Man Utd ស្ពឹកមុខក្នុងដីខ្លួនឯងដោយសារ Southampton លើកដំបូងក្នុង២៧ឆ្នាំ

2015-01-12 14:43:07
ចំនួនមតិ 0 | ចំនួនចែករំលែក 0

ចន្លោះមិនឃើញ

Southampton បានយកឈ្នះក្រុម Manchester United ជាលើកដំបូងនៅក្នុងលីក នាកីឡដ្ឋាន Old Trafford ក្នុងរយៈពេល២៧ឆ្នាំចុងក្រោយ។ ជ័យជម្នះ ១-០ នេះ មិនត្រឹមតែជាការសងសឹកប៉ុណ្ណោះទេ ប៉ុន្តែវាក៏បានធ្វើឲ្យក្រុមលោក Ronald Koeman ឡើងទៅកាន់ចំណាត់ថ្នាក់លេខ៣ជំនួសបិសាចក្រហមផងដែរ។

Dusan Tadic (ដោះអាវ) អបអរជាមួយមិត្តរួមក្រុមក្រោយស៊ុតបញ្ចូលទី

១គ្រាប់៣ពិន្ទុពេញរបស់ Southampton ធ្វើបានដោយកីឡាករ Dusan Tadic ក្រោយទទួលបាល់ដែលស៊ុតបុកបង្គោលទីដោយ Graziano Pelle នៅនាទី៦៩។

ចំណែកឯក្រុមលោក Louis van Gaal វិញ មិនត្រឹមតែមិនអាចបន្តកំណត់ត្រាឈ្នះ១០ប្រកួតជាប់គ្នាប៉ុណ្ណោះទេ ថែមទាំងជួបនូវកំណត់ត្រាដ៏អាក្រក់នាការប្រកួតនេះ ដោយមិនអាចស៊ុតចំគោលដៅសូម្បីតែមួយបាល់ពេញ៩០នាទីនៃការប្រកួត។

នេះជាបរាជ័យក្នុងដីលើកដំបូងនារដូវកាលនេះរបស់បិសាចក្រហម គិតចាប់តាំងពីចាញ់ Swansea នាថ្ងៃបើកឆាកមក។ អ្វីដែលជូរចត់មួយទៀត គឺ Southampton មិនដែលឈ្នះ Man Utd នៅ Old Trafford នោះទេ គិតចាប់តាំងពីខែមករា ឆ្នាំ១៩៨៨ មក ដែលគិតទៅមានចំនួន១៩ប្រកួត (គិតតែការប្រកួតលីក)។

លទ្ធផលមួយគូទៀតកាលពីយប់មិញដែរនោះ គឺកាំភ្លើងធំ Arsenal បំបាក់ Stoke City ៣-០។ ៣គ្រាប់របស់ក្រុមលោក Arsene Wenger នេះ ធ្វើបានដោយ Koscielny ១គ្រាប់ និង Sanchez ២គ្រាប់៕