ផល សោភ័ណ្ឌ ប្រើតែ២ទឹកកីឡាករថៃនេះសន្លប់ធំ
- 2015-01-26 15:44:32
- ចំនួនមតិ 0 | ចំនួនចែករំលែក 0
ផល សោភ័ណ្ឌ ប្រើតែ២ទឹកកីឡាករថៃនេះសន្លប់ធំ
ចន្លោះមិនឃើញ
ជើងខ្លាំងកម្ពុជា ផល សោភ័ណ្ឌ ប្រើពេលតែ២ទឹកប៉ុណ្ណោះដើម្បីផ្តួលកីឡាករថៃ Yattakid ដែលបានដាក់ជំនួសជើងខ្លាំងថៃ Kwanmoung នៅសង្វៀនបាយ័នស្ទឹងមានជ័យកាលពីយប់មិញសម្រាប់ការប្រកួតមិត្តភាពខ្មែរ-ថៃ។
ការជួបគ្នានៅសង្វៀនស្ទឹងមានជ័យកាលពីយប់ថ្ងៃអាទិត្យម្សិលមិញដែលមានអ្នកទស្សនាពេញសង្វៀនក្នុងនោះអ្នកទស្សនាបរទេសក៏ច្រើន ផល សោភ័ណ្ឌ បានប្រើសមត្ថភាពប្រកួតយ៉ាងល្អតាំងពីទឹកទីមួយដែលកីឡាករថៃម្នាក់នេះមិនអាចធ្វើអ្វីបានសោះឡើយ។ ចូលទឹកទីពីរអ្នកលេងឆ្លងដែនថៃបានព្យាយាមវាយសម្រុក និងប្រើកែងប្រយោលម្តងម្កាល ប៉ុន្តែឥតប្រយោជន៍។
ផ្ទុយទៅ ផល សោភ័ណ្ឌ បានវាយចេញតាមបច្ចេកទេសដោយកណ្តាប់ដៃ និងទាត់ជើងក្រោមបានយ៉ាងល្អ។ ចុងទឹកទីពីរ ជើងខ្លាំងកម្ពុជាម្នាក់នេះប្រើតែមួយកែងឆ្វេងទៅលើចិញ្ចើមបណ្តាលឲ្យកីឡាករអំនួតឆ្លងដែននេះដួលដាច់ផ្ងារសន្លប់ធំតែម្តង។
នេះជាការផ្តួលកីឡាករថៃឲ្យសន្លប់ជាលើកទឹកទីពីរសម្រាប់ ផល សោភ័ណ្ឌ ក្នុងព្រឹត្តិការណ៍ប្រដាល់មិត្តភាពអន្តរជាតិខ្មែរ-ថៃដែលឧបត្ថម្ភដោយខារ៉ាប៉ាវនៅសង្វៀនបាយ័នស្ទឹងមានជ័យ។
ចំណែកឡុង សុភី វិញបានចាញ់ពិន្ទុកីឡាករថៃ Lukchampachai បន្ទាប់ពីការប្រកួត៥ទឹកពេញ។ សម្រាប់គូនេះកីឡាករម្ចាស់ផ្ទះមិនអាចធ្វើអ្វីបានឡើយដោយចាញ់ប្រៀបគេទាំងជង្គង់ និងទាត់។ កីឡាករថៃម្នាក់នេះមកអង្រួនសង្វៀនកម្ពុជា៣ដងទាំងលើកនេះ និងមិនទាន់ស្គាល់ពាក្យចាញ់ម្តងសោះក្នុងនោះលើកទីមួយផ្តួល ឯម ខ្លឹមខ្មៅ ឲ្យសន្លប់ក្នុងទឹក៣ លើកទី២ស្មើពិន្ទុ ពេជ្រ សីហា និងលើកទី៣នេះឈ្នះ ឡុង សុភី៕
វីដេអូ
ឡុង សុភី vs កីឡាករថៃ Lukchampachai http://youtu.be/DviHtMDKTrE ផល សោភ័ណ្ឌ vs កីឡាករថៃ Yattikid http://youtu.be/s_lSVMU_Si4 អត្ថបទ៖ ជាន ចាន់រ៉ា