ទឹម រដ្ឋា បញ្ជាក់បន្ថែមរឿងចែកផ្លូវជាមួយប្រុសស្នេហ៍ប៉ាគីស្ថាន
- 2015-01-12 17:41:22
- ចំនួនមតិ 0 | ចំនួនចែករំលែក 0
ទឹម រដ្ឋា បញ្ជាក់បន្ថែមរឿងចែកផ្លូវជាមួយប្រុសស្នេហ៍ប៉ាគីស្ថាន
ចន្លោះមិនឃើញ
ចំណងស្នេហារបស់ កញ្ញា ទឹម រដ្ឋា ជាមួយអ្នកជំនួញប៉ាគីស្ថាន លោក Zak Ky ដែលកើតឡើងជាង ១ ឆ្នាំ មកនេះ បានឈានដល់ផ្លូវបំបែកហើយ ក្រៅពីការប្រចណ្ឌ មានហេតុផលជាច្រើនទៀត។
ទឹម រដ្ឋា និយាយប្រាប់ថា ការពិតមានរឿងច្រើនណាស់ដែលនាំឲ្យនាងសម្រេចចិត្តដើរចេញពីសង្សាររបស់នាង ប៉ុន្តែនាងសូមលើករឿងមួយចំនួនប៉ុណ្ណោះមកនិយាយ។ រដ្ឋា បានបន្តថា រឿងប្រចណ្ឌជាដើមចមចម្បងគេ បន្ទាប់មកគឺរឿង ក្រុមគ្រួសារនាង និង ការងារសិល្បៈ។
រដ្ឋា លើកឡើងថា ដំបូងឡើយ Zak Ky មិនបានធ្វើឲ្យនាងចាប់អារម្មណ៍ពីអត្តចរិតរបស់គាត់ ដូច្នេះហើយ ស្នេហារបស់នាងបានដើរយ៉ាងរលូន ប៉ុន្តែមួយរយៈចុងក្រោយនេះ ចាប់ផ្ដើមមានបញ្ហាជាមួយគ្នា ព្រោះតែ ប្រចណ្ឌខ្លាំង។ នាងបានបន្តទៀតថា ដើម្បីឲ្យស្នេហានាង សុខចិត្តកាត់បន្ថយច្រើនពីការងារសិល្បៈ ក្នុងរយៈពេលដែលស្គាល់គ្នានេះ មានអ្នកដឹកនាំសិល្បៈច្រើនណាស់ហៅថត តែនាងបានបដិសេធន៍។ មានតែការដើរម៉ូដ ប៉ុណ្ណោះដែលនាងទទួល ហើយការទទួលដើរម៉ូដនោះក៏មិនសូវមានច្រើនដែរ ហើយរាល់ការទៅណាមកណា សង្សារនាងទៅតាមជាប់ជានិច្ច។
ចំណុចមួយទៀតសូម្បីតែនាង ចាប់ដៃគូជាមួយ លោក អេឡិច ច័ន្ទត្រា ដែលជាមិត្តភ័ក្រ្តចាស់ ស្គាល់ចិត្តស្គាល់ថ្លើមជាច្រើនឆ្នាំមកហើយនោះ ក៏ Zak Ky នៅតែប្រចណ្ឌដែរ។
ចំពោះរឿងក្រុមគ្រួសារវិញ ទឹម រដ្ឋា បានលើកឡើងឲ្យដឹងថា នាងកាន់តែឃ្លាតឆ្ងាយពីម្ដាយឪពុក និង បងប្អូន ព្រោះ Zak Ky ហាក់ដូចជា ព្យាយាមបន្តិចម្ដងៗ ទាញនាងឲ្យឆ្ងាយពីសិល្បៈ និង ក្រុមគ្រួសារ ។ នាងមិនសូវមានពេល ជួបជុំក្រុមគ្រួសារដូចមុនឡើយ តែបែបនេះក្ដី ដើម្បីក្ដីសុខកូន ម្ដាយរបស់នាងមិនបានស្ដីថា ឲ្យនាងឡើយ។
តារាស្រីដែលមានស្នាមសាក់អក្សរចិន 我愛你 លើកញ្ចឹងក ម្នាក់នេះបាននិយាយថា នាងជាអ្នកសិល្បៈ ជាមនុស្សត្រូវការសេរីភាព ការដើរហើរ ការចាប់ដៃគូសម្ដែង វាជារឿងធម្មតា មិនមែនជារឿងចម្លែកឡើយ ហេតុនេះអ្នកដែលស្រលាញ់នាងត្រូវតែដឹង និង ព្រមទទួលរឿងនេះ។ ទោះបីជា មានមាសប្រាក់ច្រើនបែបណាក្ដី នាងមិនត្រូវការជាដាច់ខាត ប្រសិនបើមនុស្សដែលស្រលាញ់នាងនោះ មិនយល់ពីអារម្មណរបស់នាង។
ទឹម រដ្ឋា បានសម្ដែងអារម្មណ៍សោកស្ដាយពេលវេលា និង អនុស្សាវរីយជាមួយគ្នាជាខ្លាំង ព្រោះ Zak Ky គឺជាបុរសទី ១ ដែលនាងបានប្រកាសឲ្យមហាជនដឹងឮ ហើយនាងក៏មិនធ្លាប់គិតថា ស្នេហាមួយនេះ អាចដើរដល់ផ្លូវបំបែកដែរ។
ទោះបីជាបានប្រកាសថា ចែកផ្លូវគ្នាហើយបែបនេះក្ដី តាមការឲ្យដឹង ទឹម រដ្ឋា បច្ចុប្បន្ន Zak Ky ព្យាយាមទូរសព្ទ និង ឆាតមក អង្វរសុំផ្សះផ្សាគ្នាវិញ ។ តារាស្រីម្នាក់នេះ បញ្ជាក់ថា ស្នេហាមួយនេះ មិនអាចកើតឡើងជាលើកទីពីរទៀតទេ៕
អានអត្ថបទ៖ តារាឯកស្រីថៃម្នាក់នេះ ធ្វើឲ្យកក្រើករោងភាពយន្ត Major Cineplex by Cellcard យប់មិញ!
អត្ថបទ៖ ខុត សីហា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
