ស្នេហាធ្វើបាបមនុស្សមែន! ៥ឆ្នាំលះបង់ឲ្យគាត់ បន្សល់ឲ្យខ្ញុំត្រឹម «អារម្មណ៍ស្អប់មនុស្សប្រុស»

2015-01-15 17:19:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្ញុំមានរឿងជាច្រើនដែលតែងតែលាក់ក្នុងចិត្តមិនដែលប្រាប់អ្នកណា ទើបពេលនេះខ្ញុំសម្រេចចិត្តសរសេរមកទំព័រស្នេហ៍របស់ Sabay។

ខ្ញុំជាក្មេងស្រីរស់នៅតាមខេត្តដែលមានជីវភាពធូរធារ។ ក្រោយមកខ្ញុំបានចូលធ្វើការនៅក្នងក្រុមហ៊ុនមួយ។ ខ្ញុំមានវ័យក្មេងជាងគេ ហើយគេគ្រប់គ្នាតែងសរសើរថាខ្ញុំឆ្លាត ពូកែធ្វើការ។ ខ្ញុំចូលធ្វើការបានមួយរយៈខ្ញុំទទួលតំណែងធំទៅៗ។ តែរយៈពេល៥ឆ្នាំក្រោយមកដោយសារខ្ញុំដឹងរឿងរបស់បុគ្គលិកមួយចំនួនដែលលួចកិបកេងប្រាក់ក្រុមហ៊ុនពួកគេបានព្យាយាមរកវិធីធ្វើអោយខ្ញុំមិនអាចធ្វើការនៅទីនោះបាន។ ខ្ញុំសម្រេចចិត្តទាំងមិនចង់ ព្រោះប្រាក់ខែរបស់ខ្ញុំគឺ ៨០០$ ហើយ CEO គាត់ក៏មិនព្រមអោយខ្ញុំចេញ។តែខ្ញុំត្រូវតែចេញដោយសារសង្សាររបស់ខ្ញុំចង់អោយខ្ញុំមកធ្វើការជិតគាត់វិញ។ខ្ញុំក៏សម្រេចចិត្តមកទាំងគ្រួសារខ្ញុំមិនពេញចិត្ត។

ចំណែកគ្រួសារគាត់វិញគឺត្រូវការអ្នកយកចិត្តយកថ្លើមពួកគាត់ចេះ call ទៅលេង។ និយាយអោយចំទៅគឺពួកគាត់ទាមទារច្រើនណាស់ពីខ្ញុំ។ ពួកគាត់ក៏ធ្លាប់និយាយប្រាប់សង្សារខ្ញុំថាម៉េចមិនរកអ្នកនៅភ្នំពេញទៅមកយកអីអ្នកនៅតាមខេត្តគ្មានលុយគ្មានផ្ទះនៅផង។ខុសពីគ្រួសាររបស់ខ្ញុំដែលមិនដែលទាមទារអ្វីទាំងអស់ក្រៅពីអោយតែកូនមានក្តីសុខចេះស្រឡាញ់គ្នាទៅបានហើយ។ ពេលមកដល់ភ្នំពេញខ្ញុំត្រូវជួលផ្ទះនៅហើយទៅធ្វើការឆ្ងាយ។ ដោយសារខ្ញុំអត់ស្គាល់ផ្លូវ សង្សាររបស់ខ្ញុំជាអ្នកមកទទួលទៅធ្វើការរាល់ថ្ងៃ។ គាត់ជាមនុស្សល្អ ហើយគ្រប់គ្នាតែងសរសើរថាពួកយើងជាគូស្នេហ៏ដែល sweet ជាងគេ។ តែមិនបានយូរប៉ុន្មានគាត់បានលួងលោមខ្ញុំ ហើយពួកយើងនៅជាមួយគ្នាដូចប្តីប្រពន្ធ។ គាត់បានចូលស្តីដណ្តឹងខ្ញុំតាមច្បាប់ហើយថែមទាំងកំណត់ថ្ងៃរៀបការផងដែរ។ ប៉ុន្តែជិតដល់ថ្ងៃរៀបការពួកយើង ក៏មានបញ្ហារឿងលុយកាក់។ ប្រាក់ខែខ្ញុំ ៦០០$តែគាត់យកអស់ទុកអោយខ្ញុំតែ២០០$ សម្រាប់បង់ថ្លៃផ្ទះនិងម្ហូប។

គាត់បាននិយាយរឿងរ៉ាវខ្លះ ទៅកាន់គ្រួសាររបស់ខ្ញុំ ធ្វើអោយពួកគាត់ខឹងយ៉ាងខ្លាំង តែខ្ញុំបានជួយសម្រួលវិញទើបពួកគាត់មិនសូវខឹង។ មិនបានប៉ុន្មាន ស្រាប់តែគាត់បានទាក់ទងនឹងស្រីផ្សេងម្នាក់ទៀតហើយកុហកខ្ញុំថាគ្រាន់តែជាមិត្ត។ ខ្ញុំក៏មិនបានថាអី តែក្រោយមកខ្ញុំបានឃើញសាររបស់គាត់និងស្រីម្នាក់ហ្នឹង។ តែគាត់នៅតែប្រកែកថាមិនមែនទេគឺគ្រាន់ជាមិត្តម្នាក់ទៀតទាំងខ្ញុំឃើញថាជាមនុស្សស្រី។ ចាប់ពីពេលនោះមករាល់ពេលដែលគេផ្ញើរសាររកគ្នាគេតែងលុប សារចោលទាំងអស់មិនអោយខ្ញុំឃើញ។ គេតែងប្រាប់ថាជាមិត្ត ហើយថាផ្ទះគេនៅឆ្ងាយទាំងខ្ញុំដឹងថាគេនៅផ្ទះជាប់គ្នា។ facebookវិញស្រីម្នាក់នោះបាន block ខ្ញុំចោលទៀត។

ខ្ញុំដឹងថាពួកគេព្យាយាមលាក់ខ្ញុំ។ ក្រោយមកគេថាស្រីនោះមិនដឹងអីទេមកពីគេពិបាកចិត្តហើយខ្ញុំតែងរករឿងគេពេក។ ឯស្រីម្នាក់នោះគេយល់ចិត្តគាត់ ទើបធ្វើអោយគាត់មានអារម្មណ៍ល្អ។ពេលនេះខ្ញុំមានកូន ហើយគាត់បានអោយខ្ញុំយកចេញ។ គាត់ថាគ្រួសារខ្ញុំនិងគាត់មិនអាចទទួលយកបានហើយខ្ញុំក៏យល់ព្រម។ នេះគាត់បាននិយាយថាគាត់នឹងព្យាយាមរកលុយហើយគាត់នឹងសម្រេចចិត្តម្តងទៀតថារស់នៅជាមួយខ្ញុំបានអត់? រៀបការបានអត់? ខ្ញុំកែចរិតបានអត់? គាត់តែងតែសួរខ្ញុំអោយខ្ញុំត្រៀមខ្លួនសម្រេចចិត្ត ទាំងគាត់ក៏បានដឹងថាខ្ញុំមានចម្លើយអ្វីខ្លះសម្រាប់សំនួរអស់នោះ។ខ្ញុំធ្លាប់សុំគាត់បែកគ្នាតែគាត់មិនព្រម ដល់ពេលខ្ញុំស្រឡាញ់គាត់ខ្លាំង គាត់បែរជាព្យាយាមបែកទៅចោលខ្ញុំវិញ។

រូបតំណាង

ខ្ញុំមិនយល់ទេ រយៈពេល៥ឆ្នាំដែលខ្ញុំបានស្គាល់គាត់ខ្ញុំបានដឹងរួចហើយថាគាត់ពាក់ព័ន្ធនឹងមនុស្សស្រីច្រើនណាស់ តែគាត់ពូកែ គឺពូកែលាក់ណាស់។ គ្រប់គ្នាតែងសរសើរគាត់ថាជាមនុស្សល្អ មិនចេះខិលខូច តែអ្វីដែលខ្ញុំដឹងគឹផ្ទុយស្រឡះទាំងអស់។មុនគាត់ទាក់ទងខ្ញុំគាត់ធ្លាប់មានស្រីប៉ុន្មាននាក់ធ្លាប់ដេកជាមួយប៉ុន្មាននាក់ពេលទាក់ទងខ្ញុំហើយធ្លាប់លួចមានប៉ុន្មាននាក់ខ្ញុំសុទ្ធតែដឹងទាំងអស់ សូម្បីតែមានគេយករូបមកគំរាមគេ ក៏ខ្ញុំដឹងដែរ។ ពេលគាត់មិនអាចដោះស្រាយបានគេមកសារភាព គាត់ថាគាត់ចាញ់បោកគេខ្ញុំក៏ជួយដោះស្រាយអោយ ទើបស្រីនោះលែងហ៊ាន។ ពេលនេះ ខ្ញុំមិនមិនយល់ថាខ្លួនឯងនៅតែស្រឡាញ់គេទៀតរឺអត់ទេ? បើគេរៀបការនឹងខ្ញុំ តើព្រោះតែការស្រឡាញ់រឺគ្រាន់តែជាការទទួលខុសត្រូវ នូវអ្វីដែលគេបានធ្វើដាក់ខ្ញុំ? ព្រោះគាត់ថាខ្លាចខ្ញុំសម្លាប់ខ្លួនពេលគេបែកពីខ្ញុំ។ តែខ្ញុំក៏ធ្លាប់ប្រាប់គេថាខ្ញុំនឹងមិនស្លាប់ព្រោះមនុស្សប្រុសទេ។ និយាយពីស្រីនោះវិញ គេជួបគ្នារាល់ថ្ងៃហើយពេលនាងជួបខ្ញុំ នាងធ្វើមិនឃើញហើយតែងផ្ញើរសារសួរគាត់ទៅណាមកណា មិនថាពេលណាទេអោយតែគាត់ចេញពីផ្ទះ។ តើនេះជាមិត្តរឺមិនមែនបើម៉ោង១១យប់ទៅហើយ ថែមទាំងនិយាយថាពេលត្រឡប់ទៅវិញប្រាប់គេផង គេបារម្ភ។ ប្រាប់ខ្ញុំផង តើគាត់នៅស្រឡាញ់ខ្ញុំទៀតអត់? គាត់តែងនិយាយថាបើមនុស្សប្រុសគេទាក់ទងអ្នកទី២ហើយគឺគេលែងស្រឡាញ់នាក់ទី១ហើយ។ តើវាពិតរឺអត់?

ពេលនេះខ្ញុំមានអារម្មណ៍ថាស្អប់មនុស្សប្រុស។ តើខ្ញុំអាចបញ្ចប់អ្វីៗគ្រប់យ៉ាងជាមួយគាត់បានអត់?

ខ្ញុំគ្រាន់តែចង់ប្រាប់ថានេះជាមេរៀនមួយសម្រាប់ខ្ញុំ។ វាបានបង្រៀនអោយខ្ញុំដឹងគ្រប់យ៉ាងថាមិនត្រូវផ្ដល់ការស្រឡាញ់អោយគេរហូត ភ្លេចទុកសម្រាប់ខ្លួនឯងដូចពេលនេះឡើយ។

ខ្ញុំសង្ឃឹមថាអ្នក ដែលបានអានហើយនឹងយល់ពីអារម្មណ៍របស់ខ្ញុំពេលនេះ។

អានអត្ថបទ៖ សុំរួមរ័កច្រើនដងពេក ខ្ញុំសម្រេចដើរចេញ ត្រូវអត់? អានអត្ថបទ៖ បងស្ម័គ្រអូនស្មោះ មានប្រឡោះ បងបញ្ចាំម៉ូតូអូនបាត់!

លោកអ្នកមានវិបត្តិ និងរៀងរ៉ាវស្នេហា ចង់ចែករំលែក ឬស្វែងរកមតិសូមផ្ញើមកកាន់ pen.sophana@cidc.com.kh។ Sabay នឹងចុះផ្សាយជូនលោកអ្នក៕