ស្រប​ពេល​ដែល​កម្មវិធី​ប្រឡង​ចម្រៀង​ "The Voice” អាមេរិក​រដូវ​កាល​ទី​៧ ទើប​តែ​ចាប់​ផ្ដើម​បាន ២​សប្ដាហ៍ ថ្ងៃ​នេះ​ យើង​ក្រឡេក​មក​មើល​អតីត​ម្ចាស់​ជយលាភី​​ពី​កម្មវិធី​នេះ ក្នុង​រដូវកាល​កន្លង​មក​ទាំង​អស់​គ្នា។ បេក្ខជន​ដែល​ទទួល​បាន​ជ័យលាភី​​ក្នុង​រដូវ​កាល​នីមួយ​ៗ​អាច​ទទួល​បាន​​ប្រាក់​រង្វាន់ ១សែន​ដុល្លារ និង​កុងត្រា​ចូល​ច្រៀង​​ក្នុង​ផលិតកម្ម Universal ដូច​គ្នា។ ប៉ុន្តែ​​ក្រោយ​ចេញ​ពី​កម្មវិធី​​ មិន​ប្រាកដ​ថា​ពួក​គេ​អាច​ជោគជ័យ​ដូច​គ្នា​ឡើយ។ តើ​ពួក​គេ​ជា​នរណា ហើយ​ទទួល​បាន​ជោគជ័យ​យ៉ាង​ណា​ខ្លះ​ក្នុង​អាជីព​ចម្រៀង​បន្ទាប់​ពី​ក្លាយ​ជា​ម្ចាស់​ជយលាភី​ក្នុង​កម្មវិធី​នេះ? តាម​ដាន​ខាង​ក្រោម​នេះ​ទាំង​អស់​គ្នា៖

រដូវ​កាល​ទី​១៖ Javier Colon

ម្ចាស់​ជយលាភី​រដូវ​កាល​ដំបូង​របស់​ "The Voice” អាមេរិក​កាល​ពី​ឆ្នាំ​២០១១ គឺ​ Javier Colon ជា​កូន​ក្រុម​របស់​តារា​ចម្រៀង Adam Levine។ ជាមួយ​ជោគជ័យ​ក្នុង​កម្មវិធី​នេះ Javier បាន​ទទួល​កុងត្រា​ចូល​ច្រៀង​ក្នុង​ផលិតកម្ម Universal Republic Records ហើយ​ក៏​បាន​ចេញ​អាល់ប៊ុម​ដំបូង​ មាន​ចំណង​ជើង​ថា "Come Through For You” ដែល​រួម​មាន​បទ​ចម្រៀង "As Long As We Got Love” ដែល​តារា​រូប​នេះ​ច្រៀង​ជាមួយ Natasha Bedingfield។ ទោះ​យ៉ាង​ណា​អាល់ប៊ុម​ដំបូង​របស់​គេ​មិន​ទទួល​ការ​គាំទ្រ​ច្រើន​ដូច​ការ​រំពឹង​ទុក​ឡើយ ដោយ​បាន​ទទួល​ចំណាត់​ថ្នាក់​ទី​១៣៤​លើ​តារាង Billboard និង​លក់​ដាច់​អស់ ៤២០០០​បន្ទះ។ ដោយ​មិន​ទទួល​បាន​ការ​ជ្រោមជ្រែង​​ចំពោះ​ការ​ខិតខំ​ប្រឹងប្រែង​របស់​ខ្លួន Solon ក៏​សម្រេច​ចិត្ត​ដើរ​ចេញ​ពី​ផលិតកម្ម​នេះ​ទៅ។

បច្ចុប្បន្ន​តារា​វ័យ ៣៧​ឆ្នាំ​រូប​នេះ នៅ​តែ​បន្ត​អាជីព​ចម្រៀង​របស់​គេ​ដដែល តាម​រយៈ​ការ​សម្ដែង​ក្នុង​កម្មវិធី​ផ្សេង​ៗ នៅ​ទូទាំង​ប្រទេស ស្រប​ពេល​កំពុង​ស្វែង​រក​ទ្រនំ​ថ្មី។​

http://youtu.be/4I-sqNOJkJI

រដូវ​កាល​ទី​២៖ Jermaine Paul

ជយលាភី​សម្រាប់​ក្រុម​របស់​គ្រូ​បង្វឹក Blake Shelton បាន​លេច​ឡើង​នៅ​រដូវ​កាល​ទី​២ ដោយ​បេក្ខជន Jermine Paul។ មុន​នឹង​ចូល​រួម​ប្រឡង​ក្នុង​កម្មវិធី​នេះ គេ​គឺ​ជា​អ្នក​រាំ​របស់​តារា​ចម្រៀង Alicia Keys។ Paul ហាក់​មិន​ទទួល​បាន​ការ​គាំទ្រ​​ច្រើន​ឡើយ​បន្ទាប់​ពី​ទទួល​បាន​ជយលាភី​ពី​កម្មវិធី ហើយ​ក៏​បាន​ចេញ​អាល់ប៊ុម​ដំបូង "I Believe In This Life” ដែល​នៅ​តែ​មិន​អាច​ទាក់ទាញ​ការ​គាំទ្រ​បាន​ដដែល។ តារា​រូប​នេះ​បាន​ចេញ​អាល់ប៊ុម​ចុង​ក្រោយ "Next To You” កាល​ពី​ឆ្នាំ​២០១៣។

http://youtu.be/J2gEX3FvsFI រដូវ​កាល​ទី​៣ និង​ទី​៤៖ Cassadee Pope និង Danielle Bradbery

ខុស​ពី​សិស្ស​​ច្បង​នៅ​រដូវ​កាល​មុន​ៗ ម្ចាស់​ជយលាភី​ក្នុង​រដូវ​កាល​ទី​៣ និង​ទី​៤ គឺ Cassadee Pope និង Danielle Bradbery ដែល​ជា​កូន​ក្រុម​របស់​តារា​ចម្រៀង Blake Shelton ទាំង​ពីរ​នាក់ អាច​ជាប់​ចំណាត់​ថ្នាក់​ Top 100 លើ​តារាង Billboard បាន​តាម​រយៈ​បទ​ចម្រៀង​ចង្វាក់​ Country របស់​ពួក​គេ។

Pope បាន​សម្ដែង​បទ​ចម្រៀង​ចុង​ក្រោយ​របស់​នាង​គឺ​បទ "Like There's No Tomorrow” ក្នុង​ការ​ប្រគំ​តន្ត្រី​មួយ​របស់​នាង​កាល​ពី​ថ្ងៃ​ទី​២៩ ខែ​សីហា បន្ទាប់​ពី​បញ្ចប់​​តន្ត្រី​ទេសចរណ៍​មួយ​នៅ​ West Springfield។ នាង​ក៏​បាន​សម្ដែង​ជាមួយ​តារា​ចម្រៀង និង​អ្នក​លេង​ហ្គីតា​ម្ចាស់​ពាន​រង្វាន់ Grammy Daruys Rucker ដែរ។ នៅ​ឆ្នាំ​២០១៤​នេះ នាង​បាន​ឈ្នះ​ពាន​រង្វាន់ Breakthrough Video of The Year ពី​កម្មវិធី CMT Music Awards តាម​រយៈ​បទ “Wasting All These Tears”។​

http://youtu.be/EJZOeTnvq4k

ចំណែក​ Bradbery ដែល​ជា​ម្ចាស់​ជយលាភី​ក្មេង​បំផុត​ក្នុង​កម្មវិធី The Voice បាន​ចេញ​បទ​ចម្រៀង Cover ជាច្រើន​តាម​រយៈ​វីដេអូ​ជា​ស៊េរី មាន​ចំណង​ជើង​ថា "DBRequestLine”។ វីដេអូ​ចម្រៀង​ចុង​ក្រោយ​របស់​តារា​វ័យ ១៨​ឆ្នាំ​រូប​នេះ​បាន​ចេញ​នៅ​ថ្ងៃ​ទី​២ ខែ​កញ្ញា ដែល​ជា​បទ​ចម្រៀង Cover បទ "Set Fire to the Rain” របស់​តារា​ចម្រៀង Adele។ បច្ចុប្បន្ន​តារា​មក​ពី​រដ្ឋ​ Texas រូប​នេះ​កំពុង​បន្ត​ការ​ប្រគំ​តន្ត្រី​ទេសចរណ៍​របស់​នាង រួម​ទាំង​ការ​សម្ដែង​មួយ​ Show មួយ​ចំនួន​ទៀត​នៅ Allentown។​

http://youtu.be/Ddyt96P94jw រដូវ​កាល​ទី​៥៖ Tessanne Chin

ជយលាភី​ The Voice រដូវ​កាល​ទី​៥ បាន​ទៅ​លើ​បេក្ខនារី​មាន​កំណើត​នៅ​ប្រទេស​​ចាម៉ៃកា​ ជា​កូន​ក្រុម​របស់​តារា​ចម្រៀង Adam Levine។ តារា​ចម្រៀង​ដែល​មាន​ទេពកោសល្យ​សម្បូរ​បែប​រូប​នេះ​បាន​ចេញ​អាល់ប៊ុម​ដំបូង "Count on My Love” កាល​ពី​ខែ​កក្កដា។ ប៉ុន្តែ​តារា​វ័យ ២៩​ឆ្នាំ​ដែល​មាន​កំណើត​នៅ​ប្រទេស​ចាម៉ៃកា​រូប​នេះ​មិន​បាន​ទទួល​ជោគជ័យ​ច្រើន​ឡើយ​ ដោយ​​អាល់ប៊ុម​ដំបូង​នេះ​អាច​លក់​ដាច់​តែ ៧០០០​បន្ទះ​ប៉ុណ្ណោះ ដែល​ជា​ចំនួន​លក់​ដាច់​តិច​បំផុត​សម្រាប់​ម្ចាស់​ជយលាភី​ The Voice គិត​​ត្រឹម​ពេល​នេះ។​​​

http://youtu.be/nLpha-xLuMA រដូវ​កាល​ទី​៦៖ Josh Kaufman

Josh Kaufman គឺ​ជា​ម្ចាស់​ជយលាភី​ទី​១ ក្នុង​ក្រុម​របស់​តារា​ចម្រៀង​ Usher និង​ជា​បេក្ខជន​ម្នាក់​ដែល​ទស្សនិកជន​ពេញ​ចិត្ត​តែ​ម្ដង។ តារា​វ័យ​ ៣៨​ឆ្នាំ​ដែល​មក​ពី​ទីក្រុង Indianapolis រដ្ឋ​ Indiana រូប​នេះ​ បាន​រៀបការ​និង​មាន​កូន​ ៣​នាក់​រួច​ហើយ​ មុន​ចូល​ប្រឡង​ក្នុង​កម្មវិធី។ Kaufman មិន​ទាន់​ចេញ​អាល់ប៊ុម​ដំបូង​ឡើយ​ក្រោយ​ទទួល​ជយលាភី​ តែ​គេ​នៅ​តែ​មាន​សុទិដ្ឋិនិយម​ បើ​ទោះ​ជា​បាន​ឃើញ​អ្នក​ឈ្នះ​នៅ​រដូវ​កាល​​មុន​ៗ​មួយ​ចំនួន​មិន​ទទួល​បាន​ជោគជ័យ​ក៏​ដោយ។

http://youtu.be/OZeSrRGAA4s