បុរសអត់ការងារធ្វើរើសបានជាង ២ម៉ឺនដុល្លារ ៣ថ្ងៃក្រោយប្រគល់ឲ្យប៉ូលិស

2015-01-24 16:03:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ជនចំណាកស្រុករកការងារធ្វើម្នាក់ មកពីខេត្តអានហ៊ួយ ប្រទេសចិន បានប្រទះឃើញលុយសុទ្ធ ១៣០០០០យាន់ (ប្រហែល ២០៨៥៤ដុល្លារ) នៅជិតផ្សារមួយពេលកំពុងស្វែងរកការងារធ្វើ។ ៣ថ្ងៃក្រោយរក្សាទុកទាំងមិនស្រួលក្នុងចិត្ត បុរសវ័យ ៤៨ឆ្នាំនេះ បានយកលុយទាំងអស់ទៅប្រគល់ឲ្យប៉ូលិស។

រំលឹកឡើងវិញ លោក Wu Xuede កំពុងត្រាច់ចរជុំវិញផ្សារពលករមួយក្នុងតំបន់ ស្រាប់តែប្រទះឃើញកាបូបមួយដែលមានផ្ទុកប្រាក់យ៉ាងច្រើន។ ក្នុងនាមជាអ្នកក្រម្នាក់ ទឹកប្រាក់ដ៏សន្ធឹកសន្ធាប់ទាំងនេះ លោកពុំធ្លាប់ឃើញពីមុនមកទេ ប៉ុន្តែលោកពុំបានប្រាប់នរណាម្នាក់ឲ្យដឹងឡើយ។ បុរសអត់ការងារធ្វើ បានយកកាបូបនោះដាក់ចូលក្នុងវ៉ាលិសមួយ រួចយកទៅរក្សាទុកនៅផ្ទះ។

ប៉ូលិសបានកំណត់អត្តសញ្ញាណ ថាលោក Wu គឺជារើសបានលុយតាមរយៈទូរទស្សន៍ CCTV។ យ៉ាងណាក្ដី ប៉ូលិសមិនបានតាមចាប់ខ្លួនអ្នករើសបានលុយនោះទេ ប៉ុន្តែបានផ្ញើសារទៅគេឲ្យយកលុយមកនោះមកវិញដោយស្ម័គ្រចិត្ត។ ៣ថ្ងៃក្រោយមក បន្ទាប់ពីបានឃើញសារ លោក Wu បានយកលុយទាំងអស់មកប្រគល់ឲ្យប៉ូលិសវិញ។

លោក Wu បានបញ្ជាក់ថា មករស់នៅក្រុងណានជីង ជាង ៦ខែហើយ។ ប៉ុន្មានខែដំបូង លោកប្ដូរការងារ ៣ដង តែរកបានកម្រៃត្រឹម ៤០០០យាន់ (ប្រហែល ៦៤២ដុល្លារ) ដោយសារទីផ្សារការងារចង្អៀតពេក។ ប៉ុន្មានសប្ដាហ៍ចុងក្រោយ លោកមិនអាចរកបានការងារថ្មីទេ ហើយលើសពីនេះលោកថែមទាំងមានកូនពីរនាក់ជាប់ខ្លួនទៀត។

លោកបានបន្តទៀតថា យ៉ាងតិច ៣ឆ្នាំ ទើបអាចរកប្រាក់បាន ១៣០០០០យាន់នេះ ប៉ុន្តែលោកមិនមែនជាមនុស្សអាក្រក់ទេ។ លោកមិនអាចរក្សាទុកលុយ ដែលមិនមែនជារបស់ខ្លួនឯងរកបាននោះទេ៕