ធ្លាយព័ត៌មានទូរសព្ទដៃតម្លៃជាង ២ម៉ឺនដុល្លារ ក្នុងសង្គមតារាខ្មែរ

2014-10-03 16:52:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាមួយនឹងការវាយតម្លៃថាវិស័យសិល្បៈខ្មែរ ជាទីកន្លែងរត់ប្រណាំងលើសម្ភារប្រើប្រាស់នោះ ឥឡូវស្រាប់តែមានព័ត៌មានធ្លាយចេញមកថា ទូរសព្ទដៃ១គ្រឿងមានតម្លៃដល់ទៅជាងម៉ឺនដុល្លារ មានជាប់ខ្លួននឹងតារាស្រីល្បីឈ្មោះម្នាក់។

ព័ត៌មាននេះ ទម្លាយចេញដោយសារព័ត៌មានក្នុងស្រុកមួយ។ សារព័ត៌មាននោះ បានរាយការណ៍ថា ម្ចាស់ទូរសព្ទដ៏ថ្លៃមិនធ្លាប់មានក្នុងសង្គមសិល្បៈនេះ គឺជាតារាសម្ដែងល្បីឈ្មោះម្នាក់ និងជាមេម៉ាយចាយរាងមួយរូបដែរ ដែលមកទល់នឹងបច្ចុប្បន្នអ្នកនាង មានវ័យក្បែរ៣០ឆ្នាំទៅហើយ។

តារាសម្ដែងរូបនោះ គឺអ្នកនាង ឌុច សុភា អ្នកមេម៉ាយកូនមួយ ដ៏ស្រស់ស្អាតនោះឯង។ ប៉ុន្តែយ៉ាងណា សារព័ត៌មានមួយនោះ មិនបានរាយការណ៍លម្អិតពីករណីនេះទេ។ ជួបតាមទូរសព្ទជាមួយ Sabay នៅព្រឹកនេះ អ្នកនាង ឌុច សុភា ក៏ពុំព្រមអធិប្បាយជុំវិញបញ្ហានេះដែរ ដោយគ្រាន់តែដឹងថាជាអ្នកសារព័ត៌មាន អ្នកនាង បានចុចផ្ដាច់ទូរសព្ទតែម្ដង។

យ៉ាងណាក៏ដោយ ពាក់ព័ន្ធនឹងបញ្ហានេះ មានប្រភពជិតដិតនឹងអ្នកនាងម្នាក់ បានបង្ហើបប្រាប់ថា អ្នកនាង ឌុច សុភា មានប្រើប្រាស់ទូរសព្ទ ម៉ាក iPhone 5S មួយគ្រឿង កន្លងមកប៉ុន្តែរូបគេមិនដឹងថា នោះជាទូរសព្ទមានតម្លៃជាង ២ម៉ឺនដុល្លារសហរដ្ឋអាមេរិកដូចព័ត៌មានធ្លាយចេញឬយ៉ាងណានោះទេ។ "ខ្ញុំអត់ច្បាស់ទេ ប៉ុន្តែដឹងថាពីរបីខែមុន គាត់មានប្រើ iPhone 5S មិនដឹងថាគាត់ដូរហើយ ក៏មិនដឹង រឿងតម្លៃប៉ុន្មានក៏អត់ដឹងដែរ"។

រូបតំណាង

តាមសារព័ត៌មានដដែល ទូរសព្ទតម្លៃថ្លៃ មិនមែនជាសម្បត្តិតែមួយគត់ដែលគ្រប់គ្រងដោយតារាសម្ដែង ឌុច សុភា នោះទេ ប៉ុន្តែអ្នកមេម៉ាយរូបនេះ បច្ចុប្បន្នក៏កំពុងគ្រប់គ្រងរថយន្តទំនើប និងដីឡូ ផ្ទះសម្បែងតម្លៃ២០-៣០ម៉ឺនដុល្លារទៀតដែរ។ សម្បត្តិទាំងនោះ គេបានទាញអ្នកនាងភ្ជាប់ជាមួយបុរសទ្រព្យស្តុកមួយរូប។ យ៉ាងណា គេមិនឃើញអ្នកនាង ឌុច សុភា ចេញមុខបកស្រាយឡើយ៕

តាមដានព័ត៌មានពីសកម្មភាពតារាជាតិផ្សេងទៀត មាននៅទីនេះ…!

អត្ថបទ៖ ទារិកា