អ៊ិន សុភិន ថា តម្រូវការទីផ្សារខានមិនបានទើបឱ្យកូនស្រីគ្រងតំណែងតួឯកតទៅទៀត!

2015-01-09 19:00:42
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក អ៊ិន សុភិន និយាយថា តម្រូវការទីផ្សារពីទស្សនិកជនទើបលោកនៅបន្តឱ្យកូនស្រីគ្រងតួឯកតទៅទៀតក្នុងខ្សែភាពយន្តថ្មីរឿង "ខ្មោចទឹក" ដែល ទើបក្រុងពាលីព្រឹកមិញ។ ការនិយាយដូច្នេះខណៈកូនស្រីរបស់លោក គឺកញ្ញា ភិន សុដាលីស ធ្លាប់ធ្វើជាតួឯកជាង ១០រឿងមកហើយក្នុងផលិតកម្ម មហាហង្ស ហើយរឿងចុងក្រោយដែលនាងសម្ដែងជាតួឯក "អាព្រឿងងាប់ហើយ"។

http://youtu.be/5JSZe3qDCzs

ផលិតករ និង ជាចាងហ្វាងផលិតកម្ម មហាហង្សលោក អ៊ិន សុភិន និយាយថា៖ "ការដែលខ្ញុំធ្វើដូច្នេះ ដោយសារទីផ្សារនៅតែគាំទ្រគាត់ខ្លាំង ហើយគាត់អាចសម្ដែងបានគ្រាប់រសជាតិ"។

លោក អ៊ិន សុភិន បន្តថា ប្រសិនបើទីផ្សារមិនត្រូវការ ក៏លោកមិនជ្រើសរើសកូនស្រីរបស់ខ្លួនឱ្យគ្រងតួឯកតទៅដែរ។ ប្រការនេះលោកចង់បញ្ជាក់ថា ខ្សែភាពយន្តមួយៗចំណាយការផលិតអស់ដើមទុនច្រើន ហើយម្យ៉ាងទៀតបើរើសតួខុសអាចខូចសាច់រឿង និងលែងមានទំនុកចិត្តពីទស្សនិកជនពេលដាក់បញ្ចាំងលើទីផ្សារ។

នៅពេលចោទសួរថា តើការយកកូនស្រីកញ្ញា ភិន សុដាលីស ជាតួឯកក្នុងរឿងថ្មី "ខ្មោចទឹក" អាចឱ្យនាងមានប្រជាប្រិយភាពខ្ពស់ថែមទៀត ឬអាចធ្លាក់ប្រជាប្រិយភាពជាងមុន។ ផលិតករលោក អ៊ិន សុភិន លើកឡើងថា កូនស្រីខ្លួននឹងអាចមានប្រជាប្រិយភាពកាន់តែខ្លាំង។

លោក អ៊ិន សុភិន ផ្ដល់បទសម្ភាសន៍នាពិធីក្រុងពាលីរឿង ខ្មោចទឹក ព្រឹកមិញ

ការនិយាយបែបនេះ ដោយលោកសម្អាងទៅលើខ្សែភាពយន្តថ្មីខាងលើ មានភាពទាក់ទាញជាងរឿងមុនៗ ដែលលោកធ្លាប់ផលិត ហើយតារាចូលរួមសម្ដែង គឺសុទ្ធសឹងតែជាតារាល្បីៗ។

ផលិតកររូបនេះបន្តថា ការយកកូនស្រីឱ្យសម្ដែងតួឯកតទៅទៀតមិនមានអ្វីប្លែកទេ ព្រោះផលិតករក្នុងស្រុកដទៃទៀតក៏ជ្រើសរើសតែតួដដែលៗ ក្នុងការសម្ដែងដែរ ហើយសូម្បីតែនៅក្រៅប្រទេសក៏មានរឿងដូច្នេះកើតឡើងផងដែរ។

តួឯកក្នុងរឿង ខ្មោចទឹក ពីឆ្វេងទៅស្ដាំ ភិន សុដាលីស ភឹម តារាវិបុល និង នី មុនីនាថ

“ខ្ញុំទទួលស្គាល់ការឱ្យកូនស្រីបន្តសម្ដែងតួឯកតទៅទៀត។ ធ្វើម៉េចបើទីផ្សារតម្រូវចឹង ហើយមិនថាតែខ្ញុំ ក្រឡេកមើលផលិតកម្មផ្សេងទៀតក៏គេធ្វើបែបនេះដែរ។ តួណាគេចាប់អារម្មណ៍គេនៅតែឱ្យសម្ដែងតទៅទៀត"។ លោក អ៊ិន សុភិន បន្ថែម។

ទោះជាបែបនេះក្ដី កញ្ញា ភិន សុដាលីស ត្រូវសម្ដែងជាតួឯករួមជាមួយកញ្ញា នី មុន្នីនាថ និង លោក ភឹម តារាវិបុល លើកឡើងថា នាងក៏មានការព្រួយបារម្ភខ្លាចទស្សនិកជនធុញទ្រាន់ផងដែរ នៅពេលរឿងជាបន្តបន្ទាប់ដាក់បញ្ចាំងលើទីផ្សារ។

កញ្ញាបញ្ជាក់ថា៖ "ខ្លាចគេជ្រេញមុខដែរហ្នឹងបង ពេលថតច្រើនរឿងអីចឹង តែធ្វើម៉េចបើគាត់តម្រូវអីចឹងហើយ។ ណាមួយគិតថាទស្សនិកជនមួយចំនួនក៏គេបន្តគាំទ្រទៅទៀតដែរ"។

http://youtu.be/BgLabhpnX6s

លោក អ៊ិន សុភិន បានបង្ហាញជំនឿជាក់ខ្លាំងថា រឿងដែលកូនស្រីខ្លួនសម្ដែងជាតួឯកលើកនេះគឺមានភាពពិសេស និង ទាក់ទាញជាច្រើន។ បើប្រៀបធៀបនឹងរឿង "អាព្រឿងងាប់ហើយ" កំពុងទទួលគាំទ្រច្រើននោះ លោកថា អាចលើសពីរទៅបីដងឯណោះ។

លោក អ៊ិន សុភិន ទើបទទួលជោគជ័យជាខ្លាំងក្នុងរឿង "អាព្រឿងងាប់ហើយ" ដែលសហការផលិតជាមួយផលិតកម្ម មាតុចក្រហ្វីលម៍។ រឿង "ខ្មោចទឹក" របស់លោកគ្រោងនឹងថតចប់ ហើយដាក់បញ្ចាំងនៅពាក់កណ្ដាលឆ្នាំ២០១៥ខាងមុខ។ ដើមទុនក្នុងការផលិតកម្មលោកប្រាប់ថាចន្លោះពី ៦ ទៅ ៨ ម៉ឺនដុល្លារ៕

អានអត្ថបទបន្ត៖ ស្ទីលថតប្លែកៗ ១១ សន្លឹកពី អែនឌី និង តារាស្រីល្បីៗ យ៉ាង

អានអត្ថបទបន្ត៖តារាថៃល្បីតាមវីដេអូសិច ក្លាយជាតួនារីរកស៊ីផ្លូវភេទក្នុងរឿងហុងកុង

អានអត្ថបទបន្ត៖ មកដល់ឆ្នាំនេះ “Gangnam Style” មានអ្នកមើល២,២ពាន់លានដង