ថី វីរៈ កូនខ្មែរក្រីក្ររៀននៅបរទេសតាំងពីអាយុ ១៤ ឆ្នាំ ចង់ក្លាយជាស្ថាបត្យករល្បីដូចវណ្ណម៉ូលីវណ្ណ

2015-01-28 16:02:18
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនវ័យក្មេង ថី វីរៈ មានឱកាសបានទៅរៀននៅសាលាល្បីក្នុងប្រទេសសិង្ហបុរី ដែលជាប់លំដាប់មួយនៅអាស៊ី និង លើពិភពលោក តាំងពី វីរៈ អាយុ ១៤ ឆ្នាំ។ មិនតែប៉ុណ្ណោះ វីរៈ មានឆន្ទៈ ស្វែងរកមូលនិធិជួយជនក្រីក្រព្រមទាំងក្មេងៗកម្ពុជា និង បណ្ដាប្រទេសផ្សេងៗទៀតផង។ វីរៈបច្ចុប្បន្ន ជានិស្សិតឆ្នាំទីមួយ សិក្សាថ្នាក់បរិញ្ញាបត្រនៅប្រទេសអាមេរិក ហើយមានក្តីសុបិនចង់ក្លាយជាស្ថាបត្យករល្បីឈ្មោះមួយរូបដូច លោក វណ្ណ ម៉ូលីវណ្ណ ដោយហេតុផល គឺស្រលាញ់ និង ចង់ជួយខ្មែរ។

ថី វីរៈ ក្នុងថ្ងៃទទួលសញ្ញាបត្របាក់ឌុបអន្តរជាតិនៅប្រទេសសិង្ហបុរី

យុវជនសម្បុរសណ្ដែកបាយមានស្រុកកំណើតនៅខេត្តកំពង់ចាម ជាកូនច្បងចំណោមបងប្អូនបីនាក់ ដែលរស់នៅក្នុងគ្រួសារមានជីវភាពក្រីក្រតោកយ៉ាក។ ក្នុងឆ្នាំ ២០០៦ គ្រួសាររបស់ វីរៈ បានផ្លាស់ទីលំនៅមកខេត្តរតនគីរី ដោយមានប្រាក់តែ ២០$ ប៉ុណ្ណោះ។ បន្ទាប់ពីរស់នៅទីនោះបាន ២ ឆ្នាំ អតីតសិស្សពូកែគណិតវិទ្យាទូទាំងវិទ្យាល័យសម្ដេចឪ សម្ដេចម៉ែ រូបនេះ បានសាកល្បងប្រលងយកអាហារូបករណ៍ទៅប្រទេសសិង្ហបុរីមានរយៈពេល៥ឆ្នាំតាមសេចក្ដីបិតប្រកាសមួយនៅសាលា។

អាហារូបករណ៍នោះទាមទារការប្រលងច្រើនដំណាក់កាល ដោយដំណាក់កាលទីមួយ គេតម្រូវឱ្យប្រលងគណិត អង់គ្លេស និងវប្បធម៌ទូទៅ។ មានបេក្ខជនជាច្រើនរយនាក់បានដាក់ពាក្យចូលរួមប្រលង។ វីរៈ និយាយថា អាហារូបករណ៍នេះផ្ដោតសំខាន់ខ្លាំងទៅលើអត្តចរិត ដូច្នេះបេក្ខជនត្រូវតែជាមនុស្សមានគំនិតច្នៃប្រឌិត ឆ្លាត ចិត្តល្អ និង ក្លាហាន។ ម្យ៉ាងទៀត ត្រូវមានលក្ខណៈជាអ្នកដឹកនាំល្អ ព្រមទាំងពូកែគណិតវិទ្យា វិទ្យាសាស្ត្រ និង រឿងរ៉ាវផ្សេងៗនៅក្នុងសង្គម បូករួមអាកប្បកិរិយា ព្រោះថា ដំណាក់កាលមួយនៃការប្រលង គេតម្រូវឲ្យបេក្ខជនលេងហ្គេមសំដែងជាអ្នកដឹកនាំ ហើយគណៈកម្មាធិការពិនិត្យនូវលក្ខណៈសម្បត្តិរបស់បេក្ខជន។

ប្រសិនបើជាប់ បេក្ខជនមានសំណាងបានទៅរៀននៅសាលា United World College of South East Asia លំដាប់កំពូលមួយនៅអាស៊ីនិងពិភពលោក ដែលក្នុងមួយឆ្នាំៗតម្លៃបង់ចូលរៀនរាប់ម៉ឺនដុល្លារ ដូច្នេះហើយគេមិនចង់ចំណាយពេលឥតប្រយោជន៍រើសសិស្សខុសឡើយ ព្រោះអាចប៉ះពាល់ដល់កេរ្តិ៍ឈ្មោះសាលាបាន។

ជាលទ្ធផល ថី វីរៈ យុវជនវ័យក្មេងក្នុងចំណោមយុវជនដទៃទៀតជាប់ត្រូវទៅរៀននៅប្រទេសសិង្ហបុរីក្នុងឆ្នាំ ២០០៩។ កាលនៅខ្មែរ វីរៈ រៀនថ្នាក់ទី ៩ លុះមករៀននៅសិង្ហបុរី គេឲ្យរៀនថ្នាក់ទី ៨ វិញ ដោយសារតែភាសាអង់គ្លេសកាលនោះនៅមានកម្រិត និង ដើម្បីបង្គ្រប់ចំនួនរយៈពេលអាហារូបករណ៍៥ ឆ្នាំផង។ ចំពោះការសិក្សា គឺ ទៅតាមលក្ខណៈស្តង់ដាអន្តរជាតិទាំងអស់ ហើយសញ្ញាបត្រទទួលស្គាល់ពាសពេញសាកលលោក។ យុវជនរូបនេះទទួលបានបទពិសោធន៍សំបូរបែបពីការរស់នៅរៀនសូត្រជាមួយសិស្សមកពីជុំវិញពិភពលោក កូនអ្នកធំ កូនមហាសេដ្ឋី និង មានឱកាសចុះកម្មសិក្សាយ៉ាងច្រើនប្រទេស ចូលរួមការងារមនុស្សធម៌ដូចជាស្វែងរកមូលនិធិជួយក្មេងៗនៅសៀមរាប ភ្នំពេញ ចូលរួមធ្វើផ្ទះឱ្យខ្មែរជាមួយអង្គការ Tabitha ប្រមាណ ៥០ ទៅ ៦០ ខ្នងជាច្រើនលើក ជួយប្រជាជនក្រីក្រនៅនេប៉ាល់ ហ្វីលីពីន និង អាហ្វ្រិកផងដែរ។

ថី វីរៈ និងក្រុមគ្រួសារ

វីរៈ បានបញ្ចប់ការសិក្សារបស់ខ្លួនដោយជាប់បាក់ឌុបអន្តរជាតិនៅប្រទេសសិង្ហបុរី ក្នុងខែ ឧសភា ឆ្នាំ ២០១៤ ហើយបច្ចុប្បន្នបានជាប់អាហារូបករណ៍ដើម្បីបន្តការសិក្សានៅប្រទេសអាមេរិក លើជំនាញស្ថាបត្យកម្មនៅ University of Oklahoma ។ អាហារូបករណ៍នៅអាមេរិកនេះទាមទារឱ្យវីរៈ យក A និង B រហូត បើបាន C ញឹកញយគេនឹងផ្ដាច់អាហារូបករណ៍នេះវិញ។ ម្ល៉ោះហើយ និស្សិតរូបនេះត្រូវប្រឹងខ្លាំង ដោយអានច្រើន រៀនច្រើន រហូតជួនកាលដល់ម៉ោង ២ ឬ ៣ ទើបចូលគេង តែយ៉ាងណានិស្សិតរូបនេះថា វាមិនពិបាកណាស់ណាក្នុងការទទួលបាននោះទេ ដោយសារលោកចង់បំពេញក្ដីសុបិនក្លាយជាស្ថាបត្យករដ៏ល្បីល្បាញមួយរូប ដូចលោក វណ្ណ ម៉ូលីវណ្ណ ព្រោះលោកស្រលាញ់ចូលចិត្តតាំងពីតូច និង ចង់ជួយខ្មែរផងដែរ៕

សូមទស្សនាវីដេអូ ខាងក្រោមនេះ

http://youtu.be/qKhNwufU4Es