អតីតសមាជិកទាំង ៣ ក្រុម MKS រំលឹកពីអតីតប្រធានក្រុម សរ ធារ៉ា!

2015-01-19 22:03:18
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតសមាជិកទាំង ៣ នៃក្រុមចម្រៀងយុវវ័យខ្មែរដ៏ល្បីសម័យឆ្នាំ ២០០០ គឺក្រុម MKS មានលោក មិញ បញ្ញាសុទ្ធ ហេង ពិទូ និង វណ្ណា ពិសិដ្ឋ បានបង្ហាញអារម្មណ៍ក្ដុកក្ដួលជាខ្លាំង នៅពេលដឹងថា អតីតប្រធានក្រុមពួកគេ លោក សរ ធារ៉ា ទទួលមរណភាពកាលពីពេលថ្មីៗ ដោយសារជំងឺឈាមកកក្នុងខួរក្បាល។

ថ្លែងប្រាប់ Sabay លោក មិញ បញ្ញាសុទ្ធ បច្ចុប្បន្នជាអ្នកនិពន្ធបទភ្លេងក្នុងផលិតកម្មសាន់ដេ ឱ្យដឹងថា លោកនិយាយស្ទើរតែមិនចេញ ហើយសោកស្ដាយជាខ្លាំងដោយមិននឹកស្មានដល់ពេលដឹងថា មិត្តភ័ក្ដិជិតស្និទ្ធបំផុតរបស់ខ្លួនស្លាប់។ "ខ្ញុំស្ដាយគាត់បំផុត ហើយនិយាយអីអត់ពេលនេះ ព្រោះគាត់ជាធនធានដ៏កម្ររកបានក្នុងសង្គមសិល្បៈខ្មែរ"។

អតីតសមាជិកទាំង ៤រូបក្នុងក្រុម MKS

អតីតសមាជិកក្រុម រូបនេះបន្តថា ការលេចឈ្មោះជាក្រុម MKS លេចឈ្មោះឡើង រួមនឹងការទទួលសំឡេងគាំទ្រពីទស្សនិកជននាពេលកន្លង ក៏ដោយសារតែខ្លួន ហើយនឹងសព សរ ធារ៉ា ដែរជាអ្នកបង្កើតឡើង។

ថ្លែងដោយនឹកស្មានមិនដល់អតីតសមាជិកម្នាក់ទៀតគឺ លោក វណ្ណា ពិសិដ្ឋ បច្ចុប្បន្នកំពុងច្រៀងឱ្យផលិតកម្ម M លើកឡើងដោយតក់ស្លុត និង ស្ទើរស្រក់ទឹកភ្នែកពេលដឹងថា អតីតមិត្តរួមក្រុមធ្លាប់មានប្រវត្តិជូរចត់បំផុតជាមួយគ្នាទទួលមរណភាព។

"តាំងពីបែកបាក់ក្រុមមកជាង ១០ឆ្នាំហើយខ្ញុំមិនដែលជួបគាត់ទេ តែពេលលឺដំណឹងគាត់ស្លាប់អារម្មណ៍ខ្ញុំស្លុងដូចមាននរណាម្នាក់មកក្បែរអ៊ីចឹង។ ខ្ញុំពិតជាមានអារម្មណ៍សោកស្ដាយខ្លាំងណាស់ចំពោះសមត្ថភាពដ៏ល្អរបស់គាត់"។

តារាចម្រៀងរូបនេះមកមិនទាន់ពិធីបូជាសព លោក សរ ធារ៉ា តែអះអាងថា នឹងចូលរួមពិធីបុណ្យគម្រប់ ៧ថ្ងៃ ដែលគ្រោងនឹងធ្វើនាសប្ដាហ៍នេះ។

ដោយឡែក លោក ហេង ពិទូ ធ្លាប់ជាអតីតសមាជិកក្រុមខាងលើ ក៏បានបង្ហាញពីក្ដីអាណិត និង សោកស្ដាយដូចគ្នានៅពេលលឺលោក សរ ធារ៉ា ស្លាប់។ លោកប្រាប់ថា ការចូលក្រុម MKS និង មានឈ្មោះល្បីដល់សព្វថ្ងៃ ក៏ដោយសារតែអតីតប្រធានក្រុមរូបនេះផងដែរ។ "ទាំងអាណិត និងគុណស្រ័យរបស់គាត់ ខ្ញុំមិនអាចបំភ្លេចបានទេក្នុងមួយជីវិតនេះ ហើយខ្ញុំចង់ធ្វើមិត្តភ័ក្ដិល្អជាមួយគាត់ទៀត នាជាតិក្រោយ"។

តារាចម្រៀងក្នុងផលិតកម្មសាន់ដេ បន្តថា ការស្លាប់របស់លោក សរ ធារ៉ា ពិតជាបាត់បង់ធនធានមនុស្សសំខាន់ និង ពិបាករកបំផុតក្នុងសិល្បៈខ្មែរ ព្រោះទាំងការដឹកនាំសម្ដែង និពន្ធ និង ច្រៀងគឺលោកអាចធ្វើបានទាំងអស់។

លោក សរ ធារ៉ា អតីតអ្នកចម្រៀង អ្នកដឹកនាំសម្ដែង និង ជាអ្នកនិពន្ធបទចម្រៀងទទួលមរណភាពកាលពីថ្ងៃសុក្រសប្ដាហ៍មុន។ ពិធីបុណ្យសពគម្រប់ ៧ ថ្ងៃ របស់លោកនឹងធ្វើនៅថ្ងៃ ព្រហស្បតិ៍ ទី ២២ សប្ដាហ៍នៅគេហដ្ឋានម្ដាយ នៅម្ដុំទួលស្វាយព្រៃ។ មុនស្លាប់លោកបានបន្សល់ទុកស្នាដៃជាច្រើនក្នុងវិស័យសិល្បៈ ដូចជាស្ថាបនិកក្រុម MKS ជាអតីតអ្នកនិពន្ធក្នុងផលិតកម្ម U2 រស្មីហង្សមាស និង KH ជាដើម៕

អានអត្ថបទបន្ត៖ ២ សន្លឹក ជាភាពកតញ្ញូពី ខេមរៈ សិរីមន្ត និង ឱក សុគន្ធកញ្ញា នៅចុងក្រោយនៃជីវិតអ្នកនិពន្ធ សរ ធារ៉ា

អានអត្ថបទបន្ត៖ ទីបំផុត! ឌីជេ ឡាយអិន បានត្រឹមពោលពាក្យអហោសិកម្ម

អានអត្ថបទបន្ត៖ គ្រាន់តែរឿង “គ្រប់គ្រង” សិល្បករខ្មែរ៣-៤នាក់ អស់ប្រាក់រាប់ម៉ឺនដុល្លារ!