១០ សន្លឹកពី ជី ណាឡែន កញ្ញាឯកប្រចាំផ្សារទំនើប AEON

2015-01-13 16:49:22
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធី AEON Mall Beauty Show ឬ ការប្រកួតសម្រស់ និង ម៉ូដប្រចាំផ្សារទំនើប AEON ដែលបានធ្វើការប្រកួតអស់រយៈពេលជាង៣ ខែ មកហើយនោះ ឥឡូវបានរកឃើញបេក្ខនារីជយលាភីដែលគ្រងតំណែងជាកញ្ញាឯកប្រចាំផ្សារ AEON Mall ហើយ កាលពីពេលថ្មីៗនេះ។ លទ្ធផលលេខ ១ បានទៅបេក្ខនារី កញ្ញា ជី ណាឡែន ដែលបញ្ជូនមកពីគ្រឿងសំអាង The Face Shop លទ្ធផលលេខ ២ បានទៅបេក្ខនារីកញ្ញា ទុំ ថាវរី មកពីគ្រឿងសំអាង Yves Rocher និង លទ្ធផលលេខ ៣ បានទៅបេក្ខនារី កញ្ញា រិទ្ធិ ចិន្តា មកពីគ្រឿងសំអាង Elianto។

និយាយពីកញ្ញា ជី ណាឡែន ស្រីស្អាតម្នាក់នេះ មានកំណើតក្នុងរាជធានីភ្នំពេញ វ័យ ២៤ ឆ្នាំ កម្ពស់ ១,៦៣ សង់ទីម៉ែត្រ ទម្ងន់ ៥៧ គីឡូក្រាម។ នាងទើបតែបញ្ចប់ថ្នាក់បរិញ្ញាបត្រទេសចរណ៍ ហើយបច្ចុប្បន្នកំពុងតែបន្តរៀនបំប៉នភាសាអង់គ្លេសបន្ថែមទៀតនៅសាកលវិទ្យាល័យមួយ។

ណាឡែន ប្រាប់ថា នាងមិនទាន់ដឹងច្បាស់ថា តើគួរតែប្រឡូកលើវិថីសិល្បៈ ឬ យ៉ាងណាទេ បន្ទាប់ពីជាប់ជា កញ្ញាឯកក្នុងកម្មវិធីខាងលើ ត្បិតអីម្ដាយ-ឪពុក របស់នាងមិនសូវពេញចិត្តលើអាជីពមួយនេះនៅឡើយ។ ការចូលសិល្បៈឬ មិនចូលអាស្រ័យលើម្ដាយ-ឪពុក នាងជាអ្នកសម្រេច។

កម្មវិធី AEON Mall Beauty Show ឬ ការប្រកួតសម្រស់និងម៉ូដប្រចាំផ្សារទំនើប AEON ជាកម្មវិធីមួយបង្កើតឡើងក្នុងគោលបំណងផ្ដល់នូវចំណេះដឹង និង គំនិតបន្ថែមដល់មិត្តៗនារីទាំងអស់ក្នុងការតុបតែងខ្លួន ឲ្យបានត្រឹមត្រូវតាមរដូវកាល និង កម្មវិធីនីមួយៗ និងធ្វើការជ្រើសរើសផលិតផលសំអាងដែលមានគុណភាពខ្ពស់។

កម្មវិធីអាចដំណើរការបានរហូតដល់វគ្គផ្តាច់ព្រ័ត្រនេះ មានការចូលរួមឧបត្ថម្ភធំដោយ ក្រុមហ៊ុនទូរសព្ទចល័ត Microsoft Lumia និងចូលរួមសហការឧបត្ថម្ភដោយ ហាងលក់សំលៀកបំពាក់ Penshoppe, ហាងលក់ស្បែកជើង និង កាបូប Carino, ហាងកាត់ និង ច្នៃម៉ូដសក់ Toni&Guy, SaporModelling Agency, ហាងលក់សម្លៀកបំពាក់ G2000, ហាងលក់សំលៀកបំពាក់ Lily និង ហាងលក់សម្លៀកបំពាក់ Eclipse។ ក្នុងនោះដៃគូសហការក្នុងការផ្សព្វផ្សាយដោយ ក្រុមហ៊ុនសប្បាយឌីជីថល, ស្ថានីយទូរទស្សន៍ហង្សមាស HDTV និង ទស្សនាវដ្តី Rose។ ឧបត្ថម្ភផលិតផលគ្រឿងសំអាងដោយ Elianto, The Face Shopនិង Yves Rocher។