់គ្រង បាននិយាយថា បើទោះបីសព្វថ្ងៃរវល់នឹងការងារសិល្បៈក៏ដោយ ក៏កញ្ញាថា៖ "ខ្ញុំមិនបោះបង់ការសិក្សាចោលនោះទេ បើទោះបីខ្ញុំកំពុងរវល់ការងារសិល្បៈច្រើនយ៉ាងណាក្ដី"។

ការងារសិល្បៈ និង ការសិក្សា កញ្ញា ថន លក្ខិណា បានបញ្ជាក់ថា នាងបានបែងចែកពេលវេលាច្បាស់លាស់ដោយធ្វើយ៉ាងណាមិនឲ្យប៉ះពាល់ដល់ការសិក្សានោះទេ។ "ប្រសិនបើខ្ញុំធ្វើកម្មវិធី គឺខ្ញុំ រកពេលណាដែលមិនឲ្យប៉ះពាល់នឹងម៉ោងការសិក្សា ហើយប្រសិនម្ដងម្កាលត្រូវថតស្ព៉ត គឺនាងសុំច្បាប់សាលាត្រឹមត្រូវ ប៉ុន្តែ បើថតរឿងអីហ្នឹង ខ្ញុំរកពេលច្បាស់ណាស់ធ្វើម៉េចថតមិនឲ្យប៉ះម៉ោងសិក្សាឡើយ"។

កញ្ញា ថន លក្ខិណា បានលើកឡើងថា ពេលខ្លះមានការលំបាកដែរ តែធ្វើម៉េចបើនាងនៅមិនទាន់រៀនចប់ ដូច្នេះ ទ្រាំសិក្សាផង និង ធ្វើការងារផង ព្រោះថា ការងារសិល្បៈ គឺជា ឆ្នាំងបាយដ៏សំខាន់មួយដែលមិនអាចបោះបង់ចោលបាន។

“តែការសិក្សាក៏រឹតតែសំខាន់ប្រសិនបើយើងរៀនបានច្រើន ការនិយាយស្ដីក៏សម្បូរវោហារ ពោរពេញដោយចំណេះដឹង ដូច្នេះ ខ្ញុំយល់ថា ការសិក្សានឹងជួយជំរុញឲ្យខ្ញុំធ្វើការងារលើវិថីសិល្បៈបានជោគជ័យ ព្រោះការសិក្សា គឺជា ឃ្លាំងចំណេះដឹងដែលមិនចេះរីងស្ងួត"។

ប្រវត្តិសង្ខេប ថន លក្ខិណា

នៅអំឡុងឆ្នាំ ២០១១ កញ្ញា ថន លក្ខិណា បានបញ្ចប់ការសិក្សាថ្នាក់បាក់ឌុប ហើយបន្តចូលរៀននៅសាកលវិទ្យាល័យជាតិគ្រប់គ្រងផ្នែកធនាគារ។ ថន លក្ខិណា កើតនៅថ្ងៃទី ២២ ខែធ្នូ ឆ្នាំ ១៩៨៩ ក្នុងស្រុកមណ្ឌលសីមា ខេត្តកោះកុង ដែលមានបងប្អូន ៤ នាក់ (ប្រុស១ ស្រី៣) ដោយនាង គឺជា កូនពៅ បានបញ្ជាក់ប្រាប់ថា ហេតុតែនាងចាប់ជំនាញផ្នែកធនាគារ ដោយសារ មុខវិជ្ជានេះងាយស្វែងរកការងារ។ ទោះបីជាយ៉ាងណាក៏ដោយនាងបាននិយាយថា ជំនាញអ្វីមិនសំខាន់នោះទេ ឲ្យតែយើងរៀនចេះ គឺអាចស្វែងរកការងារបានដូចគ្នា។

កញ្ញា ថន លក្ខិណា មានកម្ពស់ខ្ពស់ស្រឡះ ១៦៥ សង់ទីម៉ែត្រ។ នាងមានឪពុកឈ្មោះ លី ថន អាយុ ៥៤ ឆ្នាំ ជាអាជីវករ និង ម្ដាយឈ្មោះ យិន សុផាន អាយុ ជាង ៥០ ឆ្នាំ ជាស្ត្រីមេផ្ទះ បានរំលឹកពីប្រវត្តិសិក្សារបស់ខ្លួនថា កាលពីនៅក្មេងនាងរៀនត្រឹមថ្នាក់ទីពីរប៉ុណ្ណោះ ក៏ត្រូវម្ដាយ និង បងៗ នាំយកចេញទៅកាន់ទឹកដីខេត្ត ត្រាត ប្រទេសថៃ ដែលមានព្រំប្រទល់ជាប់នឹងខេត្តកោះកុង ដើម្បីធ្វើការផ្សងព្រេងនៅក្នុងប្រទេសថៃ។

នាងលើកឡើងពីអតីតកាលនោះថា «កាលនោះម៉ាក់ខ្ញុំ គាត់ឆ្អែតចិត្តនឹងប៉ាខ្ញុំ ទើបគាត់សម្រេចចិត្តនាំកូនប្រុសស្រីចេញទៅស្រុកថៃ ដើម្បីគេចចេញពីប៉ា ម្យ៉ាងពួកខ្ញុំចង់ចេញទៅធ្វើការរកលុយផង»។

ថន លក្ខិណា អះអាងថា ជីវិតនៅក្នុងប្រទេសថៃរបស់ពួកនាង គឺមើលមិនឃើញភាពសំបូរសប្បាយនោះទេ ដោយសារតែទាំងម្ដាយ និង បងៗរបស់នាង ត្រូវពឹងអាស្រ័យលើអាជីពអូសត្រី និង ស៊ីឈ្នួល តែមួយចម្អែតឲ្យជនជាតិថៃ។

ទោះយ៉ាងណា នាងក៏ត្រូវបានម្ដាយ និង បងៗ ផ្ដល់លទ្ធភាពឲ្យចូលសាលាក្នុងប្រទេសថៃ ហើយរៀនបានដល់ចប់ថ្នាក់ទី ៩ នៅក្នុងខេត្តត្រាតនោះដែរ។ ម្ល៉ោះហើយ ទើបនាងអាចនិយាយ និង សរសេរភាសាថៃ បានស្ទាត់ជំនាញដូចភាសាខ្មែរ។ តារាផ្សងព្រេងចេញក្រៅទឹកដីកំណើតរូបនេះ បាននិយាយថា «កាលនោះពួកខ្ញុំស្អីក៏ធ្វើដែរ ព្រោះយើងទៅស៊ីឈ្នួលគេ អ៊ីចឹងហើយទើបខ្ញុំតាំងចិត្តថា ត្រូវតែខំរកប្រាក់ដើម្បីជួយម៉ាក់ខ្ញុំ កុំឲ្យគាត់វេទនា ព្រោះខ្ញុំស្អប់ភាពក្រីក្រណាស់»។

នៅឆ្នាំ ២០០៥ នាងបានផ្លាស់មករស់នៅទី ក្រុងភ្នំពេញ បន្ទាប់ពីការងាររកប្រាក់នៅក្នុងប្រទេសថៃ មិនសូវអំណោយផល ដែលកាលនោះក៏ស្របគ្នា គម្រោងចង់ឡើងមករកការងារធ្វើនៅភ្នំពេញផង។

តារារូបនេះថ្លែងថា «គ្រាន់តែសន្សំបានប្រាក់មួយចំនួន ម៉ាក់ និង បងៗខ្ញុំក៏ចេញពីថៃ មកភ្នំពេញភ្លាម ព្រោះនៅថៃ វាពិបាករកលុយ ហើយការផ្សងព្រេងលើកទីពីររបស់ពួកខ្ញុំ ក៏ដូចការគ្រោងទុកមែន ព្រោះមកដល់ពេលនេះ ក្រៅពីបងៗរបស់ខ្ញុំ គាត់មានមុខជំនួញផ្ទាល់ខ្លួន និង មានការងារច្បាស់លាស់ គឺ សូម្បីតែខ្ញុំក៏ក្លាយជាអ្នកសិល្បៈ ដែលអាចចាត់ទុកថា កំពុងមានអនាគតដែរ»។ នេះជាអ្វីដែលថន លក្ខិណា និង បងៗ បានរួមគ្នាប្រឹងប្រែង បើទោះជាមិនសូវទទួលភាពកក់ក្ដៅ ពីលោកឪពុក ដូចក្មេងៗដទៃ។

ទោះយ៉ាងណារហូតមកដល់ពេលនេះ ថន លក្ខិណា មិនបានខឹងសម្បានឹងឪពុកខ្លួនឡើយ ក្នុងពេលដែលមួយរយៈនេះ លោកក៏ទទួលស្គាល់នូវកំហុសឆ្គង ដោយបានបង្ហាញការគិតគូរចំពោះរូបនាង ក៏ដូចជាបងៗផ្ទុយពីអតីតកាលដែរនោះ។ តារារូបនេះនិយាយថា «រឿងចាស់ៗ ខ្ញុំមិនអាចថាអ្នកណាខុសអ្នកណាត្រូវបានទេ ប៉ុន្តែខ្ញុំថា បើគ្មានរឿងអ៊ីចឹងទេ គឺខ្ញុំប្រហែលជាគ្មានចេះតស៊ូ រហូតដល់មានអនាគតបែបហ្នឹងឡើយ»។

និយាយអំពីការប្រលូកក្នុងពិភពសិល្បៈលើកដំបូង គឺ កញ្ញា ថន លក្ខិណា បានជាប់ជាស្រីស្អាតរបស់មជ្ឈមណ្ឌល BS ហើយទទួលបានចំណាត់ថ្នាក់លេខ ១ កាលពីឆ្នាំ ២០០៦។ ចាប់តាំងពីពេលនោះមក នាងក៏មានឱកាសត្រូវខាងផលិតកម្មហៅថតពាណិជ្ជកម្ម និង ខារ៉ាអូខេជាហូរហែ រហូតមានកេរ្តិ៍ឈ្មោះដល់បច្ចុប្បន្ន។

នៅចុងឆ្នាំ ២០០៦ នាងបានហក់ចូលមកកាន់តំណែងជាពិធីការិនីជាបន្តបន្ទាប់នៅស្ថានីយ ទូរទស្សន៍ប៉ុស្តិ៍លេខ ៣ គឺ កម្មវិធី ស្ត្រីមេផ្ទះ។ នៅ ប៉ុស្តិ៍លេខ ៩ ក្នុងឆ្នាំ ២០០៨ កម្មវិធីផ្សាយផ្ទាល់ តន្ត្រីថ្ងៃអាទិត្យ និង ចុងក្រោយគេ គឺប៉ុស្តិ៍ស៊ីធីអិន កាលពីចុងឆ្នាំ ២០០៩ ក្នុងកម្មវិធី «សុខគា លក្ខិណា ប៊ីអាយជី» រហូតមកដល់សព្វថ្ងៃ។

ទោះបីជា កញ្ញា ថន លក្ខិណា កំពុងជោគជ័យលើវិថីសិល្បៈយ៉ាងណាក៏ដោយ ក៏នាងអះអាងថា នាងនឹងបន្តការសិក្សារបស់នាងឲ្យចប់ចុងចប់ដើម ព្រោះថា ការសិក្សាមានតម្លៃណាស់សម្រាប់ជីវិត។ នាងបានបញ្ជាក់ថា "ចំណេះគឺជាពន្លឺសម្រាប់ជិវិត"៕

ព័ត៌មានកម្សាន្ដជាច្រើនទៀត ចុចត្រង់នេះ

អត្ថបទ៖ ប៊ិន ប៊ុណ្ណា