សូលីដូ ចេញពី Diamond Music ទៅចូល HD Production

2015-01-14 16:56:07
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងសូលីដូ ថ្មីៗនេះ បានចាកចេញពីផលិតកម្ម Diamond Music នេះ ហើយ ដោយលោកបានទៅចូលក្នុងផលិតកម្មថ្មីមួយទៀតមានឈ្មោះថា HD Production។ នេះបើតាមការបង្ហើបប្រាប់ ពីអ្នកចាត់ការទូទៅក្នុងផលិតកម្មថ្មី បានប្រាប់ Sabay។

លោក សុខ សន្យា អ្នកចាត់ការទូទៅ HD Production បានឲ្យដឹងថា តារាចម្រៀង លោក សូលីដូ ទើបតែចុះកុងត្រាជាមួយផលិតកម្មរបស់លោកកាលពីពេលថ្មីៗនេះ ដោយបច្ចុប្បន្នលោកបានរៀបចំបទចម្រៀងឲ្យ លោកសូលីដូ ច្រៀងចំនួន ២ បទ រួចមកហើយ ដែលសុទ្ធសឹងតែជាបទពីរោះៗ ត្រៀមនឹងចេញលក់ក្នុងពេលឆាប់ៗនេះ។

អ្នកចាត់ការទូទៅរូបនេះ បានបន្តទៀតថា បន្ទាប់ពីទាំង ២ បទចេញលក់រួចហើយ លោកគ្រោងផលិតបទចម្រៀងជាច្រើនបទទៀតឲ្យលោក សូលីដូច្រៀង ដោយបច្ចុប្បន្នបានរៀបចំបានមួយចំនួនធំហើយ។

តាមការឲ្យដឹងពី លោក សុខ សន្យា បានប្រាប់ថា HD Production បានបង្កើតឡើងនៅដើមឆ្នាំ ២០១៣ បច្ចុប្បន្នមានតារាចម្រៀងចំនួន ៧ រូប ក្នុងនោះ បានចេញបទចម្រៀងចំនួន ៤ វ៉ុលមកហើយ មាន CD ២ វ៉ុល និង VCD ២ វ៉ុល។ សម្រាប់ លោក សូលីដូ អ្នកចាត់ការរូបនេះ បានបញ្ជាក់ប្រាប់ថា ខាងផលិតកម្មនឹងរៀបចំបទចម្រៀងឲ្យតារារូបនេះជាពិសេសតែម្ដង លោកគិតថា លោក សូលីដូ គឺជាកូនអុកដ៏សំខាន់ របស់ HD Production ។

ទាក់ទងនឹងបញ្ហានេះ Sabay មិនអាចស្នើសុំការបញ្ជាក់បន្ថែមពី តារាចម្រៀង លោក សូលីដូ បានឡើយ ព្រោះទូរសព្ទរបស់លោកហៅចូលមិនមានអ្នកលើកទេ នៅព្រឹកមិញនេះ។

សូលីដូ ជាតារាចម្រៀងមានកំណើតនៅស្រុក ត្រាំកក់ ខេត្តតាកែវ ។ មុនចូលផលិតកម្ម HD Production តារាចម្រៀងមានមុខមាត់ស្រដៀង លោក ព្រាប សុវត្ថិ ម្នាក់នេះ គឺជា អតីតតារាចម្រៀងក្នុងផលិតកម្មសាន់ដេ។ លោកចូលផលិតកម្មសាន់ដេ ក្នុងដើមឆ្នាំ២០០៦ រហូតដល់ឆ្នាំ ២០០៩។ បន្ទាប់ពីបានចូលច្រៀងឲ្យផលិតកម្មប៊ិកមែន ដល់ឆ្នាំ ២០១១ ហើយបន្តមកផលិតកម្ម Diamond Music៕

អានអត្ថបទ៖ ធ្វើស្ទីលមិនដឹងខ្លួនអីចឹងទៅ តារាៗពិតជាគួរឱ្យចាប់អារម្មណ៍មែន!

អានអត្ថបទបន្ត៖ តារា ១១ ដួង ធ្លាប់គេងជាមួយនារីរកស៊ីផ្លូវភេទ

អានអត្ថបទបន្ត៖ ឌីជេ ឡាយអិន ឡើងតុលាការស្អែក ទាំងមន្ទិលលើកូនទាំង៣!

អត្ថបទ៖ ខុត សីហា