នី មុន្នីនាថ ខ្លាចធ្លាក់យន្តហោះ មិនហ៊ានចេញក្រៅប្រទេស

2015-01-14 17:48:13
ចំនួនមតិ 0 | ចំនួនចែករំលែក 0

ចន្លោះមិនឃើញ

នី មុន្នីនាថ និយាយថា នាងមិនហ៊ានចេញសម្ដែងនៅក្រៅប្រទេសទេ ដោយសារតែករណីធ្លាក់យន្តហោះកើតឡើងជាបន្តបន្ទាប់។ ការនិយាយដូច្នេះ ខណៈជើងហោះហើររបស់ក្រុមហ៊ុនអន្តរជាតិនានា ជាពិសេសក្រុមហ៊ុនក្នុងតំបន់អាស៊ីមានព័ត៌មានពីការធ្លាក់យន្តហោះជាញឹកញាប់។

តារាសម្ដែង និង ជាតារាចម្រៀង នី មុន្នីនាថ លើកឡើងថា៖ "មានគេទាក់ទងឱ្យទៅកាណាដា តែខ្ញុំអត់ទៅបង ព្រោះដូចជាស្រៀវៗម៉េចទេ ដល់លឺធ្លាក់យន្តហោះញឹកពេកចឹងទៅ"។

http://youtu.be/LleWbfLAang

នី មុន្នីនាថ ក្នុងពិធីក្រុងពាលីរឿង ខ្មោចទឹក កាលពីពេលថ្មីៗ

កញ្ញាបន្តថា ហេតុផលចម្បងមួយទៀតធ្វើឱ្យខ្លួនសម្រេចចិត្តមិនទៅសម្ដែងនៅប្រទេស កាណាដា ក៏ព្រោះតែការងារក្នុងស្រុករវល់ខ្លាំង ហើយនាងទើបវិលត្រឡប់ពីការសម្ដែងនៅក្រៅប្រទេសកាលពីពេលថ្មីៗ។

យន្តហោះនៃក្រុមហ៊ុនអាកាសចរណ៍ជាច្រើនដូចជា AirAsia ម៉ាឡេស៊ីអ៊ែរឡាញ ជាដើមធ្លាក់ និងផ្ទុះឆេះជាបន្តបន្ទាប់កាលពីពេលថ្មីៗ បណ្ដាលឱ្យមនុស្សរាប់រយនាក់បាត់បង់ជីវិត។ ប្រការនេះក៏ធ្វើឱ្យមនុស្សនានាជុំវិញពិភពលោករអានឹងការធ្វើតាមដំណើរតាមយន្តហោះផងដែរ។

ទោះជាបែបនេះក្ដីតារាសម្ដែងទើបស្ងាត់ដំណឹងពីការបែកបាក់ស្នេហ៍ជាមួយអតីតតារាសម្ដែងលោក កែវ កុសល្យ រូបនេះអះអាងថានាងនឹងពិចារណាការចេញទៅក្រៅប្រទេសអាចចុងឆ្នាំនេះ ឬមួយឆ្នាំក្រោយប្រសិនបើស្ងប់ស្ងាត់ដំណឹងធ្លាក់យន្តហោះ។

បន្ថែមពីនេះ នី មុនីនាថ និយាយថា ការចេញសម្ដែងក្រៅប្រទេសញឹកពេកអាចឱ្យទស្សនិកជនខ្មែរមួយចំនួននៅក្រៅស្រុកមានភាពធុញទ្រាន់ ហើយទីផ្សារក្នុងស្រុកអាចស្ងប់ស្ងាត់ជាងមុន។ ដូច្នេះហើយទើបកញ្ញាសម្រេចចិត្តមិនចេញក្រៅញឹកពេកឡើយ។

“យើងចេះតែខ្លាចទៅណាបង ព្រោះបើចេញក្រៅញឹកបងប្អូនខ្មែរនៅក្រៅក៏គេធុញយើងខ្លះដែរ ខ្ញុំគិតអីចឹង។ ម្យ៉ាងទីផ្សារក្នុងស្រុកយើងក៏សំខាន់ដែរ អីចឹងហើយបានខ្ញុំគិតថាម្ដងម្កាលទៅក្រៅប្រទេសជាការល្អ"។ នី មុន្នីនាថ បន្ថែម។

តារាសម្ដែង និងចម្រៀង នី មុន្នីនាថ ទើបទទួលតំណែងតួឯកក្នុងរឿង "ខ្មោចទឹក" ជាមួយកញ្ញា ភិន សុដាលីស និងលោក ភឹម តារាវិបុល កាលពីពេលថ្មីៗ។ ខ្សែភាពយន្តថ្មីក្នុងឆ្នាំ២០១៥របស់នាង គ្រោងថតបញ្ចប់ និងដាក់បញ្ចាំងនាពាក់កណ្ដាលឆ្នាំនេះ៕