ភីហ្សា Domino ល្បីរបស់អាមេរិក នឹងមានវត្តមាននៅកម្ពុជាឆាប់ៗ

2015-01-05 17:25:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន CBM Corporation បានចាប់ដៃជាមួយក្រុមហ៊ុន Evolution Capital PLC ដើម្បីនាំយកភីហ្សារសជាតិលំដាប់អន្តរជាតិថ្មីមកកាន់ទីផ្សារកម្ពុជា គឺ Domino's Pizza។ ពិធីចុះហត្ថលេខារួមគ្នាលើកិច្ចព្រមព្រៀងនាំយកស្លាកយីហោដ៏ល្បីនៅលើពិភពលោកមួយនេះ បានចាប់ផ្ដើមនៅសណ្ឋាគារ អាំងទែរកុងទីណង់-តាល់ ព្រឹកថ្ងៃទី ៥ ខែ មករា ឆ្នាំ ២០១៥ អម្បាញ់មិញនេះ។

វត្តមានក្នុងពិធីនោះរួមមាន នាយកប្រតិបត្តិ Evolution Capital PLC លោក Sanjay Singh តំណាង CBM លោក គួច សុខលី និង លោក ជី សិលា, លោកស្រី Julie Chung ភារធារី និង ជាតំណាងស្ថានទូតអាមេរិក, ក្រុមការងារ Domino's Pizza កម្ពុជា និង អាស៊ីប៉ាស៊ីហ្វិក ព្រមទាំងភ្ញៀវកិត្តិយស និង ក្រុមអ្នកសារព័ត៌មាននានា។

ចប់ពិធីចុះហត្ថលេខារួមគ្នា លោក គួច សុខលី ប្រធានក្រុមហ៊ុន CBM Corporation និង ជាតំណាង Domino's Pizza នៅកម្ពុជា បាននិយាយថា Domino ភីហ្សា គឺជា ក្រុមហ៊ុនចែកចាយភីហ្សាលេខ ១ ប្រចាំពិភពលោក មានហាងជាង ១១២៥០ ហាងនៅក្នុងប្រទេសចំនួន ៧៥ ដែលបានបម្រើអតិថិជនរាប់លាននាក់ជារៀងរាល់ថ្ងៃនៅជុំវិញពិភពលោក។ ដូច្នេះនៅថ្ងៃនេះ Domino ភីហ្សាបានមកដល់ប្រទេសកម្ពុជា។

“ថ្ងៃនេះ គឺជា សុបិនក្លាយជាការពិតដោយសារតែការគាំទ្រពីមិត្តសម្លាញ់របស់ខ្ញុំបាទហើយក៏ជាដៃគូសហការដ៏យូរអង្វែង គឺលោក សិលា និង មិត្តភ័ក្ដិ និង ក្រុមការងារ។ បើគ្មានការខិតខំប្រឹងប្រែង និង ការប្ដេជ្ញាចិត្តរបស់ពួកគេ ក្រុមហ៊ុន CBM មិនទទួលបានជោគជ័យនោះទេ នោះវានៅតែជាក្ដីសុបិនមួយប៉ុណ្ណោះ"។

លោក Sanjay Singh នាយប្រតិបត្តិ Evolution Capital & Member of BOD, D. PIZZA PLC បាននិយាយដែរថា "ថ្ងៃនេះខ្ញុំបាទមានសោមនស្សក្រៃលែងដែលបានចុះហត្ថលេខារួមគ្នាជាមួយ CBM Corporation និង បង្ហាញគម្រោងសម្រាប់ Domino's Pizza ប្រចាំនៅកម្ពុជា។ លោកបានថ្លែងទៀតថា ការចាប់ដៃគូជាមួយក្រុមហ៊ុន CBM គឺជឿជាក់ថា សម្ពន្ធភាពជាមួយ CBM មិនត្រឹមតែអាចឲ្យ Domino ពង្រីកខ្លួនឆាប់រហ័សក្នុងទីផ្សារក្នុងប្រទេសនេះប៉ុណ្ណោះទេ តែក៏ផ្ដល់ឱកាសដល់ក្រុមហ៊ុនម្ហូបអាហារក្នុងស្រុកកាន់តែរីកធំធាត់ជាងមុនផងដែរ។

លោកបានឲ្យដឹងទៀតថា Domino បានទាក់ទាញអតិថិជនក្នុងចំនួនដ៏គួរឲ្យកត់សម្គាល់ទូទាំងពិភពលោក ហើយយើងជឿជាក់ថា អតិថិជនកម្ពុជាត្រៀមខ្លួនរួចរាល់ដើម្បីស្វាគមន៍អ្វីដែលក្រុមហ៊ុននឹងផ្ដល់ជូនដោយឈរលើគុណភាព ពិសេស គឺ រសជាតិ និង ការចម្អិនភ្លាមៗ។ អ្វីដែល Domino ផ្ដល់ជូនអតិថិជន គឺគ្រប់ភីហ្សាទាំងអស់ធ្វើភ្លាមៗដោយដៃចុងភៅដ៏ចំណាន ដោយប្រើគ្រឿងផ្សំប្រកបដោយរូបមន្តដ៏ពិសេសគុណភាពខ្ពស់បំផុត ពិសេសទៅទៀតនោះ គឺប្រើ Mozzarella Cheeses ១០០%។

លោកបានបញ្ជាក់ទៀតថា ក្រៅពីនេះ Domino ក៏ផ្ដោតសំខាន់ទៅលើសេវាដឹងជញ្ជូនដល់អតិថិជនដែរ ក្នុងនោះ យើងមានមោទនភាពក្នុងនាមជាអ្នកជំនាញសេវាដឹកជញ្ជូនអតិថិជនលេខ១ក្នុងលោក។ "យើងប្រើរយៈពេល៣០នាទីដើម្បីដឹកជញ្ជូនដល់អតិថិជនក្រោយពីកុម្ម៉ង់"។

លោកស្រី Julie Chung ភារធារី និង ជាតំណាងស្ថានទូតអាមេរិក បានមានប្រសាសន៍ដែរថា ចំណុចមួយដ៏សំខាន់បំផុតគឺស្ថានទូតសហរដ្ឋអាមេរិកបានគាំទ្រក្រុមហ៊ុនអាមេរិក និង ជំរុញលើកកម្ពស់ទំនាក់ទំនងពាណិជ្ជកម្មរវាងប្រទេសទាំងពីរឲ្យកាន់តែជិតស្និទ្ធ។ ការភ្ជាប់ទំនាក់ទំនងពាណិជ្ជកម្ម និងសេដ្ឋកិច្ចបានជួយផ្សព្វផ្សាយការងារក្នុងប្រទេសទាំងពីរ បង្កើនស្ថិរភាព និង ធ្វើឲ្យជីវភាពរស់នៅប្រជាពលរដ្ឋកាន់តែប្រសើរឡើង។ ការធ្វើការរួមគ្នាជាមួយពាណិជ្ជកម្មអាមេរិក យើងសង្ឃឹមពង្រីកអាជីវកម្មរបស់យើងទៅកាន់តំបន់ ហើយការភ្ជាប់ទំនាក់ទំនងរបស់យើងនឹងជ្រៀតចូលឲ្យកាន់តែជ្រៅក្នុងវិស័យចម្រុះកាន់តែច្រើន។

លោកស្រី Julie Chung បានរំលឹកថា "វាដិតជាប់ក្នុងអារម្មណ៍ជានិច្ច វាពិតជារំភើបណាស់ដែលមានវត្តមានហាង ភីហ្សា Domino នៅកម្ពុជា។ ឆ្លងកាត់ការងារដ៏លំបាក ផលិតផលដ៏អស្ចារ្យ និងសេវាកម្មដ៏គួរឲ្យភ្ញាក់ផ្អើល កាលទសវត្សរ៍ឆ្នាំ ១៩៦០ មានហាងតែមួយគត់ ប៉ុន្តែរហូតដល់សព្វថ្ងៃនេះក្រុមហ៊ុនបានរីកចម្រើនរហូតដល់ចំនួន ១១២៥០ ហាងនៅទូទាំង៧៥ប្រទេសក្នុងពិភពលោក"។

លោកស្រី បានបន្ថែមថា Domino ដែលបានចាប់ផ្ដើមដំបូងនៅជិតសាកលវិទ្យាល័យ Eastern Michigan ក្នុងទីក្រុង Ypsilanti រដ្ឋ Michigan បានក្លាយជាទីពេញនិយមសម្រាប់សិស្សនិស្សិតមហាវិទ្យាល័យ និងសាកលវិទ្យាល័យ ជាពិសេសអំឡុងពេលប្រឡងឆមាស និង ប្រឡងបញ្ចប់ការសិក្សា៕

អត្ថបទ៖ ប៊ិន ប៊ុណ្ណា